طريقة تنظيفي لبيتي كل يوم (موضوع قديم)

السلام عليكم ورحمة الله وبركاته
اخواتي عالم حواء استفدت منكن الكثير في جميع الاقسام وحبيت اني اشارككن في طريقة تنظيف بيتي العادية
بس يمكن احد يستفيد ولا تنسوني من دعواتكم
اولا السيراميك : اول شي اكنسي الموكيت ونظفيه بالفرشاة القوية بتشيل كل الشعر والخيوط الي لازقه فيها
ورطبي الفرشاة بشوي مويه وكمفورت بتلاحظين ان الموكيت كانه جديد واذا عندك موكيت الي شعره طويل
الي يسمونها المكرونة هذا بتطلع منه بلاوي بس لازم تنفضينه نفض وتقلبينه والله ان تطلع عيونك من كثر الي بيطلع منها كل يوم اسوي هالحركة وكانه له شهر ماكنست بعدين جيبي فوطة صغيرة ورطبيه بالمويه وكمفورت نفس الموكيت العادي وادعكي فيها بتنظف والشعر بينتفش وكانك تو ماشريتيها ولاتستخدمين الفرشاة ابد ماتصلح لها بعدين اطوي كل الموكيتات وابدي بكنس السيراميك بالمكنسة يدوية او الكهربائية وانا افضل اليدويه والحين تلميع
السيراميك:
حطي موية وجل العملاق وكلوركس وابدي نظفي بالمكنسة وافركي السيراميك فرك
بتلاحظين حتى حواف او اطراف السيراميك نظفت -انا مااستخدم الصابون في تنظيف السيراميك احسه مايروح عن السيراميك واذا ابتل السيراميك مرة ثانية تحسيه يزلق
عشان كذا استخدم جل ومويه واحيانا اظيف كلوركس ونشفي الارضيه بالمساحة او فوطه
وبعدين جيبي فوطة نظيفه ومتينة وبليها مويه وامسحي وفوطة ثانيه ناشفة ونشفي وشوفي الارضيه
تلمع وتشوفين صورتك فيها وعلى طول
بخري البيت بمعمول الدوسري الاصلي ورشي على الكنب والفرشات والستاير معطر جو عشان تثبت الريحة والله ان تقعد الريحة لحد بكرة لان السيراميك يكون فيه رطوبة وبكذا يجذب الريحة
ثانيا الحمامات وانتم بكرامة
اول شي بفلاش(الافضل مرة بالاسبوع لان ريحته تعج بالبيت وهو للتنظيف الوسخ القوي اما اذا كنتي كل يوم تغسلين الحمام مايحتاج كل يوم فلاش ) والارضيه ناشفة تمام عن المويه واتركيه فترة وارجعي بللي الحمام بصابون وجل وكلوركس (ملاحظة الكلوركس والفلاش لايجتمعن بنفس اليوم خطير ريحة قوية جدا ومضر لك انتي اذا استنشقتيه انا مرة بغيت اموت مع انه مو سوا بس ورى بعض وصابني ضيق تنفس الله يبعد الشر عنكم ) وافركيه
ولا تنسين الجدران نظفيها بمويه وجل العملاق رهيب يعطي لمعة وريحة تطول
ولاتنسين الحمامات المهجورة مثل عندي حمام الرجال نادر ماحد يدخله اصب بالبالوعة مطهر او كلوركس عسان مايطلع ريحة وكذلك التفتيشات الصغيرة
ثالثا المغاسل اليدويه
تنظيف عادي واهم شي تمسيح الديكورات والادوات الي على المغسلة وترتيبها
وكذلك المرايه اغسليها بمويه وصابون ونشفيها بجرايد وشوفي اللمعان
رابعا غرفة النوم
حافظي على الترتيب كل يوم والله ان تفتح نفسك اما اذا جيتي بس رمي الملابس من جهة والاغراض الجديدة من
جهة وكل يوم ابصفف ملابس ويروح اسبوع واسبوعين لحد ماتتراكم عليك الامور ويصعب عليك تنظيفها
ولا يجيك يوم من السناعة وتفضين الدواليب وترتبين من جديد والله ان يروح اليوم وانتي ميته من التعب :09:
