طبيعي اني بكيت

السلام عليكم
كيف حالكم بنات
مشكلتي اني عاطفية شوي 😂😂😂
ما انسى كل مين مر بحياتي مستحيل انساه
لما تزوجت كان عمري ٢٠ سنة ماقعدنا الا شوي ونقلت معاه مكان عمله منطقة بعيدة
وعشت فيها من ٢٠٠٥ حتى ٢٠٠٩
ماكان في واتس ولا ايمو ولا تويتر كان في ويندوز ماسنجر في احد يعرفه ؟
كنت اراسل بنات عمي صديقاتي خواتي بالساعات عليه واذا النت كان قوي نفتح كاميرا بس لازم الاول نركب كاميرا فوق الشاشة
حتى دقت الباب صاحبة البيت تقولي ابغى اتعرف عليك
وفعلا تعرفت عليها وعلى البقية والجميع الله يسعدهم ويذكرهم بالخير طلعوني من وحدتي
كانت ايام جميلة معهم ونسوني وحسيتهم اهل واكثر من اهل ماكان ودي ابدا افارقهم
بس زوجي قدم استقالته رسميا وتفرغ للعمل مع عائلته ومشينا تقريبا بداية ٢٠٠٩
رجعنا على بيت اهله فترة
بعدين اشترى بيت ملك بنفس حارة بيت اهله ونقلنا عليه
انا وفي بيت ثاني معنا حق عمة زوجي ساكنين فيه عائلة ايجار
سكنا بنفس الوقت
انا وهم من مؤسسين الحارة احنا جينا وسحبنا الكل
كانت اراضي فاضية
الحين منطقتنا كلها فلل الله يبارك لهم
من اول شهر علاقتي تجذرت بالجارة هذي هي اكبر مني بسنتين
ما اقدر اوصفلكم قوة علاقتي فيها مثل الاخوات واكثر يشهد الله مارأيت منها الا كل خير واشهد الله على حسن اخلاقها وضيافتها وتدينها
استمرت علاقتي فيها من ٢٠٠٩ حتى ٢٠٢١ ولكن
لكل قصة نهاية
زوجها صار عنده نقل وبترجع مدينتها ( ابها)
حاولت انها ماتنقل حتى بناتها وعيالها تربو هنا وخلاص عجبتهم اجواء الدمام
اما انا كان شعوري حزين جدا كنت اسابق الايام عشان اقعد معها اكثر قبل مانتفارق وهي كذلك
نقلت الله يستر عليها ويوفقها ولعل يكون لنا لقاء ثاني
يوم نقلها كنت ابكي كثير حتى يوم ودعتها انا وهي ماحاولنا نبكي بس غصب عنا نزلت الدموع يوم ودعتني ومشت
تصدقون
حسيت الحارة مظلمة بعد مامشت منها
المفتاح تسلمته منها عشان عمة زوجي مسافرة
حول الساعة ١٠ بالليل مافي احد غيري بالبيت ولدي الكبير مع اصدقائه بناتي برا زوجي مسافر
تذكرت انه بمثل هذا الوقت جالسة بروحي اروح اتقهوى معاها ونسولف
سحبتني رجولي ولبست ودخلت بيتها مدري ليه
لما شفت بيتها مظلم ومهجور وفاضي حسيت بغصة بكيت من قلبي مدري ليه
العشرة ماتهون يابنات
بكل مكان داخل هذا البيت لي انا وهي تفاصيل
شعور غريب اكيد في احد منكم عاشه وجربه يوصفه لي
دوام الحال من المحال
طعم الفقد صعب نوعا ما بس مجبورين نستمر بالحياة
حبيت افضفض شوية الله يسعدكم