طريقة استفدت منها و حبيت افيدكم ❤️

السلام عليكم و رحمة الله و بركاته
كيفكم ؟!
بنات هالموضوع ترددت كثير بين اكتبه او لا بس في الاخير قررت اكتبه لاني فعلاً لاحظت التغير في حياتي بفضل الله للافضل خلال اسبوع بس
اللي حصل ي بنات اني حبيت نفسي و صار اهتمامي بنفسي اكبر من اهتمامي بتوافه الامور اول شيء سويته صرت اصحى من النوم و اخذ لي شور سريع و امشط شعري و ارتبه و ادخل المطبخ اسوي رضاعة لبنتي و بعدها اجهز الغداء و ارجع اخذ شور قبل يرجع زوجي و صار لي فترة طويلة ما استخدمت الاستشوار فصرت استشور شعري و اخليه مفتوح البس اي لبس عاجبني بالدولاب احط مكياج خفيف و شوية عطر و انتظر زوجي يرجع و احط الغداء و بعد ما نخلص ارتب المكان اللي بنجلس فيه مع شوية بخور و المطبخ اخلصه اول ب اول صرت شغل البيت اسويه و زوجي موجود علشان القى شيء يشغلني عنه و عن المناقرة معاه اول لاني كنت فاضية مافي الا هوه بوجهي انشغل فيه الحين صار اغلب وقتي مشغوله ارتب هنا اغسل ملابس انظف المطبخ اجلس اقرأ روايات اقرأ كتب مفيدة اسولف مع صديقاتي بالواتس اتابع برامج ع التلفزيون الزبدة صرت احس نفسي مشغووووووولة ما عندي وقت فراغ و ملل
ثاني شيء سويته صرت اتقبل اي شيء يقوله برحابة صدر مثلاً جيت اقول له ابغى اروح المكان الفلاني و يقول مافيني حيل اقول له خلاص مو مشكلة متى ما فضيت وديني لما اقول له ب اطلع مع امي الحديقة و يقول لي لا اقول له ابشر والله ي بنات سويت هالشيء اسبوع بس و حسيت نفسي مبسووووطة حتى زوجي تغير صار يضحك و يسولف صار بعيد عن جواله يدور اي موضوع علشان نتناقش فيه حتى لو تافه بس اهم شيء نسولف الحين لي ٣ ايام كل ما اطلبه شيء قال لي ابشري من عيوني او من هالعين قبل هالعين حتى امس الاثنين غاب عن الدوام علشان يمسك بنتي و انام لانها تعبانة و صار لي فترة ما نمت زين


ادري هالطريقة ممكن ما تنفع مع كل الرجال بس تجربة استفدت منها كثير و حبيت الكل يستفيد


الحمدلله .. الحمدلله .. الحمدلله
اللهم لك الحمد حتى ترضى و لك الحمد اذا رضيت و لك الحمد على كل حال ❤️