طالبه مشورتكم لحملى الجاي

السلام عليكم و رحمه الله و بركاته............

أخواتى حريم و كروشات عالم حواء.....أبغى نصيحتكم و خبرتكم فى موضوعى اللى حأعرضه عليكم

عندى و الحمد لله رب العالمين ولد عمره سنتين و نص و من فتره قررنا أنا و زوجى إنوا نحاول نجيب له أخ أو أخت و الحمد لله نجحت المحاوله و أتضاعفت فرحتنا لما عرفنا أنى حامل بتوأم و كل متابعاتى و مواعيدى كانت كويسه كل شى ماشى بشكل سليم و حركتهم كويسه و التحاليل ممتازه و لما صرت 26 أسبوع فجأه حسيت أنوا بطنى نزلت تحت لدرجه إنى خفت و وقفت و حسيت بضغط من تحت لكن كل شى كان كويس و صارت بطنى نازله بشكل واضح فى المرايه و تانى يوم الصباح حسيت إنى أبغ أروح الحمام الله يكرمكم رحت مره و إثنين و الثالثه حسيت بالكيس حق البيبى بدون أي ألم نازل و شفته بالمرايه كلمت زوجى و طيران على المستشفى و فى الطريق بالسياره حسيت بطلق خفيف مرتين أو ثلاثه بس ما يتقارن بولاده إبنى وصلنا الطوارئ و المفاجأه الصاعقه كانت إنوا الرحم مفتوح عشره سم و قالوا لى ولاده صرت أبكى و أقول بدري وقفوا الطلق مع إنى مو حاسه بيه قالت لى الدكتوره لو 2 إلى 4 سم نقدر نوقفه بس 10 سم مستحيل. و قرروا لى قيصريه لآنوا البنت اللى تحت بالعرض ولدتهم و طبعا حطوهم بالحضانه لأنهم صغار جدا جدا 700 جم و 730جم
البنت الآولى أتوفت ثالث يوم و بعدها بيوم لحقتها أختها و لا حول ولا قوه إلا بالله.

الدكتوره اللى كنت باتابع عندها و الآستشارى اللى شفته بعد ما ولدت أكدوا لى إنوا كل حاجه كانت سليمه فى مواعيد المتابعه حتى عنق الرحم كانت مقاساته سليمه فى المواعيد و الصور الصوتيه اللى قبل الولاده و قالو لى أنو ممكن أنو نزول البنت الآولى على التانيه سوى ضغط كبير على عنق الرحم و هو اللى سبب الولاده المبكره لآنى حتى تقريبا ما كنت بأتحرك إلا الازم يعنى ما فى إجهاد أو تعب عليا وولادتى الآولى ولدت عادى و لا كان فى مشاكل من أى نوع بس كلهم نصحونى إنى أعمل ربط لما أحمل المره الجايه للآحتياط.

الآن اللى صار صار و الحمد لله رب العالمين على كل حال بس دحين سوالى هل ضرورى أتابع مع طبيبه نساء وولاده قبل لا أخطط أحمل مره تانيه؟و مين تعرف أو أتعالجت عند طبيبه كويسه فى مستشفى الحبيب اللى فى خريص لآنه الآقرب لبيتى.

الله يكتبنا الآجر و يعوضنى خير