السلام عليكم ورحمة الله وبركاته ,,,
كيفكم اخواتي ,,,ندخل في الموضوع دغري ,,,,
لما لاحظت بعض بنات متغلبين في طريقة نخل الحنا ,,,
قلت اصور لهم طريقتي وإن شاء الله يستفيدوا ,,,
المقادير
حنا _ زبديتين صغار فاضية وممكن تستخدمي حق اللبن الزيادي _
شال أو مصر وممكن شراب نسائي ممكن غترة براحتك
هنا الزبدية فيها شوية حنا منخول لأني نسيت نخلت شوي وبعدين افتكرت التصوير :)
تغلفي الزبدية وتمسكيها بيدك من تحت عشان ينشد الشال وتحطي ملعقة حنا تقريبا وتبدأي تحركيه رايح جاي الين ما تبقى الشوائب حطيها في الزبدية الثانية الفاضية ,,,
الين ما تنتهي من الكمية الي محتاجها ,,خلاص الصحن الي فيه شوائب استبعديه خليه على جنب
وجيبي الحنا المنخول وزبدية جديدة نظيفة واعيدي نخله مرة ثانية اذا حسيتي انه فيه شوائب حتى لو مافيه افضل تعيدي النخل عشان
يسهل عليك وينزل من المعصار براحة وسلاسة ,,,
اعدت نخله لأني الحنا الي عندي حنا يماني مليان شوائب
وهذي هي النتيجة النهائية
يتبع طريقة تخمير الحنا ,,,
بكتب لكم طريقة عمتي الله يرضى عليها ولا يحرمني منها وان شاء الله تفيدكم...
طريقة عجن الحنا
تجيب حنا يا تجيبه من اليمن لما تسافر او تشتريه من العطار وتوصيه ان يكون حاني ..( تقريبا تحط 3 او 4ملاعق اكل )
تجيب شوية حمر ( تمر هندي وتنقعه في الموية يكون مخفف ومعاه ليمونة )
اذا مافي حمر تحط مغلي الشاي ,,,
تحط على الحنا شوية ملح وعصرة ليمون وكم نقطة بنزين وتخلطه بموية التمر الهندي طبعا بعد ما تصفيه وتحط غطا دوا الحنا ( ميسو ),,,وتسيبه مغطى ,,,وتخليه يخمر بعدين تستخدمه ..
يعني مثلا تخمر الحنا الصباح تتحنى بيه الظهر او العصر ...
هذا صورة دوا الحنا
*********
طيب دحين نقشتي يدك ونشف الحنا لا تقشريه خليه ,,,
تعصري ليمون في فنجان وتحطي عليه شوية سكر وبالمنديل او القطنة تغمسي في الفنجان وتطبطبي في يدك
وبعدها بتنشف يدك جيبي كيس وكيسي اياديك الين ما تحسيها عرقت شيلي الكيس ولما تنشف رجعي الكيس وهكذا ,,,
**********
طيب خلاص طفشتي وتبغي تشيلي الحنا قشريه بس لا تغسليه ,,
وبعدها ادهني يدك بالفيكس او زيت طبيخ وبعد فترة خلاص غسلي يدك عادي ,,,
وتعالي شوفي ثاني يوم كيف حيكون ,,,
بنات الي عندها حساسية من البنزين لا تستخدمه مو بعدين تقولوا صموتة قالت وتدعوا علي ..
بس حبيت افيدكم باللي اعرفه ,,,
اتمنى يكون الشرح واضح واذا خمرت حنا ان شاء الله احط لكم الطريقة بالصور
وأي اخت عندها اضافة او معلومة تتفضل الموضوع منكم واليكم :)