قبل اسبوعين كنت داخله مواقع انقليزيه اطلع وصفات حق العشا ..
ولقيت هالوصفه السهله واللذيذه جداً
وانا سميتها مسقعة الأنقليز هههه ^_^
الكل اتخبلوا عليها
وتقدرين اتقدمينها بأكثر من شكل
المقادير :
- 4 حبات باذنجان حجم صغير " مقطع الى دوائر "
- 3 بيضات
- 1 1/2 كاس بقسماط "خبز بودر "
- ملح
- فلفل أسود
- 3 فصوص ثوم مدقوق
- 3/4 كاس زيت زيتون
- 4 حبات طماط
- خل أبيض
- ملعقة صغيره زعتر بري ( اوريقانو )
- ملعقتين كبار معجون طماط
- 1 كاس جبنة بارميزان
- كيس جبنة موزريلا مبشوره
الطريقة :
- انقص راس الطماط
- ونحط في جدر ( ماي + خل أبيض + ملح )
- ونحط الطماط فيه لين ما يبدا الماي ايفور وتبدا الطماط تليين
- بعدها انشيل الطماط ونبدا نهرسها بالمطرقه
- نخلط البيضتين في وعاء ونحط الباذنجان فيهم
- نخلط ( البقسماط + الملح + الفلفل الأسود )
- نقلب الباذنجان في هالخلطه
- نحطهم في الثلاجه لـ مدة 20 دقيقه
- في جدر نحط ملعقة صغيره زبدة وملعقة صغيرة زيت زيتون وانحط الثوم ونقليه
- انضيف الطماط المهروسه
- نضيف معجون الطماط
- نضيف الملح والفلفل الاسود والاوريقانو
- نخلطه وبعدها انغطيه وانخليه على النار 30 دقيقه
- نفتح الفرن عشان يسخن
- نطلع الباذنجان ونقليه في زيت زيتون ونحطه بعدها على ورق عشان تمتض الزيت
- انجيب صحن بايركس للفرن
- ندهنه شوي بـ صلصلة الطماط
- انصف الباذنجان وانحط من صلصة الطماط ونرش البارميزان والموزريلا
- ونرجع انعيد هذي الطريقه مره ثانيه وانخلي الموزريلا اخر شي على الوجه
- انحطه في الفرن لـ مدة 30 دقيقه بدون ما نغطيه
طريقة التجهيز ( من تأليفي )
أنا سويته بطريقيتين .. كنت ابي اسويه بـ طريقه ثانيه بس ما كان عندي الخبز الفرنسي
- قدمت هالاكله مع الخبز اللبناني
و بعد سويتها بطريقه ثانيه
- قليت بيضتين
- جبت صمونه دهنتها بـ شوية مايونيز
- حطيت البيضا
- وحطيت طبقه من صينية الباذنجان
- وبعدها حطيتهم في التوستر
تقدرين اتقدمينها بـ طريقه ثانيه وحلوه واللي هي على الخبز الفرنسي
- اتقصينه على شكل حلقات مايله " مثل مال بيتزا هت "
- تدهينه بـ كريمة الثوم أو جبنة الثوم " مال كيري لو اتعرفونها "
- اتحطون على كل حلقه طبقه من الباذنجان واتحطونهم في الفرن لـ دقايق قليله
وان شالله اتكون الأكله هذي اعجبتكم ^_^