طبق مميز ( الصبيب ) لذيذ جدا

السلام عليكم وصبحكن الله بالخير يا حريم يا سنعات :cook:
اليوم ونزولا عند رغبات الكثير من خوياتي وصديقاتي الحميمات بنات عالم حواء
اقدم لكم طبق الصبيب المميز الي يخلي الوحدة اذا كلته تهاوش عليه هي وعيالها هههههههه

المكونات :
1- خضراوات مشكله ( بذنجان -طماط -بصل - بطاطس بس لا تكثرينه لانه يسمن - كوسه - خيار - جزر )
2- شوي سمن غنم
3- خبز تنور جاهز بس خليه أأخر شي ( واذا ما كنتي تعرفين تسويين خبز تنور سوي رغفان يعني خبز صاج واذا ما تعرفين لخبز الصاج الله يعينتس اشتري خبز خباز افغاني )
4-قدر متوسط مع سكين حادة
5-صلصل
6- ملح



الطريقه :
1-حطي على النار شوي طماط مقطع مع بصل مقطع تقطيع صغير مع السمن والملح واحمسيه يعني سوي ( حميسه )
2- اذا انحمس الطماط مع البصل زودي عليه كوب ونص ماء مغلي وخليه يغلي على النار وصقطي الخضراوات المذكورة بالمكونات رقم 1 كلها بس مع تقطيع صغير
3- خليها على النار وانتبهي لها لين تستوي ومو تخلينها وتروحين تلتهين بالورعان لالالالالالا ولا خليتس مرة سنعه وابقي عندها مشان ما تحترق
4- بعدين اذا استوت الخضره مع المرقه خوذي الخبز ( خبز التنزر ) وافرشيه على صحن تقديم مستوي وحطي طبقه من الخبز وصبي الايدام حق الخضرة على الطبقه الاولى وبعدين سكريها بطبقه ثانيه من الخبز وصبي عليها مرة ثانيه وسكريها الخبز وثبي مرة ثالثه عليه كله
وكذا تكون الطبخه جاهزة للتقديم
ملاحظه
هذي الطبخه تصلح وقت العشا وتصلح اكثر بالبر ادا طلعتوا كشته

بالهنا والعافيه
بس لا تنسين روحتس وتاكلينها وتخلين عيالتس :cook: