طريقة تساعدك على صلاة الفجر في وقتها .. تفضلي

السلام عليكم
كثير منا يعاني من عدم الاستيقاظ على صلاة الفجر ... النيه موجوده .. و كل ما تفوتها تضايق ... و سبحان الله صلاة الفجر تخلي اليوم كله فيه بركه بعد الله .. و حتى الصلوات الاربعه المتبقيه تتعدل. و النفسيه تتعدل.. كل شي سبحان الله يتغير الى الافضل ..
انا كنت اعير المنبه قبل الشروق ب ٤٥ دقيقه .. احط الجوال او المنبه جنبي .. يرن اسكره و ارجع انام ... و كل يوم على هادا الحال ... و اضايق و مرات ابكي ... نفسي اصليها في وقتها .. يعني و بعدين فيني .. قلت لازم الاقي لي حل ... الله يطول باعمارنا بس ما فيه حد ضامن عمره .. و صلاة الفجر احبها كثيرا و كنت اغبط الملتزمين عليها و نفسي اصير منهم ... الين ما قلت لنفسي ليه ما ابعد المنبه ... و بكدا اجبر نفسي اقوم و امشي فخلاص اصحصح ... جبت طاوله صغيره و حطيتها جنب دورة المياه اكرمكم الله و حطيت المنبه عليها .. هادي الطريقه ساعدتني كتير خلاص انا تحت الامر الواقع و قمت ايش بقى ... . و اذا حمامك بعيد عن الغرفه .. حطي المنبه عند باب الغرفه .. المهم تبعديه عنك ... حتقولي نومي ثقيل و ما اصحى حطي نغمه قويه و على اعلى صوت ...
الله يثبتنا على الصلوات و يعيننا
دمتن بخير