طريقتي في اعاده شعري للحياه /اكتفى من الردود

كان شعري يتساقط بشكل موطبيعي لدرجه صرت اخاف امشط شعري اخاف من وقت السباحه من كثر ماشعري يتساقط وسمعت عن خلطة الثوم والبصل والزيوت قمت وحطيتها وبشكل يومي لمده ساعتين وتحملت الريحه الخايسه الي تفجع وتحملت الاحراجات مع الناس ومع زوجي :eek: وكنت انتظر واتخيل بعد شهر الشعر الصغغن اشوفه بدء ينبت, انصدمت شفت فراغات صارت كبيره بشعري ورحت للدكتوره الجلديه قالت لي شسويتي بشعرك وحسيت بنفسيه زفت وقلت شكلي راح اصير صلعه اخرتي وقعدت ابكي وانوح على حالي ودمار شعري بعد ماكان لمعه وحيويه وكثافه شنو صار له .... تخيلو الى الان صار 8 شهور من استخدام خلطه الثوم لازلت بعد السباحه اشم ريحته بقفروة راسي :09:
فكرت اول شي كنت موعارفه قيمه شعري وهاملته حيل الان بعد مافقدته حسيت بقيمته
قررت ابتعد عن كل الخلطات لانها ماتناسب كل الناس يمكن
وبديت بهذا البرنامج من 4 شهور وماشاء الله تبارك الله صار شعري احسن بكثير من قبل والكل لاحظ الفرق
ا1ذكرو الله يابناااااااااااااااات
بسم الله الرحمن الرحيم

اول قصيت شعري قصير على الرغم شعري طويل واحبه كذا لكن لازم اتحمل :(
وبعدين بديت في اهتمامي بتغذيتي لان عايشه على الوجبات السريعه ومااكل لاخضار ولافواكه ولااشرب ماي
بديت اشرب ماء 8 كاسات باليوم اجبر نفسي كل ساعه اشرب كاس
الفواكه نوعي على الاقل كل يوم
الخضار كل يوم طبق سلطه
حليب وزبادي كل يوم
جزر مهم جدا لان غني بالفيتامينات

2_لان شعري دهني جدا لازم اغسله كل يوم والشامبو يتلف الشعر ولاحظت اذا يوم ماغسلته يتساقط بشكل اكبر قررت ارجع للطبيعه فصرت اغسل شعري بالسدر لاتقولون موحلو وماينظف انا قلت مثلكم قبل والان مستحيل استغني عنه بدلته بالشامبو واذا عندي طلعه اخلط سدر مع نقطة شامبو والله بالبدايه كنت اشوفه صعب وحوسه وموحلو الان اشوفه احلى من الشامبو واذا طلعت احط بشعري مخمريات وابخره حتى اعوض عن ريحة الشامبو
وراح اقولكم شغله انا وقفت الاستشوار نهائيا ولاحتى تجفيف وصرت الف شعري بعد ماينشف بالبنس طاقيه

وقبل كم اسبوع حطيت السدر ولفيته ورحت زواج بدون اي استخدام للسشوار الكل فكر شعري مسويته بالفير السراميك ماشاء الله كانه مسحوب حيل على الرغم ان شعري ناعم لكن طلع يهبل وانا قاصه شعري فاكتوريا طلع احلى من السشوار والله
3_قبل لاانهي الشاور حقي احط ماي يكون بارد كاخر شطفه لان معروف يقفل المسام وفعلا لاحظت نتيجه وابدا ابدا ماامشط شعري وهو رطب اخليه لين يجف شوي
4_قريت عن فائده مغلي اكليل الجبل وعشبه الاس قمت سويتهم نقعتهم لمده ساعه بماء مغلي قبضه من كل نوع وصفيتهم وخليتهم في بخاخ وكل يوم مرتين ابخ على فروة الراس >>فائدته يسود الشعر ويغلظ ويوقف التساقط
5_استخدمت حبوب من محلات فيتامينات (gnc) خاص للشعر
6_الدكتوره كتبت لي تونك لتساقط الشعر من شركه افلون افوجين تركيز 2% سعره 55 ريال وصار لي 4 شهور استخدمه
ومشيت على برنامج زيت مرتين بلاسبوع مع استخدام مساج وقبعة البخار وحنه مره بلاسبوع
والله يابنات الله شاهد شعري بدء يرجع مثل قبل حيويه ونعومه ولمعه التساقط وقف جدا صرت اشوف كم شعره باليوم وماكتبت موضوعي الى لاني عانيت من نفسيه تعبانه بسبب شعري وحسيت بالمعاناه فمااتمنى احد يحس باحساسي والله ادري شلون الشعر غالي على كل بنت
واتمنى من الي تمر على موضوعي تدعي لي ربي يحقق لي ماتمناه ترى والله محتاجه لدعائكم ودعاء المؤمن للمؤمن مستجاب