طالبت بحقها من ورث امها اجار شهري 70 ريال الله يفشلها

السلام عليكم
كيفكم صبايا الله يسعد مساكم بكل خير


حابة احكي لكم قصة وحدة
هده ياطويلات العمر والسلامه قريبتي من بعيد
والسالفة قديمة من زمان بحدود عشرين سنه بس جت ببالي قلت احكيها

هده وحدة قريبتي اتوفت الله يرحمها
وعندها بنات واولاد وكلهم متزوجين
الا وحدة ماجاها نصيبها

البنت اللي مو متزوجة جالسة في بيت ابوها المتوفي
(البيت بيت ورثة لهم كلهم)

وامهم المرحومة عندها بيت شعبي قديم مأجر
واجارة الشهري قلييل مرة بحدود الف ريال

كلهم الاخوات والاخوان المتزوجين
اتفقو ان الاجار يكون لأختهم اللي مو متزوجة

لانه لو انقسم عليهم ما بيجي شي
حوالي 70 ريال للبنات و 140 ريال للاولاد


جات وحدة من المتزوجات قالت ابغى نصيبي !!!!

كلهم هبو فيها عيب عليك وايش اصلاً بيجي حقك
كله 70 ريال ادّية اختك اللي مو متزوجة


قالت سبعين ريال ولا سبعين هلله نصيبي وابغاه

وخلاص صارو كل شهر يجمعوا الايجار
ويطلعوا منه ٧٠ لاختهم المتزوجة والباقي للبنت


طبعا انتشر دا الكلام بين الاقارب واهلي اقربائهم من بعيد
بس وصلهم الكلام

وكل الناس قالت الله يفشلها ونفسها دنيئة
وايش بتسوي اصلا٧٠
والمهم الناس اكلوها اكل

لحد ما في يوم وحدة من معارف امي تصير جارتها وحكت لأمي الكلام اللي بقوله دحين

قالت تدري فلانه زوجها سكير
ولمن يسكر يغيب عن البيت بالايام وماتردي عنه

ومرات كتيييير تنزنق
ما عندها فلوس تعشي او تغدي عيالها
واحيانا مافي في بيتها قطعة عيش

فتقول لمن طلبت حقها ٧٠ ريال
تقول ادري الناس بتفضحني بس انا محتاجها

اجيب بريال عيش صامولي وجبنه بريالين ثلاثة
واعشي عيالي فيها
او اجيب لهم سندوتشات من الكافتريا الساندوتش بريالين (من زمان القصة)

وتقول ما اصرف منها شي
الا اكل من البقاله لعيالي لمن ابوهم يغيب

ودحين وبعد مرور الزمن كبرو عيالها وزوجت بنتها
والله يعوضها فيهم خير يااااارب


وهل زوجها لسا على حاله او اتغير ما اعرف الله اعلم



الشاهد من هده القصة
-اول شي لا تحكم على الناس من شي ظاهر حتى لو الموقف مو في صالحة
لانك ما تدري بخبايا الامور
-تاني شي نتفقّدالجيران والاقارب لأن ممكن فيه محتاجين ومتعففين
فنحاول نساعد ونمد لهم العون بطريقة غير مباشرة عشان ما نجرحهم