طريقتي في عمل المقلوبة على اصولها

للاسف ما في صور
بس رح احطلكم طريقة مضمونة 100% لعمل المقلوبة الفلسطينية على اصولها
طبعا انا دايما بعملها و بتطلع كتير طيبة

المقادير
1 حبة باذنجان مقطعة دوائر
1 حبة بطاطا مقعة دوائر
1 حبة بصلة مقطعة شرائح
1 حبة بصلة فرم ناعم
حب حمص مسلوق ( غير ضروري )
ثوم
رز منقوع
دجاج
ورق غار و شوية هيل
ماء

اولا
بنجيب البصلة المفرومة ناعم و نحطها بطنجرة او قدر و نحط فيها شوية زيت و شوية صغيرة ثوم وورقة غار و حبتين هيل و نقلبهم مع بعض لمدة 7 دقايق و بعدين نحط قطع الدجاج عليهم و نقلبهم مع بعض لمدة 7 دقايق ايضا و بعدين نحط عليهم ملح و شوية بهار مشكل و فلفل و و بنحط بعدين ماء نغمرهم و زيادة كمان و نخليهم على نار عاليه لحد ما تغلى المي .. لما تغلى بنخفض النار و بنغطي القدر و بنتركهم لمدة ساعة
خلال هذه الساعة بنجيب قلاية و بنحط فيها زيت و بنقلي الباذنجان و البصل الشرائح و البطاطا و نحطهم على جنب
لما تستوي الدجاجة .. يعني لما تخلص الساعة بناخد قطع الدجاج و بنحطهم بصنية للفرن و بنحط عليهم ملح و فلفل و بهار مشكل و بهار دجاج و رشة زيت زيتون و بنحمرهم شوي بالفرن لحتى يحمر لونهم
.. هلأ بنروح للرز المنقوع
بنحط عليه بهارات مشكله و فلفل اسود و كمون و ملح و رشة قرفة .. طبعا القرفة ما رح يظهر طعمها بس بتعطي نكهة طيبة .. و بنخلط حب الحمص المسلوق معه .. الي ما بتحب حمص عادي بدونه بس طيب مع الرز
بنجيب قدر ... بنحط في قاع القدر قطع البادنجان و قطع البطاطا و شرائح البصل و نحط طبقة رز و طبقة باذنجان و بطاطا و بصل و هكذا ...
و هلأ بنصفي المرق اللي انطبخت فيه الدجاجة و بنحطه عليهم .. طبعا قبل ما تحطيه عليهم ذوقي مرقة الدجاج اذا بدها شي
اذا كانت خفيفة و مش دسمة حطيلها مكعب ماجي او اتنين .. لانو بالمقلوبة لازم تكون المرقة دسمة
و بنحط القدر على نار عاليه لحتى تغلي المرقة و بنخفض النار على طول و بنغطي القدر و بنخليها لحتى تمتص المرق و يستوي الرز
طبعا باستخدام شوكة اعملي فتحات بين الرز لحتى تدخل المرقة بينو و يستوي منيح
طبعا كلنا بنعرف انو كل كاسة رز تحتاج كاسة و نص مرقة
و لما يستوي اقلبي القدر في طبق التقديم و زينيه باللوز و الكاجو و البقدونس و قطع الدجاج المحمرة
و صحة و هنا