السلام عليكم ورحمه الله وبركاته
رول الدجاج بالجبن
المقادير
صدور دجاج تشرحينها 2 او 3 على حسب حجمها اهم شي تكون كل شريحه نحيفه بس مو مره مثل الفيليه
بصله وحده وسط مبشوره بحقة الجبن او تقطينه ناعم مرررررررره المهم في الاخير نبي مويته بس
اربع فصوص ثوم
ملح، فلفل اسود
عصير ليمونه
زيت زيتون
جبن شرايح وكل وحده تقطع اربه او خمس
نص علبه وسط جبن شدر مبشور صغير مع شوي جبن بارميزان نخلطهم مع بعض(ممكن تستعملين الجبن اللي تحبين )
( المقادير تكفي لـ 12 شريحه)
الطريقه: اعذروني في البدايه نسيت اصور الخطوات بس ان شاءالله سهله ومايبيلها شي
1- نضرب شرايح الدجاج بمضرب اللحم شوي شوي مو بقوه علشان ما يتفتت الدجاج ويتقطع معاك بس مجرد ضرب بسيط لترقيق
2- نفرشهم في صنيه كل شريحه لحالها مو فوق بعض ونتبلهم اذا تحبين فلفل وملح بس عادي انا طريقتي وحده في التتبيل (اذا بسوي سكلوب او فيليه او رولات ) ارش ملح وفلفل اسود من الجهتين بعدين من جهه احط شوي من مويه البصل والجهه الثانيه احط شوي ثوم طبعها كانك تدهنين وفي الاخير تصبين فوقهم شوي زيت زيتون لاتغرقينهم بس شوي عشان ماينشف الدجاج ويصير متليفوتغطينهم وتخلينهم نص ساعه
3- تجيبين فوطه ماتطلع خيوط واحسن شي ودايما استعملها لمثل الاشياء( فوطه صباح الخير القديمه ) واصف الشرايح فوقها واغطيهم بوحده ثانيه واكبس عليهم بيدي عشان تطلع المويه وتنشف مو بقوه شوي شوي
4- والحين ابتدي مكم بالصور مع الشرح
اخذ شريحه واحط شريحه جبن وشوي جبن شدر مع بارميزان
تلفينها بالطريقه
تصفينهم بصنيه حتى تخلص الكميه كلها
تغمسينها بالبيض المتبل بشوي فلفل اسود علشان تختفي نكهة البيض
بعدين بالبقسماط ( فتات الخبز)
وتصفينهم بصنيه حتى تخلصينهم كلهم بعدين تدخلينهم الفريزر ربع ساعه عشان تتماسك ولا تتفكك عليك وانتي تقلين
تقلينهم بزيت عميق
طريقه القلي : تحمين الزيت وقبل ماتحطين الدجاج توطين النار عشان تستوي براحتها قبل ماتحمر وحطي اربع او ثلاث لا تزيدين على كذا عشان مايبرد الزيت وتخرب عليك وتقلبينهم كل دقيقتين وتجلس سبع دقايق واحيانا اكثر بس انتبهي لا يكون الزيت بارد مرررررره اذا حسيتي انه برد عالي النار بسرعه
وهذا الشكل النهائي وتسوين معها بطاطس ورز ابيض وسلطه وبالعافيه على قلوبنا وقلوبكم يارب
يتبع اخر صوره
عوووافي عليكم