الله يجزاها خير ليال ويجعل كل ماكتبت في ميزان حسناتها

بنات بالنسبه للحمض وبيكربونات الصوديوم تشترونه يا من المواد والمسلتزمات الطبيه (بعض المحلات توفره ) على شارع الضباب في الرياض أو صيدليات الي تبيع خلطات مثل ادمه وديرما (بيبعونه عليك أغلى من المحلات بس اذا محتاجه كميه بسيطه أيسر لك تاخذي من عندهم ) أو اذا تبين تشترين كميات كبيره (جمله) ممكن تاخذيها من الشركات مثل شركه تسويق الدواء أو شركة كيالي تتصلين عليهم في البدايه تتأكدين ان المواد الي محتاجتها موجوده عندهم وتسألين عن سعرها ثم ترسلين سواقك او اخوك لمستودعهم (رجال ) يستلمها

تحمست اجربه يسلمو ياعسل

الله يعطيك العافيه ويجزاك خير ...
انتي شمعة المنتدى مواضيعك بقسم البشره فوق الخيال
ردودك وافادتك بحسب خبرتك لغيرك بقسم الحياة الاجتماعيه ،
لما اشوف ردك احسك انسانه حكيمه تبارك لله

وبسالك عن التشققات البيضا معاناتي
لانها طالعه بذراعي مكان الابره �� ان شالله فهمتي قصدي
ومره معقدتني ينفع لها التقشير وكيف يكون ؟؟
عندي بعد بالفخذ
اللي بذراعي اخف من فخذي
وبعد الركب والاكواع كنت بروح عياده اعمل جلسات تقشير لانو صراحه بعض الكريمات ماتجيب نتيجه
فلما اقشرهم وض استخدم بعدها كتفتيح
وياليت تتكلمين عن سمار الشفايف

وتكفييييييين طلبتك لاتحرمينا من مواضيعك لانها مفيده والله اني افرح لما اشوفك منزله موضوع
بهالقسم لاني احب اهتم بنفسي وانتي تجيبين شي مفيد وطبي

هل حمض الفواكه موجود في الصيدليه وشن اسمه؟؟

الله يسعدك ويوفقك, الادارة رفعت الرد فوق حتى يشوفوه البنات الي مابعد شافوا الموضوع
<<< ادعوا لها الله يسعدها على سعيها لاجل تعرفون الاجابة



الله يسلمك, بشرينا اذا جربت ونتايجك :icon18:



بعد عيني الله يجبر بخاطرك, اخجلتيني بطيبة قلبك :35:

شوفي التشققات ماظن فيه احد جرب انواع مختلفه عشان يشوف لهم حل كثري :22: ... ولا شيء نفع معها غير شغلة واحدة, وهالشغلة انا "ما انصح فيها" ....

انا جربت حمض ثاني, مو الحمض الي اتكلم عنه هنا (الحمض الي هنا تأثيرة فقط على الطبقة العليا من البشرة, خفيف ولطيف)... اما الحمض الثاني تأثيرة على الطبقة العليا والثانية (التشققات غالبا مصدرها الطبقة الثالثة الي مو اي حمض يوصل لها), يعني الي عندها حفر بوجهها مثلا بتستفيد من الثاني اكثر... والشهادة لله انه فادني بشكل التشققات وصاروا اصغر شكلهم وخفاف واااجد... "ولــــــكـــــــن" لاني سمراء سبب لي تصبغات معه (لاجل كذا ماقدر انصح اي واحدة فيه لاني عارفة بعض البنات الله يهديهم بتطب على طول لهالنوعية لانه اقوى من غير ماتحسب تبعات الموضوع ومابي دعاوي علي!!)... انا كنت عارفة بموضوع التصبغات لاني قريت واجد عنه, بس كانت ومازالت قناعاتي ان السمار الزايد اهن عندي من التشققات... ومازالت التصبغات موجودة اعالجهم بالتقشير المستمر (لانه زي ماذكرت هنا يحفز البشرة على التجديد حتى تطلع خلايا جديده بلوني العادي)

مدة علاجي للتشققات كانت تقريبا 12 شهر... كنت كل 6 اسابيع اسوي جلسة... يعني تقريبا حول الـ 8 جلسات... التشققات باقي موجودة لكن شكلها خفيف مرة وماعادت تغثني مثل اول...

السؤال المهم, هل انصحك فيه... لا ما انصح لان السمار والتصبغات الي جاتني منه باقية لي سنتين اعالج منه.... مو كل الناس بتجيهم تصبغات, لكن احنا العرب غالبا نميل للصفرة وعندنا ميلانين واجد... على عكس الناس الي بشرتهم حمراء
فأنت ادرى بنفسك, هل بالعادة اذا انجرحت يبقى اثر سمار في المنطقة كم شهر قبل يروح؟ اذا نعم ما انصحك تفكري بالي انا سويته

الحمض الي انا مابي اذكر اسمه جدولة يختلف عن الجدول الي انا حاظته فوق... الجدول الي فوق فقط لحمض الجلايكولك

الركب والاكواع مشكلتهم تراكم الجلد الميت والجفاف... اذا قدرت تحافظي على التقشير المستمر (الخفيف بنسب منخفضة)... والترطيب المستمر + ماتلبسين بناطيل لونها غامق وضيق تحتك بالركبة... بتقدري تحافظي على لون فاتح... انا صراحة مو جايبة خبر لركبتي مع انها اخت الفحمة :D ... لكن سبق واعتنيت فيها وتعدل لونها.... فيه مناطق بالركبة حساسة جدا لازم مايجي حولها الحمض حتى ماتتهيج وتقلب اسمر من قبل
ما انصح باي شيء يفتح غير فيتامين سي وب3 ... الشغلات الثانية اولا خطيرة وثانيا لما تتركينها ممكن تلاقين نفسك اسمر من اول... فالافضل تجنب هالشغلات...

سمار الشفايف ولا مرة عالجته باي شيء, وعادي مو مضايقني لاني اصلا سمرا وطبيعي يكون لونهم اسمر...



هو حمض الجلايكولك الي انا كتبت عنه هنا
وبخصوص الصيدلية الاخت lelo2009 كتبت رد ياريت تراجعيه عن الصيدليات والمكان الي ممكن تجيبونه منه