% طريقة مرة حلوة نعيش بها في هالدنيا %

السلام عليكم ورحمة الله
كيفكم ياحلوين ?

من فترة مرت علي ظروف صعبة شوي / والحمد لله على كل حال / ومثل ما انتم عارفين المثل اللي يقول : رب ضارة نافعة _
وفعلا تعلمت من هالمحنة شيء حلو خلاني ارتاح وهي فعلا طريقة حلوة تهديء النفس وتبعد وساوس الشيطان اعوذ بالله منه_

مالكم بالطويلة باقول لكم هالطريقة على طول:

عزيزتي ,, اذا مريتي باي موقف‏(‏حزن_فرح_ضيق_هم_فراغ_احد غلط عليك_ احد جرحك_جاك خبر حلو _او سيء_جتك وظيفة _او كل مرة مايطلع رقمك ....الخ‏)‏
في اي لحظة وفي اي موقف تذكري حاجة واحدة فقط : وهي انك في لجنة اختبار وهالموقف اللي جاك هو السؤال اللي في الاختبار ومطلوب منك اجابة وهي بتكون واحدة من حالتين:
يا تجاوبين صح وتاخذين الدرجة وحسن الجزاء,,
يا تجاوبين غلط وتنقص درجتك وماتجتازين الاختبار,,

عرفتوا المعادلة‏?‏

هالدنيا وهالحياة ماهي الا لجنة اختبار كبيرة وتشمل كل شيء في حياتنا وكل المواقف اللي تمر علينا ماهي الا اسئلة الاختبار والحل الصح مهما كانت صعوبة السؤال هو اللي يعكس مدى فهمنا للمنهج والحل الخطا يبين مدى عدم استذكارنا للمنهج وعدم فهمة

بقي نقطة اخيرة ودي اوضحها وهي ان المنهج اللي لابد ان نفهمه ونستذكره ونخليه دايم قريب منا علشان نعرف نجاوب على الاسئلة هو القران الكريم وسنة الحبيب صلى الله عليه وسلم ففيهما اجابات لكل الاسئلة ولله الحمد

خلوني اعطي مثال علشان توضح الصورة اكثر/
مثلا لو احد سبك وغلط عليك وشتمك..وقتها انتي فار دمك ونويتي عليه بس تذكرتي باخر لحظة انك في لجنة اختبار وهذا اللي صار سؤال توجه لك والملائكة تنتظر اجابتك علشان ترفعها لرب العالمين,وقتها راح تتذكري فقرة كظم الغيظ وانه ليس الشديد بالصرعة انما الشديد الذي يملك نفسه عند الغضب فتروحي كاظمة الغيظ وتتعوذي من ابليس ثم تتذكري الاية اللي تقول _ادفع باللتي هي احسن فاذا الذي بينك وبينه عداوة كانه ولي حميم_فتروحي وتعاملي هاللي غلطت عليك بمنتهى العفو وقتها راح تترفع اجابتك انها صح وتاخذي الاجر والثواب وحسن العاقبة من الله
ولو جاوبتي غلط طبعا بيكون العكس,,
معادلة سهلة جدا وواضحة جدا وطريقة فعالة للتغلب على كل الصعوبات

اتمنى تطبقونها وتشوفوا نتيجتها ولا تنسوني من دعوة حلوة بظهر الغيب,,

ملاحظة/
حقوق النشر مفتوحة للكل,,,بلا استثناء‏!‏