السلام عليكم ورحمة الله وبركاته ..
صبآح / مسآء .. الطاعه
بشرى لمحبات القهوة اليوم موضوعي راح يكون عن مقشري الرهيب بالقهوة التركيه و جوز الهند ..
هالمقشر لو امدح فيه مايوفي بحقه طبعا هالطريقة ماخذتها من اجنبيه بس زدت عليها اضافات خلت المقشر اروع ..
طبعا اللي حدني على صنع هالمقشر السبب كان لغلاء المقشرات وبسرعه تخلص وكان اغلبها مايناسبني ويسبب لي حساسيه والا الريحة مو زينه فبحثت بالنت ولقيت هالطريقة اللي ساعدتني ببشرتي التعبانه الجافه والباهته خلى البهتان يخف ويعطي لمعه عجيبة وحييل ساعدني بالسولولايت قضى عليها خلال شهرين..
المكونات /
( قهوة تركيه محموسة عدل وبالكميه الي تناسبج
/ جوز هند مطحون
/زيت جوز الهند الاصلي اللي مكتوب عليه قابل للاكل
/ 4 اقراص فايتمين e /
عسل
/ فانيلا ) طبعا الفانيلا اختياريه لانها بس تعطيج ريحة حلوة ,
والفايتمين ايه يحافظ على المقشر مايخرب لمدة اسبوعين الا ثلاثه ,
الطريقة حطي الكميه مناسبة لاسبوعين من القهوة و ثلاث ملاعق كبار جوز الهند واخلطيه بملعقه خشب واضيفي زيت الجوز الين يتماسك الخليط ويصير قوامه مثل المقشر تقريبا ثلاث ملاعق اكل و عقب اضيفي الفايتمين, والفانيلا بس شوي ملعقه صغيرة مالت الشاي , وملعقتين عسل وجهز مقشركم ويحفظ بعلبة قزاز بمكان جاف ومعتدل الحرارة ..
طبعا الكميات قياسيه يعني تقدرين تكثرين اللي تبينه من المكونات وتقدرين تتحكمين بقوام المقشر ..
الفوائد /
اللي لاحضته الجلد الميت راح والقهوة تقشر من قلب وتقضي على السولولايت و جوز الهند ينعم البشرة ومليان مضادات اكسدة يعني يحمي البشرة من الالتهابات ومفيد للي يعانون من حساسية ضد المقشرات القوية وطبعا الريحة تهبل قهوة على جوز هند شيء عجيب ويفضل يستخدم مرتين بالاسبوع للحصول على النتيجة المضمونه ,
اهم شي الترطيب بعد التقشيير والمقشر مايقعد اكثر من 3 اسابيع لانه احتمال يتاكسد ويخرب ..
جربوه بيعجيكم خصوصا للبشرة الجافه والحساسه ..
اختكم / افتخار
بأمان الله