هذا اول موضوع لي في قسم الطبخ وثاني موضوع في المنتدى عموما أتمنى انه يعجبكم
هذا ياطويلات العمر طبق من الاطباق الجانبيه الكوريه ذقته في مطعم كوري وحبيته ( لاتخافون لافيه لحم كلاب ولا سحالي والله نظيف كخخخخخ ) فقررت اني اعرف طريقته واسويه في البيت وبعد بحث طويل الحمدلله عرفت طريقته وطلع هو نفسه
وهو طبق جدا لذيذ وسهل وسريع والاهم انه جدا مفييييييييييييييييييييييييد
مخلل السبانخ على الطريقه الكوريه ( لاتستغربون انه فيه احد يخلل السبانخ طالما انه فيه مخلل مانجا ومخلل باذنجان اذا كل شي يتخلل )
المقادير:
5 حزم سبانخ
10 م ص زيت سمسم
10 م ص بذور السمسم
1وربع م ص ملح
2 فص ثوم مطحون ( وطبعا على حسب ذوقك اذا ماتحبي نكهة الثوم تكون قويه ممكن تقللي الكميه واذا تحبي الثوم تزيديها )
1 بصل أخضر تقطع الى شرائح رفيعه
5 م ك صويا صوص ( العاديه مو الحلوه ولا السوداء)
10 م ص خل أبيض
نجي للطريقه :
تنظفي السبانخ مضبوط من التراب والوسخ اللي فيه
وبعدين تقطعيه قطع حجمها وسط وتشيلي الطرف الزياده زي اللي في الصوره
بعد ماتقطعي الكميه اللي عندك كلها تكوني قد غليتي في قدر كبير مويه تحطي فيها كمية السبانخ اللي عندك وتخففي النار على اقل شي بحيث انه المويه تفضل حاره بس مو تغلي
تخليه لمدة 3 دقائق تقريبا او الين مايصير لون السبانخ أخضر غامق بعدين تصفيه من المويه في صفايه وتغسليه بمويه بارده
بعدين تشيلي كميه من السبانخ وتحطيها بين راحة ايدينك وتعصري منها المويه وتحطيها على جنب الين ماتخلصي الكميه اللي عندك
بالنسبه للخلطه تحطيها كل أبوها مع بعض
وتحطي عليها السبانخ وتبدأي في المزج والخلط الين ماتنخلط السبانخ مع المكونات الثانيه تمااااام
بعدين حطيها في حافظه وحطيها في الثلاجه وخليها لمدة يوم تتخلل وبعدين تقدري تاكلي منها بالعافيه
وهي كطبق جانبي رائعه مع الرز او المكرونه وطبعا انتوا عارفين فوائد السبانخ والسمسم والخل والثوم
وبالنسبه للي مايحبوا السبانخ ترى انا كنت أكره شي اسمه سبانخ ماكنت أطيقها لكن بالطريقه ذي أتغيرت نظرتي لها
على العموم يالله ياحلوين جربوها وقولولي وش رايكم
اللي تعجبها تدعيلي واللي ماتعجبها لاتدعي علي :26:
بس مخلل سبانخ!!؟