فالافضل والاريح من البداية وعلى مهلنا
انا اول مااصحى على طول ارتب السرير وارتب بعض الحاجات المكركبة واخذ دش واصلي وعلى طول على دوامي
واذا رجعت ارجع كل حاجة بمكانه حتى لو اني تعبانة
وبعد انا كانت عقدتي الجزمات الله يكرمكم مدري وين احطها بيتي صغير واجار وفكرت بفكره وهي
جبت صندوق كبير زي السطل لكنه من الخصف ولونه بني غامق وملبس بابيض ومعه غطاء وجمعت فيه كل الجزم
وحطيته بركن اخر الغرفه والله اني ارتحت كانت جزماتي مفرقعات الي تحت السرير والي جزمة بدرج والثانية بدرج ثاني وفكرت اشتري دولاب الجزم بس ماله مكان ابد وقلت مافيه الا هالصندوق
وكذلك الكومدينة (التسريحة )
شلت كل الي عليها من عطورات وكريمات واكسسوارت وفرش شعر ورتبتهن بالادراج الي تحت
وجبت مفرش الخفيف المطرز بعض الناس تحطه على طاولات انا حطيته وخليت طرفه متدلي وطرف ملموم مع بعض
وحطيت بعض العطورات الفخمة عطرين يكفي وتحف وصندوق صغير عشان يمسكة طلع منظر خيال ويفتح النفس
وشريت درج صغير مكون من ثلاثة ادراج حطيت جميع ادوات التجميل الي على شكل قلم برف
ورف لجميع الشباصات والبنس
ورف للارواج الي حجمها مثل بعض والباقي من الاغراض صففتها في الرفوف الاخرى
خامسا المطبخ
كلنا نعرف وتعلمنا من امهاتنا ماننام الا وحنا تاركين المطبخ يلمع او بدون مواعين وسخة
اهم شي ماتجمعين المواعين لفترة عشان مايتراكم عليك الشغل
وحاولي اواني الخاصة بالضيوف تكون نظيفة وملمعة وجاهزة للاستخدام عشان ماترتبكين اذا جاك احد فجأة شيكي عليها من فترة لفترة
وحاولي انك ماتستخدميها الا للضيوف
وبالنسبة للزبايل تكرمون تجمع وتكب يوميا او بعد يومين والافضل يومي اذا كنتي راعية طبخ وشغل وانتبهي اذا كبيتي قطعة لحمة او عظمة او حتى شحم نيئ وتركتيه للبكرة الله يعينك على الريحة والعفن الي بيطلع احسن شي لايبيت عندك
اذا كان عندك طعام زايد وماودك تكبيه حاولي تكيسيه وتفرزنينه (بالفريزر) واذا تجمع وانتم طالعين كشته او مزرعة تطلعونه بالبر عشان تاكل منه الطيور والقطط
لتنظيف الفرن فيه صابون خاص يلمعه ويزيل الدهون موجود بالسوبرماركات ومنه انواع كثيرة
واذا كنتي عجازة قصدريه بالقصدير واذا توسخ شيليه وحطي غيره
مع اني احسه مو حلو ولا ذوق للفرن يشوهه
وانتبهي وانتي تقصدرين الفرن لا يطيح قصاصة من قصاصات القصدير داخل الفرن لانه يعدمه لك
فوط المطبخ خصصي وحدة للفرن ووحدة للارضية
ووحدة لتجفيف الاواني
واهم شي فوطة خاصة للكاسات والفناجيل والاكواب فقط واذا ماعندك الافضل مناديل الرول
وبس هذا الي اذكره واذا تذكرت شي مهم رجعت لكم
ادري اني ماني سنعة فيه بنات كثير بالمنتدى اسنع مني بس حبيت
اقولكم كيف طريقة تنظيفي واكيد كل وحدة لها طريقتها الخاصة
بس هذي من باب تجاذب الافكار والطرق الاريح والاسهل
ادعولي ان الله يتمم علي حملي ويرزقني بالولد الصالح السليم المعافى
واي وحدة عندها اضافات اسهل او احسن تنورنا هنا
:26::26::26: ولكم احلى باقة ورد :26::26::26: