بسم الله الرحمن الرحيم
و الصلاة و السلام على خير الانبياء و المرسلين
كيفكم يا الطيبات انا اول مره انزل موضوع بقسم المطبخ و يارب الكثيرات يستفيدون من طريقتي و ترا حطيت اغلب التفاصيل للي اول مره و ارجو الاجر من الله تعالى و دعواتكم تضبط اول خلية نحل اسويها.
وطبعا هذا من باب رد الجميل كثير طبخات ووصفات تعلمتها منكم و قلت ما تغلى تجربتي على خواتي و حبيباتي
طريقتي بفشار الكاراميل ( و فيه طرق بالسكر الاسمر لكنه مو متوفر عند الكل فهذي بالسكر العادي)
الحمد لله طريقة الكاراميل من عضوة بالمنتدى بس بتغيير بسيط مني
مقادير النكهة:
نص باكيت كاراميل ( حطيت كامل و طلع كثير مره)
ملعقتين كبار شكر ( حطيت نص كوب و طلع حالي كثير)
ملعقة كبيرة زبده ( و هذي اضافه مني مو من العضوة خفت السكر يحترق بدونها)
3/4 كوب ماي ( انا ضاعفت الكمية لما حطيت كل الكاراميل)
1- الطريقة:
2- توضع الزبده بالمقلاة و لما ساحت حطيت السكر و قعدت اقلب فيه لين ما امتص الزبده عدل لكن لا يطول ترا السكر
3- يتكتل و يلصق بالمقلاة ، انا باول مرة تكتل لان العضوة كاتبه يصير لونه ذهبي، انتو لا تنطرونه يصير ذهبي اللهم
4- يشرب الزبده و بس تراه ما يطول، و اذا تكتل عادي حطو الكارميل المذوب بمقدار الماي و خلو النار متوسطه
5- و تحملو عاد اذا السكر لصق بالمقلاة بتحكونه لين ما يذوب و الله عذاب عشان كذا اقولكم بس يشرب الزبده لا تشقرونه
6- بعدين حطيت الكاراميل الي مذوبته بمقدار الماي طبعا حركته قبل و قعدت اخلطهم
7- على نار متوسطه مع ملاحظة ان الخليط يصير شبه ماي يعني لا تخلونه مثل العسل ترا يجمد ونتو ترشونه على الفشار، العضوة كاتبه مثل العسل و اذاني رحت زدته ماي
8- خلوه سايل ادري باول مره بتقولون كثير سايل بس هو كاراميل من يبرد يجمد فعادي اذا كان سايل
9- و عاد ضبطو كمية الماي اذا حسيتوه صار مثل العسل زيدوه ماي، يعني لا تتقيدون بمقداري
10- طبعا الفشار مسوينه و خالصين اما بالطريقة القديمة الي بالقدر ولا الي بالجهاز، انا جهازي المدور الي كنه طبق فضائي دورو صورته بالنت ترا ما اعرف انزل صور
نصايح للي تستعمل جهاز الفشار لاول مرة:
1- انصح فيه و بقوة كثير مريح ولا ياخذ وقت ولا تخافين يحترق الفشار ومن اول مرة تسوين كمية رهيبة
2- حطيت كوب و نص ذرة ( جبتها من السدحان ماركة السدحان بكيس و فيه كيلو ذره كبيره ب 7 ريال تقريبا ) و يفضل بالفشار حجم الذره يكون كبير، ولا تغركم الاسعار الغالية تراها كلها نفس الطعم تقريبا دامها حبة كبيرة
3- الذره حطيت عليها ملعقة زيت زيتون بس و اخلطوها زين لين ما كل الذره تتشرب الزيت عشان لا تحترق عليكم
4- شغلي الجهاز على خط 220 و انتبهو لا تخلونه على خط اقل انا شريته و ما عرفت له بعدين نزلت موضوع عنه و البنات فادوني الله يبارك فيهم يارب ، و الله ظل سنتين عندي مركون على اساس برده على قصر الاواني، و لما حطيته على خط 220 و اشتغل معاي هههه) و على فكره رخيص مرة
5- مو مهم يحمى قبل ، حطي كل الذره عليه و غطيه بالاناء الشفاف حقه و شيلي القبعه السوده الي عليه خلي البخار يطلع
6- بيدور المؤشر و يدور و تبدا الفرقعه و لا تخافون من منظر البخار الطالع ، ترا يخرع ههه كن الجهاز محترق بسم الله عليه،
7- ولا تنطرون كل الكمية تفرقع ترا بيحترق شي من الذره، انتو انطرو لين يمتلي كل الغطا و بس مع الاستعمال بتعرفون متى ، يعني لا تنطرون كل الفرقعه لين ما تخلص و بعدين تسكرون عليه ، سكرو عليه قبل ، كذا بياخذ 3 دقايق ولا اقل، ولا دوخة القدر و شوفيه احترق ولا لأ، ولا يطشر و يحرقك
8- بعد ما تخلصون انطروه شوي يبرد عشان تقلبون الجهاز
9- امسكو الجهاز من المقابض و اقلبوه بيصير كل الفشار بالغطا
10- جيبو قدر كبير ولا ماعون يكفي الكمية تراها عائلية و فرغو فيه الفشار
11- طبعا الكاراميل بيبرد حموه على النار لين ما يصيرسايل مره و اذا يبي ماي زيدوه عادي انا باول مره زدته فوق الاربع مرات
12- و رشوه على الوجه بعدين قلبو الفشار عشان كذا اقولكم قدر كبير لانكم بتقلبون، و صبو و قلبو و صبو و قلبو و صبو، اذا كمية الكاراميل زايده وقفو صب ترا يصير حالي مره ، مثلي لما سويته باول مره
13- و فرقو الفشار بادينكم لانه بيتكتل شوي و هذا اكيد لانه الكاراميل مثل الصمغ طبيعته ، و اكلوه و هو طازه و هو دافي يا سلام و الله احسن من المحلات
14- اذا فضل و برد حطوه بكيس و اربطوه و حاولو تفرغونه من الهوا عشان لا يفسد و بس بالعوافي على قلوبكم
و الله بيصير تغيير خصوصا اذا تتابعون برنامجكم المفصل ولا لعيالكم الي عندهم امتحانات
طريقة غسل الجهاز:
طبعا الواحده السنعه ما تخلي الشغالة تغسل الاشياء الحساسة و الكشخه فحبيباتي انتو اغسلوه و الله ما ياخذ وقت لانكم عارفين بلاوي الشغالات الله يجيرنا منهم
اغسلوه باسفنجه و بس مو بسيم ( سلك المواعين) ترا السلك يشلخ الجهاز، و بعدين نشفوه و دخلوه بالكارتون
جربوه ترا ما ياخذ وقت دعواتكم الله يحقق الي ببالي :26:
شاهه2 @shahh2
محررة
يلزم عليك تسجيل الدخول أولًا لكتابة تعليق.
ام رزان وريناد
•
يعطيك العافيه *****الله بجرب الطريقه
الصفحة الأخيرة