طريقتي المميزة لعمل الحمام المغربي بالمنزل....اللي مايحبون الصالونات تعالوا اعلمكم

السلام عليكم ورحمة الله وبركاته

اليوم انا يايبتلكم طريقتي بعمل الحمام المغربي بالمنزل بدون عناء الذهاب للصالونات
وبحطلكم طرق وخلطات الجسم اللي استخدمها وان شاء الله تستفيدون من طريقتي وتطبقونها وتشوفون النتيجة الحلوة
واللي عندها اي اضافات او تعليق نحب نسمع منها عشان نستفيد من بعض


اولا قبل ماتقررين تسوين الحمام المغربي يفضل انج قبله بيوم او حتى دايما تستخدمين للجسم خلطة الجلسرين والليمون
وهي عبارة عن الجلسرين السائل الشفاف اللي عند العطار وتخلطين معاه عصير ليمونتين وتحفظينه بزجاجة وتدهنين جسمج منه
هالخلطة تبيض مع الاستخدام غير ان الجلسرين يرطب ويلين البشرة

والحين تزهبين المقادير اللي بقولج عنها
اولا الصابون المغربي وينباع عند كلللللللللل العطارين بكل مكان

ثانيا مفراكة بودي شوب اللي على شكل قفازات تييبين 2 حق الايدين
واذا ماقدرتي ييبي مفراكة مغربية هم تلقينها عند اي عطار

ثالثا مفراكة ظهر وهي عبارة عن عصا خشب طويله بنهايتها مفراكة وهم موجودة عند العطارين وبالجمعيات اذا مالقيتيها مومشكله بس دبري احد يفرك ظهرج

رابعا صحن حاطة فيه عصير نصف ليمونه مع ملح خشن لتشكيل مزيج سنفرة يعني هالخلطة بتكون بمثابة سنفرة واذا مافي ملح خشن حطي ملح عادي بس كثري عشان لايذوب بالليمون وماتستفيدين منه

خامسا قدر تحطين فيه ماء مغلي او جهاز بخار للوجه او اذا عندج غرفة بخار بالبيت احسن

سادسا كيس نايلون مال المصبغة الطويييييل اللي على طولج ولا تستخدميت كيس زباله عزكم الله لانه موزين فيه مادة موزينه
اذا مالقيتي كيس طويل خذي كيسين اقصر ولصقيهم ببعض يعني شوفيلج صرفه

سابعا وهذا شي اختياري للي لهم خلق ومتفرغين مثلي هذي خلطة لتنعيم الجسم وتبييضه وساعات اسويها من غير حمام مغربي وهي عبارة عن ملعقتين كبار سنفره اي نوع متوفر بس يفضل سنفرة المشمش وملعقه هردة اللي هي طحينه مثل ماركة النخله وجذي تكون سائلة وملعقه كبيرة طحين حمص وعلبة كارنيشن تخلطينهم عدل عدل وتخلينهم لين اقولج متى تستعملينهم

والحين نجي للطريقة:
اول شي شطفي جسمج بماي ونشفيه بالفوطه واخذي الصابون المغربي ودهني جسمج كلللللله فيه من فوق لتحت مو فرك لا بس دهان
وبعدين اخذي كيس النايلون اللي عندج وافتحي فتحة لراسج بس وخلي الكيس يغطيج من فوق لتحت بس راسج بره وخلي جهاز البخار او قدر الماي تحتك داخل الكيس يعني بين رجولك وانتي داخل الكيس عشان البخار يصعد ويظل داخل كأنج بغرفة ساونا وظلي على هالوضع ربع ساعة يكون جسمج تفتح مسامه وكل شي
بعدها شيلي الكيس وروحي للدش وشطفي جسمج بماي بس ولبسي المفراكة بأيدج وقعدي فركي جسمج كله من فوق لي تحت راح تشوفين البلاليط يطلع من جسمج :23:
والسواد والقذارات كلها واخذي مفراكة الظهر وفركي ظهرج عدلللل او خلي احد يفركج اذا مالقيتي مفراكة ظهر
الحين عقب ماشلتي الصابون المغربي بالوسخ اللي لصق فيه وجسمج مساماته متفتحه
حطي خلطة الحليب الكارنيشن والهردة والسنفرة اللي قلتلج تحضرينها
دهني جسمج فيها وخليها ربع الى نص ساعه وبعدها غسلي بماي وافركيها بايدج عشان تطيح طبعا ماراح تطيح كلها
الحين تاخذين سنفرة الليمون والملح وفركي جسمج فيها عدل عشان تنظفينه من الخلطة والوسخ وكلللل شي لانه الملح والليمون يعتبر معقم ومنظف عمييييق

عقب كل هذا اذا تبين تقدرين تستخدمين شاور جل عشان يعطيج ريحة حلوة وبس خلص الحمام المغربي
روحي غرفتج وتنشفي وتدهني ببدي لوشن او اي كريم للجسم وتمتعي بنظافتج ونعومتج اللي الكل بيحسدج عليها
هالطريقة اذا كررتيها كل اسبوع بتشوفين الفرق الشاسع باللون والنعومة والاثار وكل شي يشوه جمال جسمج