طريقة تقسيم المهر 🌸

مساء الخير حبيباتي بما ان احنا حالياً في موسم أعراض و وايد أشوف بنات يسالون شلون أقسم مهري بكتب لج طريقه سهله وبسيطه 💜

الخطوة الأولى دائماً هي كتابة ماتحتاجينه من أغراض للتجهيز بالتفصيل وحسب الأولوية ضمن دفتر خاص وهذا الشي سيفيدك ليس فقط في تقسيم المهر والتجهيز وانما في كل حياتك فيما بعد لأن الموضوع سيتكرر بالنسبة لمصروف البيت والأولاد ان شالله بعد الزواج .

جهزي قائمة بالأشياء الأساسية والضرورية التي تحتاجينها وما يصير جهاز العروس من دونها ، وقائمة ثانية بالكماليات والأشياء الي من الممكن الاستغناء عنها في حال لم تكفي الميزانية .

كل شيء تحتاجينه سجليه حتى لو حسيتي انه مو ضروري يتسجل، لأنه هي القائمة حتكون مرجعك الرئيسي لكل لوازمك وحاجياتك الي لازم تشتريها حتى لا تنسي ولا تتوتري وانت تحاولي فيما بعد تتذكري الاشياء الي ما اشتريتها والي اشتريتها وتخلطي بين الضروري والأشياء الكمالية، هيك بتبقي منظمة وأفكارك مرتبة .

الذهب 🌸

طبعاً لازم تشترين ذهب أول شي لانه يكون لج سند وذخرر وعون اذا احتجتي شي بكره 💜

استكشفي السوق🌸

نزلي على السوق جولة استكشافية ، تعرفي فيها على الأسعار بالعموم،المحلات والأماكن الي ممكن تشوفي عندهم اشياء تناسب العرايس هل شي راح يساعدج تحددين المبالغ بشكل تقريبي لكل تفصيل من اغراض التجهيز و حيسهل عليج بوقت النزلة الحقيقية انج تروحين فوراً للمكان المناسب وتوفرين الوقت والجهد.

أيضاً بهذه النزلة ألقي نظرة على فساتين الزفاف وفساتين السهرة، حتى يكون عندج تصور عن تصاميم فساتين الزفاف الحديثة والأسعار اللي بتقابل هي التصاميم.

سجلي كافة مشترياتك🌸

سجلي كل شيء تشترينه وحاولي تجمعي الفواتير عشان ما تنسين الأسعار حتى أصغر الأشياء سجلي كم دفعتي سعرها لأنه هي الأشياء الصغيرة تتجمع وببتطلع بالأخر مبالغ كبيرة وانتي ماحسيتي فيها.

بعد كل جولة بالسوق ارجعي سجلي كل التجهيزات اللي جبتيها أول بأول واشطبي من القائمة الأساسية الأغراض الي اشترتيها وموجودة بالقائمة، هالشي بساعدج تحسين بالإنجاز انج قضيتي جزء من مهامج وبخفف من توترج.

تابعي العروضات والتنزيلات🌸

استغلي وقت الرخص والعروض الخاصة بالعرايس، وكثفي نزلات السوق بهالأوقات، لتستفيدي من التنزيلات الي بتعملها المحلات الكبيرة والماركات، غالب الأوقات بتكون مفيدة وبتقدرين تاخدين قطع مميزة بأسعار مقبولة وأحياناً بنصف السعر.

شوفي أسواق الذهب الرخيصة مثل سوق الذهب واللي بيكون فيها موديلات وتصاميم متنوعة وأسعارها معقولة جداً بتناسبج لو كان مهرج قليل.

وحاولي نزلات السوق تكون متخصصة لقسم معين من الدبش، كل مرة شيء معيّن مرة فستان الزفاف مرة مكياج مرة بيجامات وهكذا، وأقول حاولي لأني اعرف نحن البنات نحب نشوف كل شيء بالمحلات ويلفت نظرنا غالباً الاشياء الي لانريدها الأن، وكل الأغراض الي تكون مو لازمتنا الحين منلاقيها أمامنا :)

استفيدي من أغراضك القديمة 🌸

كلنا كبنات نهتهم من سن صغير بلبسنا ومكياجنا وعندنا خزينة لا بأس بها فمو كل شيء قديم نقطه في الزباله ، بالعكس حاولي تستفيدين منها وتقاطعيها مع الأشياء الي لازمتج حتى ماتكررين أشياء عندج ياها بالأساس.

وبإمكانج بإعادة تنسيق قطعة قديمة عندج مع شي جديد تغيرها كلياً وتعطيج لوك مختلف تماماً عن الي تعودتي عليه فيها!

اتركي الحقائب والأحذية للآخر🌸

اتركي الشوز والحقائب والاكسسورات اخر مرحلة في التجهيز، بعد ماتشتري الملابس والفساتين بتقدرين تعرفين بسهولة شو هي الألوان الي لازمتج انه تجيبيها وتليق بالثياب الجديدة وما تشترين شي ما تستفيدين منه.

لا تشترين متفرقات لا تليق ببعضها🌸

لا تشتري قطع متفرقة وتقولي " يلا بعدين ببحث عن شي يليق بها " يعني تشترين تنورة او بلوز وماتعرفين مسبقاً ولو حتى بخيالج شو ممكن يليق عليه من خزانتج او من الثياب الجديدة الي اشتريتها، حاولي تنسيق القطع مع بعضها حتى ما تتراكم عندج ألوان لا تليق على بعضها وما تنلبس بالنهاية وتكوني ضيعتي عليها من ميزانتيج!



لا تكثري الشراء من الماركات🌸

لا تاخدي كل ثيابج من الماركات الغالية والاسعار المبالغ بها، حددي فقط الأشياء الأساسية

و بالطبع أدوات التجميل والميكب من الضروري إنو تكون من ماركات المكياج العالمية والنوعيات اللي متعودة بشرتج عليها عشان ما تسببلج أية تحسس.

لا تكثري من فساتين السهرة🌸

مافي داعي تشترين فساتين سهرة كثيرة، فمن المعروف انه شكل جسم العروس بيتغير بسرعة خاصةً إذا صار حمل بإذن الله كل شكل الجسم بيتغير وبتفقدين كل فساتينج وبتحزنين عليها انه ماقدرتي تلبسيها، عشان جي كوني حكيمة واختاري فستانين او ثلاثه منوعين بالقصات والألوان وبخامة راقية وأي مناسبة طارئة بعد الزواج ممكن تنزلين السوق وتشترين !



اعتني بنفسج وجمالج🌸

شخصياً بنصحج انه المبلغ الأكبر من المهر تخلينه للاعتناء بنفسج لأنه في كثير من التفاصيل وانواع العناية ممكن ماتقدرين تعملينها فيما بعد، إضافة إلى ان العروس لازم تكون عروس بكل تفاصيلها وهذا هو الوقت المناسب لتعتني بنفسج بأقصى درجة وتوصلي لزوجج بكامل جمالج ورونقج . وبذكر من تفاصيل العناية ( تبيض الأسنان – الليزر – البشرة والشعر .. )


لا تكثري من شراء العطور🌸

اعرف اكيد انها نقطة ضعفنا كبنات ومامنستغني عنها لكن حاولي انك ماتكثرين منها لأن حتستقبلي العطور كهدايا كثيراً بعد الزواج .

فالكثير من صديقاتج عند التفكير بهدايا العروس فوراً رح يخطر بباللهم العطور والأكيد ان وايد منهم يعرفون عطرج المفضل ورح يجيبولج يا هدية ف لا تخافين ولا تجمعين الكثير من العطور.

ايضاً العطر هو من الأغراض اللي دائماً احنا البنات نحب نروح ونشتريها بكل الأوقات، فلما يخلص العطر أو البخور من عندج رح تجيبي غيره بسهولة.

لا تجربي أشياء جديدة بجهازك🌸

لا تلجأي لمستحضرات أو أدوات تسخدمينها لأول مرة او ماتعرفين عنها أي شيء من قبل، سواء في المكياجات أو أدوات العناية بالشعر السيشوار او السراميك حتى في أبسط الأمور اعتمدي على الأشياء الي متعودة عليها او حدا ثقة نصحج فيها لأن أبداً مو هذا هو الوقت المناسب للتجريب والاختبار!

حتى فيما يخص حجوزات مشاغل التجميل او قاعات الزواج شوفي كل شيء بعينج وتأكدي من الأسعار قبل ما تتورطين وتدفعين !



استثمري في مهرج🌸

إذا كان مبلغ المال الخاص بمهرج كبير ويكفي لشراء كافة تجهيزاتك ويزيد، فكري في استثمار مبلغ صغير من المهر في مشروع صغير او شراء أسهم في بنوك اسلامية هذا الشي ممكن يفيدج فيما بعد بتأمين مدخول مستقل وأرباح صافية، وأكيد رح يعطي فكرة لزوجك انج شخص عقلاني وتعرفي كيف تديرين مصروفج بأحسن طريقة.



خصصي جزء للصدقة🌸

خلّي دايماً للصدقة جزء خاص من مهرج لعل رب العالمين يطرح فيه البركة والوفرة ويسهلج أمورج ـ وبتكون ان شالله فاتحة لطريق سعيد ومبارك في حياتج الجديدة .



ابتعدي عن التوتر

لا تتوترين وتتعبين أعصابج بالتفكير كل هذه الأشياء حتأثر ع بشرتج وجسمج تأثيرات سلبية، تنظيم أمورج من البداية راح يخليج مرتاحة ومسيطرة على المصاريف وعارفة كل خطوة بتخطينها تماماً ، خذي نفس عميق وريحي أعصابج امسكي ورقة وقلم وتابعي نصائحي وان شالله بتكون رحلة تجهيز ممتعة وسهلة :)💜💜💜

ولا تبخلون علي بدعووه اذا استفدتوا منييي ان ربي يرزقني التوأم الاولاد يارب ويرزق كل محرومه💜💜💜💜🌸