طرق تجعلك تستغنين عن الخادمة
السلام عليكم ورحمة الله وبركاته..
أخواتي الغاليات بعد ما قرأت ردودكم تحمست إني أكمل الموضوع بس من جهة أخرى..
من جهة تنظيم المنزل..
في أيش يفيد تنظيم المنزل؟؟
فيه فرق كبير و شاسع بين الترتيب والتنظيم..
فالتنظيم يحتاج ترتيب والترتيب يحتاج تنظيم..
عني أنا شخصياً أكـــــــــــــــــــــــــــــــــره إني أرتب قبل ما أنظم..
1-غرف النوم:
أولاً:الملابس ودواليب الملابس:

قبل كنت لما اطبق الملابس كنت أقسمها على حسب الشخص يعني ملابسي لوحدها ملابس أختي لوحدها وهكذا وبعدين أحط الملابس في خزانة صاحبها..
صحيح كان سريع أطبقها..لكن لما اجي واطلع الملابس أتعب وأنا ادورها و تتحوس الخزانه..
و كأنك يا ابو زيد ما غزيت.. وكنت أكـــــــــــــــــره دولابي و أكــــــــــــره الأعياد عشان اضطر أرتبها.. وما كنت أعرف أيش فيها أصلاً الا من مناسبه لمناسبه.. وأمي تغصبنا نعزلها كل شهر..
ولأني طالبه و أساعد أمي في البيت كنت أنظفها و أعزل الخزاين قبل المناسبات وكنت اطول و أنا أرتبها وتطلع عيوني على ما أرتبها..
حتى قبل سنتين تقريباً فتحت منتدى عالم حواء وتعلمت منه أشياء كثيره الله يجزاهم عني خير الجزاء..
فتحت الدولاب و نزلت ملابسي الي في الخزانه و قسمتها (البجايم..ملابس الخرجات العاديه..ملابس السهرات..والمناسبات)
و الي ما لبسته من سنه رميته.. ومسحت خزانتي بديتول وبخرتها.. وغسلت كل ملابسي وكويتها ..
الي محتاج تعليق علقته.. والباقي لفيته رولات وملابس الشتاء حطيتها على جنب.. والملابس التحتيه يكرم القارئ حطيتها في صندوق .. أحس صارت مساحه واااااااااااااااسعه في خزانتي.. جبت صندوق مقسم حطيت فيه ذكرياتي و أسلاك أجهزتي..صراحه فررررررررررق .. صرت ما اتعب ولا اشيل هم بالمررره بس أطلع الملابس و أمسحها اذا تغبرت .. والملابس مطبقه من أول..
وصرت أعرف مكان كل حاجه في خزانتي يعني ما أنبش فيها إذا جت المناسبات,,
المفاجأه أن أخواتي كانو جـــــــــداً فوضويات في دواليب الملابس .. كانو يرتبو بس ترجع تتحوس..
بس لما سوو طريقتي مــــــــــــــــــــــره ارتاحو وصرنا الحين ما يحتاج ناخذ وقت طويل واحنا نرتبها ..
زي ما قلت بس نمسحها عن الغبره..
وبــــــــــــــكـــــــــذا ارتحنا من هم ترتيب دواليب الملابس.. وقلت نسبة ترتيب غرف النوم إلى 50% لأن كانت الخزاين تاخذ وقت ومجهود طويلين..
حتى لما نطلع ملابس على طـــــــــــــــول نطلعها وتكون ملفوفه حتى الملابس الداخليه تكرمون فيها..
وصارت خزانتي تقريباً مثل كذا

