يوجد تعديل ورد على الاستفسارات
خلصت 3 مشاركات :( وحبيت ارد عالاسئلة بآخر الموضوع
جبتلكم طريقة المنسف الاردني بالجميد وطبعا بدون اي اضافات مثل "لبن ونشا " وسهل جدا جدا جدا والطعم بجننن متل مطعم القدس بالاردن اذا بتعرفوه ومطعم جبري
طبعا اللي بيجي عالاردن وما باكل منسف كانو ما اجا
الاكلة الشعبية الاردنية واكلة المناسبات والعزايم والضيافة وحتى بعيد عنكم الاتراح
المقادير لاربع اشخاص
علبة جميد الكسيح وطبعا هالجميد نفس طعم احجار الجميد الاصلية
عنا بالامارات موجود بجمعيات ابو ظبي والمحمصة اللبنانية
صبايا ياريت اللي بعرفو وين كمان بنباع جميد الكسيح يخبرونا سواء بالامارات او خارجها لاني جديدة عالبلد وحابة اعرف كل الاماكن ولحتى كل الصبايا يستفيدو
حبتين بصل حجم كبير مقطعة شرايح
هيل مطحون
ورق غار
2-3 كاسة رز مصري بتنتقع بماء مغلي
كركم للون الارز
معلقة طعام سمنة
بقدونس ولوز وصنوبر للتزيين
وطبعا لحم حسب الرغبة بس قطع لحمة كبيرة الحجم
الطريقة السهلة
اللحمة
بعد غسل الللحمة منسلقها وبعد متغلي منقشط الزفرة البيضا ومنضع البصل وورق الغار وهيل مطحون ومنغطي الطنجرة لحد متستوي اللحمة طبعا بدون ملح لانو الجميد مااالح
الجميد
منحضر علبة الجميد طبعا منخضها خض منيح وبعدين منسكبها بطنجرة ومنضل نحرك لحتى تغلي "انتبهو لا تتركو لازم تحرك مستمر بلاش يفرط"
بس يغلي الجميد نضع مصفاي ونسكب ماء اللحمة القليل منها فقط ونحرك حتى يغلو
نستمر على هذه الطريقة حتى نصل للكثافة المطلوبة " في ناس بحبوه خفيف وناس تقيل يعني حسب الرغبة "
منضع قطع اللحمة فوق الجميد ومنتركها تغلي على نار هادئة لمدة 5- 7 دقائق
قبل اطفاء النار منضع ملعقة سمنة لثواني ثم نطفيء الغاز
الارز
سلق بماء عادي زيت بالطنجرة و2 ملعقة صغيرة ملح نضع الارز ونرش عليه كركم ثم نضع ماء مغلي وقبل مينشف الماء نضعه على نار هادئة
نضع الارز على السدر وفوقه قطع اللحمة واخر اشي التزيين من بقدونس ولوز و صنوبر
مدة التحضير كاملة
ساعتين لساعتين ونصف بس مريحة طبعا فيكم تعملو الارز من قبل
ووقت الطبخ هو سلق اللحمة يعني ما في تعب
الطريقة مجهودي وللامانة الصور من النت وان شاءالله باقرب وقت بعملها بالخطوات المصورة وبعدل عليها "المفروض اخر الاسبوع "
وبالصحة والعافية
واي سؤال انا حااضرة
تسلمووووو حبيباتي على التعلقات الروعة كلكم ذوووووووق:33:
اسئلة حوائيات
الاخت العزيزة ام خليفة
لا شكر على واجب اختي
الارز بتسلقيه بماء عادي وملح وكركم للون وزيت او سمنة فقط ,,, حطي شوية زيت او سمنة بالطنجرة ومعلقة ملح صغيرة لكل كاسة رز واسكبي الرز بعد نقعه وغسله ورشي عليه كركم وحركي منيح بعدين حطي ماء وخليه يغلي لحد ميشرب الماء وطي النار تحتو وفيكي تعملي رز بالكمية اللي بدك اياها
اما مرقة اللحمة فهي للجميد
والعلبة اللي بالصورة بتكفي 3-4 اشخاص فقط "حجم العلبة الموجودة في كل الجمعيات" استخدميها كاملة "بتلاقي فيها علبتين صغار خضيهم منيح واسكبيهم بالطنجرة مع التحريك المستمر" مقابل 3 كاسات وانا بصراحة لحالي مع زوجي بعمل هالطبخة على يومين مناكل منها العلبة كاملة وبعمل كاستين -كاستين ونص رز
يعني لو عندك عزومة او عدد اكتر جيبي اكتر من وحدة
الخبز اللي منضعه بقاع السدر هو خبز شراك
صوره من النت
وانا عروس جديدة واجيت عالامارات ما بعرف وين بنباع هالخبز لو عرفتي خبريني
بتحطيه عالسدر وبتسكبي فوقه شويه جميد بعدين حطي الرز واخر اشي الللحمة والمكسرات
وطبعا الجميد بزبدية لحالو
اعملي نفس الخطوات بدوووووووووووووون اي اضافة وان شاء الله بطلع روعة معك وخبرينااا