طحت في البحر بعز الليل..تجربه موت شخصيه.. وتوبه

اختي الوحيده..حبيبتي ومعاونتي في كل امري.. لاتصلي!!
الومها؟؟ ابدا والله لا الومها انا نفسي لم اكن اصلي قبل الزواج
والله ماركعت لله ركعه..ليش؟؟ ماتعودت ولا تعلمت مع اني كنت اصلي ولكن صادقت وحده ماتصلي وتاثرت فيها
المهم
زوجي الله يوفقه استخدم معي اسلوب الترغيب والترهيب..هددني بالطلاق(وعلى فكره انا قلتله بالطقاق الرجال كثييييير) يوم شاف البنت راسها يابس جاني من ايدي اللي تعورني وقال انا احبك وابي اكمل معك وابي نربي عيالنا ع الشي الزين ومن الكلام الطيب وبديت اصلي..
وع العموم البيت مافيه حزم يعني كل البيت لاصلاه ولا عباده باستثناء امي اللي تصلي وابوي مايندرى عنه لانه يجي وقت الغدا بس..
الزبده بيئه اختي ماساعدتها وهي اموره ام 13 سنه بثاني متوسط
كنت مزاعله ابو الشباب وجايتهم بطول عندهم(زعله قويه)
وانقهر عشانها ماتصلي
كانت تصرفني تقول دوره.. ثم يومن قلتلها ماصارت 3 اسابيع دوره؟؟ زبدتها بوجهي وقالت مالي خلق
طبعا انا ماقدر اغصبها .. ولا ودي اجي باسلوب الغصب وتعاند
فقررت اعلمها ليش انا بديت اصلي
عذاب القبر..الدفن.. نعال اهلك اللي بيتركونك في المقبره لحالك.. دود وصوارير ونمل((الرعب الابدي))
ثمن قلتها عن تجربه انا مريت فيها يومن بغيت اموت..
كنت راكبه جت سكي لحالي بالليل(حق واحد من معارفنا ملاك بالشاليهات والجت سكي حقه..يعني اقوى واسطه))
طبعا ممنوع الركوب بالليل
لكني ركبت
ثمن قعدت استعرض قدراتي على اخوي بالرضاعه.. يقالي اول مفحطه بحريه
الشاطئ بعيد
انا بنص البحر.. دوامات واسماك قرش وليل ومبعده ومحد بيسمع صراخي
ويقلب الجت سكي
ونطير منه تقريبامسافه متر بالهوا واهبد بالبحر الله اعلم يمكن الهبده اخذتني خمس امتار تحت المويه اغوص اغوص لين بدا ينقطع نفسي..
واشوف فلاش باك..شريط حياتي يمر قدامي .. اشياء والله صارتلي بالتمهيدي ناسيتها تماما واذكرها في ذيك اللحظه بالذات..ثمن..
ثمن بقيه الشريط كان مرعب ياشيوم ياحبيبتي
شفت طواله لساني على اميمتي حبيبتي
شفت اني اتعيجز عن الصلاه
وعرفت ان نهايتي موب زينه
بديت احس برعب وهلع
بروح جهنم
لاااااااا لالا مابي ارجوكم والله مابي
بتوب..
فجاه..حسيت بنفسي.. وبديت اسبح للاعلى ..اصعد.. اصعد .. اصعد.. لين وصلت سطح المويه
كان رايد يسبح ويصيح وينادي اسمي .. شذا شذا .. يوم شافني بدا يسبح باتجاهي..قلتله رايد لاتجيني امسك الدباب انا اعرف اسبح
ركبت ورجعنا وقلت لامي ان زلقت وانا اغطط رجولي بالمويه عشان ماخرعها


شيما حبيبتي..الموت حق ..وانا قربت منه..انا ابي اشوفك معي بالجنه ..
هي قامت تصيح من القصه.. وترحمنا على رايد..اللي توفى بعد شهرين من قصه الجت سكي بحادث سياره
وانا اصيح من التاثر ومن ذكراه

ومن بعدها وحبيبتي تصلي..حتى انها تغلط بسوره الفاتحه احيانا بس الحمدلله انها اتعظت..وانها تحاول

كتشجيع اشتريت لها حذاء اسفنجي عملاااااااااااااااااااااق واقلام مزركشه وميداليا ينت راسها كشه

والله يديم علينا طاعته