طريقه عمل الليمون الاسود ويكون تحت رقابتك وتعرفين نظافته وطل شيء وريحته بالاكل مو طبيعيه طبعا هالطريقه تعملها الوالده دايم تستعمل الليمون الاخضر الصغير يسمونه ليمون بن زهير وبالشرقيه يسمونه ليمون قطيفي والله واعلم على اختلاف التسميات بس اكيد كلن يعرفه الي حباته صغيرة الليمون بهالفترة يكثر وخذي كرتونه كبيرة لان موسمه اتوقع بالصيف
اغلي ماي حار وحطي الليمون الاخضر فيه طبعا اول غسليه عشان اي رمل او شيء يطيح قبل تغلينه بعدها حطيه بالقدر بالماي المغلي الي على النار وخليه شوي اذا شفتي بداء لونه يتغير طفي النار واشخليه وحطيه بصنيه ولا بشيء كبير وعرضيه للشمس وخليه على طووول بالشمس لحد مايجف ياخذ وقت طبعا على حسب قوة شمس المنطقه الي انتي فيها وكل يوم حاولي تقلبيه بشويش عشان ماتنفقع لان يكون فيها ماي وراح تنشف مع الوقت اهم شيء الشمس عليه وبعد ماينشف عبيه بحافظات واستخدميه وشوفي كيف تطلع ريحته بالاكل جنان طبعا الليمون بيكون لونه تقريبا على صفار او بني خفيف مو اسود مررررة ويمكن تكون كم حبه سودا بس جربو الطريقه وادعو للوالده
والطريقه الثانيه لنفس الليمون للي استعمالاته كثيرة منها للمحاشي الورق عنب والملفوف والسلطات واي شيء حتى الشوربات حاصه في رمضان تكثر استخداماته
خذي ليمون الصغير نفسه الي راح تسوين منه الليمون الاسود
طبعا قصيه انصاف ورشي عليه ملح وصفيه بصنيه وخليه نص ساعه تقريبا وبعدها اعصريه وعبيه بغراش قزاز وحطي عليه شوي زيت زيتون وخليها بالثلاجه اي وقت احتجتي له للشوربه حطي عليها للسلطات والمحاشي فكرة تفيدك وتقلل الوقت بالمطبخ لو كنتي بضيق وقت الا عندك شيء خاصه برمضان الوقت ضيق والواحد مايدري يطبخ ولا يقراء قرآن
بنات الي يحب عصير الليمون ممكن تعصرون الليمون وتحطونه بقوالب الثلج وتدخلونه الفريزر وبس يجمد حطون بكيسه وقت ماتبون طلعو مكعب وسوي العصير اوفر ولان الليمون هذا مايتوفر بكل وقت
اذا عجبك موضوعي ادعولي ربي يسخر زوجي ويخلي امي وابوي ويبلغنا رمضان احنا وجميع المسلمين يارب
آمين آمين آمين يارب العالمين