طريقه الريجيم السليمه 100% مجربه

السلام عليكم يا بنات
انا متابعه مواضيعكم من فتره طويله والحمد لله وصلت للوزن المطلوب اخيرا

بصوا يا بنات من خلال تجربتي في الريجيم انا كان وزني 76 كيلو وطولي 160 وكان

ناقصلي حوالي 5 شهور واتجوز مش عايزه احكيلكم انا ازاي اتعذبت علشان اقدر

اخس المهم اني والحمد لله وصلت 61 كيلو بعد معاناه سنين طويله ...

من خلال تجربتي انا انصحكم بأهم حاجه انكم متتعشوش حاولو تلغوا وجبه العشا

تماما من حياتكم واتغدوا كويس جدا انا عارفه انها في الاول بتكون صعبه جدا لكن

بعد حوالي اسبوع واحد حتتعودوا ....

تاني حاجه لو حسيتم بالجوع في اي وقت حالوا انكم تفكروا في اي حاجه تانيه غير

الاكل او اشغلوا نفسكم في اي حاجه بعد ربع ساعه بالضبط احساس الجوع حيروح

تماما وممكن تشربوا ميه ساعتها اللي بيحصل في فتره الربع ساعه ده المعده بتفرز

هرمونات الجوع ولما متاخدش الاكل المطلوب بتسحب من الدهون المخزونه في

الجسم لذلك نشعر بعدها بالشبع ويروح احساس الجوع ....بالنسبه للرياضه انا من

الناس اللي بتكره الرياضه تماما لكني وجدت طريقه افضل من الرياضه ولها نفس

المفعول تقريبا انا خدت كورسات رقص في اي صاله جيمانزيوم منها اتعلمت الرقص

ومنها عملت رياضه جيده ومش متعبه .....صدقوني يا بنات ده الطرق اللي اتبعتها

علشان اخس والاهم من الريجيم الاراده ودايما تحافظوا علي الكيلوات اللي خستوها

لاني كنت في الاول اخس حوالي 5 كيلو وارجع ازهئ من الريجيم وارجعلهم تاني لو

فقدتم الاراده انكم تكملوا الريجيم علي الاقل حافظوا علي اللي خستوه علشان

مترجعوش تبتدوا من اول وجديد ويحدث الاحباط ......

ومتنسوش كل يوم الصبح علي الريئ معلقه خل تفاح مع كوب ميه ده فعلا مفيد جدا

وبيسيح الدهون ...

علي فكره انا كنت بستحدم في اول اسبوع دواء لسد الشهيه كبدايه بس لاي ريجيم

وبعد ما اتعود ابطله علي طول لاني اعرف ان ليه اضرار كتيره للجسم..

.ومتنسوش دايما الدعاوي لربنا سبحانه وتعالي انه يحسن من مظهركم

واجسامكم ...ده تجربتي مع الريجيم والحمد لله ...انا حبيت افيدكم من تجربتي يمكن تستفيدوا فعلا لاني استفدت كتير من مواضيعكم ....دعواتكم معايا يا بنات مرجعش ابدا للوزن القديم .....شكرا وربنا يقدركم :27: