بسم الله الرحمن الرحيم
اللهم صل ِ على محمد وآل محمد
اليوم حبيت انزل موضوع عن طريقتي في ترتيب اكسسوراتي بناءاً على طلب وحدة من الاخوات طلبت مني هالشي..
وماحبيت ابخل عليكم بالطريقة بس اطمع في دعوة صادقة من القلب ..
اول شي كانت عندي علبة كبيرة من زمان اشتريتها ..وكان مرسوم عليها ورود حلوة بس مبينة انها قديمة ..جلدتها بجلاد حلو عليه رسومات ورود حلوة واخذت كرتون جزمة حق اخوي كانت مرة الكرتونة كبيرة واعجبتني ..جلدتها بنفس الجلادة ..واشتريت من محل ابوريالين هذي الاكياس الملونة ..وفرزت الاكسسورات كل لون لوحده (يعني اخذت العقود الي لونها احمر والاساور الي لونها احمر والخواتم الي لونها احمر والحلق الي لونها احمر وجمعتها كلها مع بعض )وحطيتها في الكيس لونها احمر وكل لون كذا.....وجمعت كل الاكياس بالعلبة الكبيرة ورصيتها في التسريحة ومرة مرتاحة مثلا ااذا لبست بلوزة حمرا و حبيت البس اكسسوار بس افتح العلبة اطلع الكيس الي لونه احمر واختار لي عقد وخاتم وحلق ..واسوارة الي ابقاه يعني والبس ...واخر الليل افسخها وارجعها بالكيس ...وارجع الكيس بالعلبة ..اما الكرتون الثاني حق الجزمة جلدته بنفس الجلادة عشان يكون شكلهم في التسريحة احلى وارتب ..وخليته للحزامات (الاحزمة) ..لفيت الحزمة بشكل دائري ورصيتها في العلبة...
اما الساعات اليومية الي البسها بالبيت حطيتها بصندوق خشبي .. جابته لي صديقتي في العيد كان مليان كاكاو ..غلق الكاكاو ..وصرت استخدم الصندوق كل مرة في شي...وهالمرة خليته للساعات اليومية
اما ساعات المناسبات ..خليتها بعلبها احسن..
والاطقم الكبيرة حقت المناسبات نفس الشي خليتها بعلبها...ومرة مرتاحةعلى هاي الطريقة ان شاء الله تستفيدون منها ..وتعجبكم..
واخيرا كالعادة اطلب منكم تدعون لي ربي يرزقني ذرية صالحة سليمة معافاة
ويسخر لي قلب زوجي ..ونسكن في بيت لوحدنا ..ومشكورين
وهذي الصور في المرفقات...
اول شي العلبة للاكسسورات وهي مغفولة
بعدين وهي مفتوحة .. وشوفوا الاكياس الي اقصدها ...انا تعمدت اختار ملونة عشان احط كل لون في نفس لون الكيس...:)
رجاءا لااحد يرد عشان الموضوع يكون متواصل...ابقى انزل باقي الصور في الرد الثاني..