طبق مصرى أصيل "برام الرز المعمر"

حقيقى وحشتونى جداً و بقالى كتييييييييييير ما قدمتش أى طبق (حاجة تكسف)
و علشان أثبتلكم أد إيه أنتم وحشنى رجعالكم بطبق مصرى دسم يتاكل لوحده و بس


بــــــــــرام الــــــــــرز المعمـــــــــــر
المقادير

الكمية تكفى 4 أشخاص

2 كوب رز مصرى مغسول و منقوع ساعة
3 كوب حليب ساخن كامل الدسم
كوب شوربة لحم (ممكن استبدالها بكوب حليب فى حال عدم وجود الشوربة)
ثلث كوب قشطة
كيلو لحم مسلوق أو 4 حمامات غير مسلوقين
ملح و فلفل
ملعقة سمن بلدى كبيرة (يمكن الإستغناء عنها)

الطريقة

1 - نسخن الفرن جيداً
2 - نصفى الرز جيداً ونخلط عليه الملح و الفلفل
3 - نضع طبقة من الرز فى قاع طاجن فرن ثم نضع قطع اللحم و فوقها باقى الرز و فى حالة إستخدام الحمام نضع بعض الرز داخل كل حمامة
4 - نخلط الحليب الساخن و الشوربة و نضيفها على الرز و نغطى الطاجن و نضعه فى الفرن
5 - بعد حوالى ثلاث أرباع ساعة يكون الرز شرب كل الحليب نخرج الطاجن من الفرن و نوزع القشطة على وجه الطاجن و نكشف الطاجن
6 - بعد نصف ساعة نتذوق الرز لنتأكد من تمام النضح و نضيف ملعقة من السم البلدى المقدوح (ممكن الإكتفاء بالقشطة) و نشعل الشواية ليحمر الوجه

و بالهنا و الشفا و ماتنسوش تشربوا بعده حاجة سخنة لتسهل الهضم و تذيب الدهون