طريقتي في ال....... متزوجه غير متزوجه ادخلي 😉

بسم الله والصلاه والسلام على رسول الله محمد ومن ولاه عليه افضل الصلاه والسلام>> صلو على النبي☺️
بنات منتداي الغالي موضوعي رائع جدا وفيه الخير الكثير لنا ولذريتنا وامواتنا وجميع المسلمين
ووالله لما وجدت ضالتي وشفت عجايب فيها قلت خليني اكتب هالموضوع لعل الله ينفع به ويجعله شفيعا(لنا) يوم القيامه
بس طولو بالكم علي لاني بليده في التعبير وابي اوجز وابي توصلكم المعلومه بصدر رحب منكم😊
انا مريت بسنين معظمها طفش نكد مشاكل مع زوجي واهلي ووووو وعكوسات وخلال هالفتره صحتي تدهورت ورجولي كني عجوز ماقدر امشي مره املاح ونقرس ونقص كالسيوم ووو كل دكتور يقولي شي ولا فيه تحسن ابد لدرجة ولدي يقولي تمشين كنك عجوز وشغل بيتي ماسويه الابشقالانفس 😢
وبالاضافه لاولادي كل شوي واحد يمرض وزوجي ظروفه الماديه ماش ديون والباقي من الراتب مافيه بركه
في يوم وقبل سنه قعدت مع نفسي قلت ليش حياتي كذا مع اني في حالي وذنوب اكيد علي بس الحمدلله مو كباير
واطمر ع العم قوقل وهات يابحث ولو قوقل يتكلم كان قالي غثيتنا انتي ومشاكلك وش هالكلمات الي تبحثين عنها معروض كلمه بحث😜
عاد انا ولاهمني اشوف هالنسوان ومشاكلهم وكيف حلوها
واخيرا فتحت عيوني ع طريقه والله وبالله وتالله ان حياتي الحمدلله تحسن واجد(اذكروا الله)
تبون تعرفون وشهي؟ انها الصدقه
اي نعم الصدقه والله يابنات شي عجيب
فكرت وفكرت ان مو دايم معي الي اتصدق به طيب وش السواه
طرت ع بالي فكره
اني اسبح واستغفر واقرا قران واجرها لموتانا وموتى المسلمين بنيه انها صدقه عني وعن ذريتي وزوجي وجداني ووووووو
هالشي الي قدرت اتصدق فيه
وسرت كل يومي استغفار (استغفرالله الحي القيوم واتوب اليه ) وتسبيح( سبحان الله وبحمده عدد خلقه وزنة عرشه ورضا نفسه ومداد كلماته) لان قرات انه هالذكر له اجر عظيم
وهذا حالي استغفار وتسبيح ودعاء لموتانا انه يارب يوصلهم اجر هالذكر مني بنية الصدقه
واطلب ربي
لو اقولكم انه مره كنت في السوق ومامعي الا 500ريال وابي كسوه لي ولعيالي لمناسبه قريب لنا وكنت مهمومه كيف بتكفينا ماشاءالله وحنا 6 اشخاص
وربي طول الوقت وانا اذكر الله بنيه الصدقه
وقسم بالله زوجي راح يصلي المغرب ودق ع جوالي يقولي قدمت ع جهه يعطون مساعدات ماليه والحين في حسابي عشره الاف ريال تعالي بسرعه
يالهوووووووي بغيت ابكي من الفرحه والحمدلله ربي باركلنا فيها وشريتا كل الي نبي وسدد منها دين
وكنت اذا جا وقت الفطور برمضان انا اجلس جنب المويه واوزع التمر ع عيالي وزوجي واصب الما لهم وبنفسسسسسس النيه انه يارب هالاجر في تفطيرهم اكتبه لموتنا وموتى المسلمين
واحفظ عيالي السور من القران تسميع للمدرسه او غيره بنفس النيه
يعني هالنيه ماتفارقني ابد
واتخيل كيف الميت تجيه دعوه وذكر له من شخص حي وكيف بيفرح بها والاجر اللي بيلقاه واجتهد اكثر
شفتو اتصدق وانا في بيتي وبدون مايكون معي ولاريال
نجي لشي مهم ماشاءالله لاحظه زوجي وعيالي
انا حامل بالشهر السادس وعندي اربع اطفال وزوجي وتعرفون شغل البيت كيف والتعب
والله اني سرت نشيطه ماشاءالله لاقوة الا بالله ولا احس بثقل الحمل ابدا وبيتي زي الورده انظفه اول باول وبدون ماكون زهقانه وطفشانه مثل اول من طبخ وغسيل وكوي ووووو كل شي اسويه لحالي وسارت نفسيتي زينه ولله الحمد راحت الضيقه الي اول احس كل ماشوف شغل بيتي
كني طولت عليكم 😁
بس حبيت افيدكم مادري اذا عندكم فكره عن هالنوع من الصدقه او لا بس حبيت تستفيدون مثل ماستفدت
وتذكروا ان الله بيسخر لنا من يدعي لنا بعد مانفارق هالدنيا
هالطريقه علمتها خواتي وعيالي وزوجي
وارجوا انكم توصلون هالفكره للكل
اذكروا موتاكم بالدعاء وانو النيه
واجر هالموضوع لكل من استفادت منه اونقلته او ذكرت فيه ذكر وتسبيح فهو صدقه عن موتانا وموتى المسلمين
واتمنى مازعجتكم بهذرتي وسامحوني طولت عليكم
واخيرا
اذكروني بدعوه🌹