لسلام عليكم ورحمة الله وبركاته ..
صباح / مساء الخير ..
بالبداية بقول لكم تجربتي مع الصبغات
انا تزوجت من 6 سنين وبدا مشواري مع الصبغ قبل الزواج ممنوع عند امي حبيبتي الصبغ حتى قص الشعر والتشقيير ...الخ .. وشعري كان طويل لين تحت الارداف واسود وكثيف ماشاء الله يعني اهتمام
طبعا تزوجت وبعد سنة صبغت شعري لون فاتح وتوهقت بعد شهرين كاني عجوز رحت وصبغته بني و هلم ماجر قعد على هالحال 5 سنين صبغات وحوسه وضرب بالالوان الين انعدم شعري وطاح بشكل فضيع واحتديت اقصه الين نص ظهري ووقتها وقفت الصبغات قعدت سنه ابي شعري يرتاح بس المصيبه انه ميت وخفيف ومقرف ههههههه ..
عقبها قلت انا اللحين اعدمته ب5 سنين وابيه بيوم وليلة يتعدل لا لازم اعتني من جديد ..
طبعا من سنة بديت ارجع للحناء
وكانت بدايتي بالحنه فضيعه تعرفون تقصف وينشف الشعر وغير اللون ياساتر برتقالي ,, طبعا من الخطا احني شعري وباقي اثار الصبغ فيه ..
المهم دورت طرق تغميق الشعر طبيعيا وكلها فاشله معاها كتم وطبعا الكتم يعدم الشعر , الين لقيت خلطة الله يجزى راعيتها خير مررررره رهيبه , طبعا بعد كورس دام 7 شهور بانت النتيجة بدا شعري يغمق ويرجع لطبيعته اللي فقدها المهم الحناء مالها شغل بتطويل الشعر الا اذا انحطت معاها اضافات انا بس ابي شيء يغمق الشعر والحمد لله شعري بسرعه يطول , النتيجة حاليا ماشاء الله تبارك الله شعري طال وصل الين تحت الارداف ولونه بني غامق مرررره كانه اسود وصحي ..
طولت عليكم بس حبيت اوضح لكم ان النتيجة جت بعد تعب وصبر ..
الطريقة / اغلى كل من ( المراميه ,
والشاي الاسود السلاني التلقيمه
, و 10 حبات قرنفل
, ورق التوت المطحون ) ورق التوت تلقونه بالعطار المهم اغلوا هالاعشاب على الغاز الين يصير اللون اسوود مررره وزيدي من الشاي اذا حسيتي الماي خفيف وصفي الماي واعجني الحناء فيه واتركيه يتخمر 4 الين 6 ساعات انا مرات بس اخليه ساعتين مايكون عندي وقت واحطه على شعري 6 ساعات بدون بخار اذا بتحطين عليه آلة البخار ساعتين يكفي , واهم نقطة لاجيتي تغسلين شعرج س اغسليه بماي اول يوم وحطي عليه بلسم والا ماسك عشان بيكون ناشف مره وثاني يوم عادي اغسليه بشامبو ..
روووووعه النتيجة مع الاستمرار وياويل الل تقول ريحة الحناء مو حلوة مو شغلي بخريه بعدها
طبعا استخدم الحناء مرتين بالشهر طبعا اسبوع حناء واسبوع زيوت اي نوع زيوت ..
اهتموا بشعوركم تراها تارج راس البنت والشعر يبرز الانوثه اكثر واكثر , ومايحتاج اقول ان اغلب الازواج يحبون الشعر الطويل بس عاد انتي اهتمي لنفسج قبل الزوج ..
دعواتكم لي بتحقيق حلمي وتوفيقي بدراستي ويخلي لي ولدي و ابوه
أحبكم بالله .
إختكم افتخار
*
يارب يحققلك كل امنياتك
وياليت تقولي وش نوع البلسم والزيوت اللي بتستخدميهاا