ثانــــــــــــــــــــياً:الدواليب الباقي في الغرفه مثل :التسريحه ودولاب الأغراض المدرسيه:
آآآآآآآآآآآآآآآآآآآههه أتعب و أنا أقول آآآه لأن مهما رتبناها ترجع تتحوس من جديد..
حتى توصلنا إلى حل سلمي لكل الساكنين في الغرف.. قسمنا سحابات التسريحه ودولاب الأغراض المدرسيه.. جبنا دولاب مــــــــــــــــــره صغير ومقسم لسحابات حطينا فيه البكل والشباصات و الأمشاط..
وقسمناها و وزعناها..أول سحاب البكل الرسميه للمدارس..ثاني سحاب الشباصات والشرايط حقت المدارس السحاب الثالث البكل والشباصات الملونه.. السحاب الرابع الربطات والطوق,,والأخير للأمشاط وفرش الاستشوار
وصراحــــــــــــــــــــــــــه التسريحه مــــــــــــــــــــــــــره ترتبت وصرنا ما ندور عن البكل او الامشاط مثل أول..
أو نضيع البكل مثل أول,,مــــــــــــــــــــره فرق..
والتسريحه قسمنا سحاباتها.. الأول لأجهزة الشعر..الثاني للكريمات..الثالث للأساور بعد ما وزعناها في علب..
الثالث للأسلاك والشواحن و كراتين الأجهزه ,, وهكذا..
وهذي بعض الأفكار..



أما الأغراض الزايده جبنا لها دولاب متوسط مقسم لسحابات.. الأول لأدوات النظافه الثاني للمناشف الثالث لأغراض المدرسه بعد ما رمينا الأشياء الخربانه والمتكسره مثل أقلام التلوين وقسمناها في شنط وعلب صغيره وترتــــــــــــــــــــب الدولاب..الرابع لأدوات الخياطه والرابع للكتب..
وهذي بعض الأفكار لترتيبها..




وبعدها مسحنا جدران الغرف وشطفناها..
النتيجه:
صـــــــــــــــــراحه صــــــــرت ما أتعب و أنا أنظف الغرف بالعكس مره مريح ترتيبها.. بس أمسح الدواليب والجدران والشبابيك والأبواب مـــــــــــــــــــــــــــــره راحه..وقلت نسبة العمل فيها إلى تقريباً 70% وربي ما أكذب عليكم في الي قلته مـــــــره أرتحنا بعد ما حطينا القوانين ورتبناها..
2-اقسام الضيافه:
دخلتها ونظفتها من قـــــــــــــــــــــــــــــلب وتعبنا عليها وبعدها قفلناها..بالأول كنا نلعب فيها لكن الحين لا..
و إذا جونا ضيوف تكون مرتبه ونظيفه وعن التبخير حطينا فواحات .. سعر الفواحه من 5 الى 7 ريال الي احنا جبناها وكنا ما نحتاج نبخر الا تقريباً بجاوليه بس.. اما حمامات الضيوف نغسلها كل أسبوع..
3-المـــــــــــــــــــــــــــــــــــــــطبخ..
أكــــــــــــــــــــــــــــــــــــــــــــره المطبخ وكل ما يمت له بصله.. حتى إني كرهت الطبخ كمان..
لكن طلعت الشرير الي في داخلي بعد ما ملــــــــــــــــيت..صرت أغسل المواعين وأقفله و أرفض لأي شخص يدخله.. حطيت لهم ترمس مويا و أكواب يشربو فيها غيره لا.. نزلت المواعين الي في الدولاب وقسمتها..
مواعين الضيافه..أباريق العصير والمويا ,,مواعين الاستخدام اليومي..
حطيت الدولاب الي في الزاويه لمواعين الضيافه فقط..
الأول للترامس القهوه والشاي الثاني لصحون الأكل..الثالث لصحون الحلى و الصحون المقسمه..
وعلى نفس الترتيب رتبت باقي المواعين.. وقسمت الثلاجه ورتبتها..
صرت أعرف مكان كــــــــــــــل حاجه في المطبخ.. فعشان كذا سهل ترتيبه مــــــــــــــــره لكن الوالده الله يحفظها الا تغير الترتيب لأنه ما عجبها .. فكــــــــــــــرهت المطبخ لأنه مو مرتب مثل ما ابي لــكن الحمدلله الشغل قل عن الأول بكثير..بالذات غسل المواعين..كل يوم على وحده بالدور,,
النتيجه:
صرت أحس أن فيه خدامه خفيه تشتغل لنا في البيت لأنا مـــــــــــــــــره أرتحنا..

