طريقتي السهله والرخيصه للتخلص من خشونه كعب القدم في غضون ايام

السلام عليكم


لي فتره عن المنتدى بصراحه و في تغييرات كبيره ما شاء الله :icon28:

بالنسبه لموضوعي ((ما اعرف اسوي مقدمات)) مع الشتا ولبس الشبشب المنزلي احس كعب الرجل صار سميك و خشن

ولونه رمادي على بيج

وكل يوم اقول بكره بسويهم بالصالون
بكره
بكره

بس بيوم من الايام اللي ادعي ربي ما تنعاد .. كنت جالسه عالكنب واسولف مع خالاتي وبنات خالاتي ,, اطالع الكعب فيه شي زي الاخدود .. مشقوق وصغير

طبعا دق ناقوس الخطر في داخلي

احس اني مجرمه بحق نفسي .. ليه رجلي توصل لهالمرحله و انا بنت لسه و المفروض اعتني بنفسي مو اقسى على نفسي


سويت بروغرام تطهير + علاجي للقدم

طبعا اول شي بكتب لكم المستلزمات عشان تجيبونها كاااااااااامله

طشت يكون على قد رجلينك ((لا تستخدمي جهاز البادكيور))

مويه دافيه

ملح خشن

ديتول اخضر او بني

صابون سائل ((نقطه))

بلسم شعر

مبرد للجلد الميت ويكون معدني

فازلين الجديد اللي بزبدة الكاكاو او اي نوع تحبينه

كريم ثقيل و شوي دهني يعني جليسوليد ينفع- زبدة فازلين اللي ثقيله تنفع - نيفيا ينفع - اي كريم ثقيل تحبينه ويناسبك
مثلا كريم 21 ما ينفع .. اللوشنات الخفيفه ما تنفع

مقشر او ليفه تقشير جيده مثلا ليفه مغربيه

فوطه

شراب نايلون
شراب شتوي ثقيل


طبعا نعبي الطشت مويه دافيه
نحط الملح والديتول و الصابون و ننقع رجولنا شوي ابو عشر دقايق ((انا اخليهم ربع ساعه لان المويه مفيييييييييده للدوره الدمويه في القدمين و صراحه استانس :42: ))

اغير المويه و احط مويه جديده و معها البلسم واستنى خمس دقايق

اطلع الرجل الاولى و ابرد بالمبرد المعدني وانعم الاماكن الخشنه
اما الاماكن الناعمه امشي عليها بشويش

بعد ما احس ان رجلي فرقت وانها ما عاد تتحمل برد اكثر من كذا ((لان الجلد المتصلب يكون سميك و مو من اول مره بتشيلينه))

ابتدي اشتغل عالرجل الثانيه و نفس الشي ابردها

افرك رجلي كامله من فوق وتحت بالمقشر او الليفه المقشره (( طبعا الليفه احط معها شاور جل ))

اجففهم بالفوطه

احط كميه زينه من الكريم الثقيل

ثم كميه زينه من الفازلين

البس الشراب النايلون و فوقه الشراب الشتوي

و احاول ما ادوس على رجلي كثير يعني بعد هالتنظيف والفرك والبرد انام

ثاني يوم بس اغسل رجلي والبس شرابات طول اليوم

ثالث يوم اسوي برنامج اليوم الاول

رابع يوم زي الثاني


ممكن بعد رابع يوم تشوفين رجلك صارت زي البيبي ما فيها شي

ممكن تحتاجين جلسات اكثر

يعتمد حسب اهمالك..

المهم الشرابات ما تستغنين عنهم
نايلون وفوقه شتوي

و بعد كذا سوي برنامج اليوم الاول مره بالاسبوع فقط

و باقي الاسبوع خليك على نظافه وشرابات وكريمات فقط


الان ولله الحمد رجلي فرقت 80% عن قبل

ولله الحمد صارت ناعمه بس باقي نتفه لازم اشيلها بشويش لانها قريبه من الجلد الحي..




تجربه رخيصه و مكوناتها بكل بيت

انتي بين عيالك تشيلين السواد والوصخ و القرف والجلد و تتمتعين باحلى قدمين

تبين بعد كذا تروحين الصالون روحي

و بالنسبه لبنات الشرقيه انصحكم بمركز نيل لاونج اللي في البوليفارد عشان تحافظين وتحسنين النتايج اللي وصلتي لها بالبيت .. اطلبي هوت ستون مساج ..

هذا احسن مساج قدم جربته داخل وخارج السعوديه ((الخدمه تشمل البادكيور)):42: