في طلبات لشرح الرسمة اللي رسمتها على اليدار
والالوان اللي استخدمتها
اولا بتفلسف شوي
اول شي لازم تكون عندج الثقة في النفس على اي عمل تبين تنجزينه
يمكن مايكون حلو بس خلال عرضج شغلج للناس بتحصلين ارشادات
ودعم من ذوي الخبرة
كان من الناس اللي حوالج او من المنتدى
بس لاتستهينين بأي شغل تسوينه
يمكن تحصلين انتقاد وانتقاد كبير يفجر الواحد
بس اصبري لان في وايد حساد واصحاب النفوس التعبانة يمكن شغلج عايبنهم ويبون يوصلون لمستواج
بس مايقدرون
====
وفي ناس يكبتون مشاعرهم او محبطين
لو شافو شي حلو يسكتون
او مثل زوجي العزيز إما يقول مش بطال ... يمشي الحال ... او يسكت .. خربتي الشكل
يكون عايبنه الشي بس مايحب يقول شي
===
وفي ناس لو شي بسيط بس ماشاء الله كلامهم كله تشجيع
وفي ذكر الله
==
فأتمنى خواتي اي وحدة في اي مكان شافت منظر طبيعي حلو ... بيت ..سيارة عروسة ..طفل ... اي شي عيبها في هذي الدنيا تذكر الله
وتقول ماشاء الله لاقوة الا بالله
لان العين حق
والانسان يمكن يحسد نفسه حتى
ومثل ماقال رسول الله صلى الله عليه وسلم في العين (تورد البعير القدر وتورد الرجل القبر )
لاتصيرون شرات الفلبينيات والاندونوسيات
اذا شافوا ياهل متين ولا ياكل
(( هادا ياكل كتير )) (( هادا دوبة )) ولا فري بيوتفول فري ناس فري فات ))
احنا الحمدلله مسلمين لازم ذكر الله يكون على لسانا دايما
ماشاء لا قوة الا بالله في عضوات يحطون صور لبيوتهم وحماماتهم
فالحمام ماشاء الله روحه فلة ... الوحدة تتعب وتصور وتنزل الصور
الله يعلم شكثر من الوقت تاخذ فتدعيلها بدعوة طيبة
ترا الدعوة ترد على صاحبها كانت في خير ولا شر
فاذكروا الله
انا بنفسي صارت لي مواقف مع ناس
مرة كنت مسوية اشغال يدوية وانا وحدة مولعة بهذي السوالف
وعرضتها في روضة بنتي
المدرسات تيمعوا عشان يشوفون الاشغال
من الكلام اللي قالوه (( كيف سويتي هذا وكيف يتلج هذي الفكرة وكله باندهاش
ووين عندج وقت وانت عندج عيال (( زين فكروا انتوا في داومتكم الصبح تشتغلون انا في بيتي اشتغل عادي )) ولا وحدة ذكرت الله
لدرجة إني رديت البيت تعبانة
واكثر من سنة ما قادرة اسوي شي
=====
واقولكم الموقف اللي قريب وايد صارلي
امس في الفجر
نازلة اقوم عيالي ولا زوجي يصرخ يناديني
قلت اكيد صاير شي
لمن رحت فوق اشوف ماد ايده والدم يصب في الصالة بطريقة فضيعة
يالي صداع ويتلي دوخة
الصالة جدام الحمام الحمام الزبالة منظر فضيع
يقول بغيت افتح الحنفية اتوضا ضربت ايدي بعلبة الصابون انكسرت ويرحت ايدي
بعد جهد وقفنا الدم وحطيت له لصق
قريب الظهر كان متسدح على السرير
قالي بصوت خفيف ترا ملابسي والسرير توصخوا بالدم تمت ايده بعد تنزف
فراح المستشفى تخيلوا احتاجت ايده حق خياطة
=====
واعرف ناس اصابو ا بحالات نفسية من الحسد وللحين قاعدين يتعالجون
خواتي الله يرضى عليكم خلوا ذكر الله دايم على لسانكم
وعليكم بالرقية على انفسكم
وما اريد حد يزعل او ياخذ بخاطره مني
احنا في زمن كثرت فيه العلل والامراض .... وهذا تراه من ايدينا واعمالنا وبعدنا عن الله
انا عندي الرسم هواية ومش دارسة الرسم
نبدأ بالدرس
آسفة لاني ما صورت خطوات العمل كلها
اللي تخاف ترسم على اليدار ترسم على لوح خشبي كبداية
اول شي انا احتجت للرسم
1 صبغ ذهبي ( بويه) موجود عند محلات الصبغ او الادوات الصحية
2 عدد 3 فرش ... 2 سطحم مستوي وحدة كبيرة بسمك اصبعين
ووحدة متوسطة بعرض الظفر
ووحدة صغيرة ناعمة لتعديل اطراف الاغصان ورسم الوروود
3 الوان اكريليك انابيب هذي الوان حلوة وخفيفة سهلة للرسم على الجدار
ويمكن تخفف بالماي موجودة في اغلب المكتبات
(( يمكن استبدال جميع الالوان بالوان زيته او الصبغ الزيتي او المائي ))
كل شي يمشي
يمكن استخدام قلم رصاص لعمل الرسمة
او للتسهيل
اذا احتجت لرسم شجرة كبيرة الى السقف فلازم درج ( سلم ) للاماكن المرتفعة
الرسمة على برنامج رسم سويتها للتوضيح
1 نرسم خطين بشكل طولي متعرج لجذع الشجرة الطول اللي تبينه بالفرشاة المتوسطة وباللون الذهبي او اي لون تحبينه
2 ندهن الجزء الداخلي للجذع
3 نبدا نرسم الفروع او اغصان الشجرة بعد بشكل متعرج
طبعا بتكون سميكة في البداية ورفيعة في النهاية
4 نبدي نكمل باقي الفروع وبطريقة متشابكة ومتداخلة
بعد ماخلصنا رسم الجذع والفروع
تابعينا
للتسهيل والسرعة انا استخدمت لون برتقالي
خلصنا من الدوائر ناخذ لون غامج انا استخدمت لون عنابي
تبدين ترسمين على الدائرة شكل اقواس بهذي الطريقة بالفرشاة الضعيفة
وتكملين الاقواس على طرف الدوائر ووسطها بشكل عشوائي
بهذي الطريقة
مامبينة الوردة عدل من فلاش الكاميرا
شوي شوي تخلصين كل الووروود
تبدين بالفرشاة الضعيفة ترسمين الاوراق وباللون الاخضر
1 من طرف الغصن ترسمين قوس فوق وقوس تحت كانج ترسمين عين
بعد مخلصتي الاقواس
2 تملينه كامل
اهني خلصنا الشجرة كلها
اتمنى ان الدرس يكون سهل
ومفهوم
اذا استخدمتي الصبغ الزيتي لازم تستخدمين التنر
لتخفيف اللون وتنظيف الفرشاة
يمكن استخدام اكثر من لون في عمل الوردة وعلى فرشاة وحدة
يطلع الشكل احلى
حتى اوراق الشجر استخدام اخضر فاتح وغامج او اصفر
ودمتم سالمين يا احلى خوات اتريا شغلكم
والسموحة