3-الحمامات:
حبيبتي لا تاكلي هم.. بعدين راح تدعين لي ان شاء الله اذا حسيتي بالفرق..مو لازم الميزانيه..
جربي الترتيب هذا واذا ما عجبك لا تسويه..
1-جيبي حتى لو علبه بلاستيكيه المهم انك تحطي فيها أدوات الاستحمام مثل الشانبوهات و صوابين الجسم..
2-جيبي كوب قديم وحطي فيه الفرش والمعاجين..
أرمي الصوابين الي ما تحتاجوها او المعاجين الي قربت تنتهي.. وجيبي صندوق وحطي فيه أدوات تنظيف الحمام.. وجيبي سله كبيره وحطي فيها الملابس اذا كنتِ تحطي الغساله في نفس الحمام..
وبعدين نظفي الحمام كويس ولمعيـــــــــــــــــه .. ورجعي السلال لأماكنها.. و أتبعي القوانين الي كتبتها..
الي يتحمم يغسل البانيو والأرضيه .. زالي يستخدم المغسله يغسلها.. والي يستخدم التواليت يكرم القارئ
يسحب السيفون .. وبكـــــــــــذا ما حيتعدم الحمام..
3-صالة الجلوس:
الي يرمي حاجه يشيلها و أتبعي القوانين الصارمه و العقابات صدقيني في الأخير ما حتتحوس الصاله بالمـــــــــــــره.. بس تشيلي السفره وتكنسيها..

بعض النصائح الي ممكن تفيدك في تنظيف البيت:
1-إذا كانت جدرانك مــــــــــــــره وصخه او حابه تنظيفها قبل الأعياد ومو قادره تنظفي أعلى الجدار أو ما عندك وقت..
جيبي المكنسه اليدويه ونظفيها وغمسيها في المنظف و أمسحي فيها.. راح يلــــــــــــــــــــمع الجدار من النظافه حتى لو نظفتي بس بتايد ومويا..و أسرع في الوقت..
وعلى فكره هذا سر لوحده من ربات البيوت الناجحات.. وربي أن بيتها يلمع من النظافه ما شاء الله..
2-استعملي التايد في تنظيف الأرضيات أحياناً..
لأن التايد مذيب رائع للدهون ولو لمره في الشهر شطفي فيه او استخدمي جف وحتشوفي الفرق..
فيه ناس يستعملو الفيري مع الديتول.. لكن أنا استخسرت الفيري..
3-الكولا
بعض سائقين الشاحنات الأجانب ينظفو الشحم الي على شاحناتهم بالكولا يفركو فيه..
أنا شفت له فيديو ذاب الشحم بنسبة 50%
ممكن تستعمليه للبوتجاز أو لصواني الفرن..
4-أمسحي الأبواب بزيوت عطريه..
حتعطي لمعه للباب و تخلي ريحته حلوه لأن الباب بعد ما تنظيفه حيطلع ريحه لأنه خشب .. فبعد ما تنظفيه أمسحيه بزيت عطري.. او أي زيت و اضيفي له عطر.. بكذا حيبقى الباب نظيف لفتره أطول..
5-أضيفي على ماء غسيل المواعين ليمون يعني ليمون+فيري+ماء=لمعه للصحون
وكمان يخلي المواعين بلا ريحه و يعطيني نفس نتيجة الكلوركس قصي ليمونه نصين واعصريها في المويا وحطي القشره كمان في المويا وان شاء الله تدعيلي..
كمان نفس المحلول استخدميه لتنظيف الغاز جـــــــــــــــــــداً رائع
6-استخدمي ملمع الزجاج لتلميع البوتجاز
انا عن نفسي استخدمه أسرع من الليمون و أحسن
و إلى هنا و أكون انتهيت من هالجزئيه.. أتمنى إني أشوف ردودكم حتى أنزل مواضيع أكثر والي عندها نصيحه او تعليق أتمـــــــــــــــــــنى إنها تفيدني.. وفي النهايه ما ابي منكم إلا دعوه في ظهر الغيب لي ولوالدي و للغوالي الي ماتو.. وبصراحه أنا محتاجه للدعاء.. وطلب أخير.. ممكن الي تجرب نصايحي تقول لي على النتايج
والسلام عليكم ورحمة الله وبركاته

افكارك رووعه عسى الله يحقق لك فوق مناك ياااارب ويسعدك ويسهل امورك💞

جزاك الله خير

الله يعطيك العافية

يعطيك العافية موضوعك رووعه تحمست له والعيال الله يهديهم ويصلحهم ..وجزاك الله خيرا