صبـاحكم خير حبيباتي حوامل عالم حواء
بما أني على وشك ولادة وجهزت أغراض النفاس ومن ضمنها تمرة النفــاس
جدتي الله يحفظها يارب بحملي الأول سوتها لي وعطتني أياها
بس حملي هذا أخذت منها الطريقه والمقادير وسويتها أنا وحبيت أفيد كل وحده
حابه تعرف طريقتها
يمكن تختلف طريقة جدتي عن طرق بعض البنات لكن هذا لايفسد للود قضيه :icon18:
وكلها نفس المفعول بإذن الله
بنفاسي الأول كانت أمي الله يخليها لي تجيبها لي الصباح مع حليب ومرات مع قهوة النفاس
مافي عدد معين كنت أكل من هالكور اللي أقدر عليه وكل يوم على هالحال لحد ماتخلص
نبدأ بالطريقه مع الصور
بسم الله
هذي المقادير عباره عن تمر معجون الجاهز أحنا نسميه ( عبيط ) + زبده + رشاد
نطحن الرشاد والكميه قليله زي منتوا شايفين تقريبا شريت ب5 ريال يمكن أقل من ربع كيلو
ونذوب الزبده
ونقسم التمر ناخذ نص بس يكفينا نصه
ونحط فوقه الرشاد المطحون
ونصب عليه الزبده شوي شوي
ونبدأ نعجن ونعجن لحد مايتماسك مثل ماهو بالصوره
وبعدين نكورها كور صغار يطلع شكلها حلو وتفتح النفس للأكل وكل يوم تاكلين تقريبا 7 حبات أو 6 اللي تقدرين
عليه وتطلع بهذا الشكل
هذا شكلها النهائي حطيتها بعلبه وغطيتها وحطيتها بالفريزر وخليها بالفريزر كل يوم طلعي كم حبه وسخنيها
بالمايكرويف
وبس بالهناء والعافيه
مابي منكم الا دعوه بتسهيل ولادتي وأولد طبيعي يارب
بس وش فايدتها يالغاليه؟؟