السلام عليكم
كيفكم ياموظفات :) وياربات البيوت وبرضه الطالبات المتزوجات <<تخاف احد يزعل عليه
ماادري اذا هذا المكان المناسب للموضوع اولا لكن اذا مو مناسب انا تحت امر المشرفات يحطونه بأي مكان
طلبت الاخت ميرة الاميرA بالتجمع طريقه تختصر الوقت بتجهيز الكبسه وهذي طريقتي قلت ماراح ابخل عليكم فيها
بسم الله نبدأ
* اذا صار يوم الجمعه او الخميس
1- قطعي بصل كثير وطماط برضه كثير قطعيه صغير
احمسي البصل ليت يذبل ويصفر نوعا ما واضيفي له الطماط وحطي له ملح وبهارات وماجي واتركيه لين يذوب مع التقليب
وبعدين شيليه من النار وخليه يبرد بعدين جيبي اكياس وافضل شي اللي تتسكر من نفسها زي هذي
وخوذي بالملعقة حسب غداء كل يوم وحطيه بأكياس الكبس او اي كيس وصفيه فوق بعض بالفريزر
2- الدجاج اول ماتشترينه قطعيه انصاف او ارباع حسب ماتاكلون يوميا وغلفيها كل جزء لحاله
وحطيها بالفريزر مقطعه وجاهزة
3- قطعي بصل طوال حق اسبوع بس واحمسيه بزيت ( كثري الزيت) ولمايذبل ويصفر حطي عليه زبيب وشوي بسيط كركم وخليه ثواني و شيله من النار لازم يصير الزيت اكثر شوي من البصل كأنه يسبح فيه :) ولمايبرد حطيه بقدر صغير وبالثلاجه
4-قبل تنامين جهزي صينيه عليها الملاعق والكاسات والصحون واي شي راح تحطينه على الغداء من مواعين وغطيه بالسفره اللي راح تقدمين فيها وخليه بمكان معين بالمطبخ
5- اذا كنتي تستخدمين تغطيه للدجاجه قبل تدخلينه الفرن برضه جهزيه قبل وحطيه بالثلاجه حق اسبوع
جاء وقت الطبخ اليومي وهنا عندي لك طريقتين
الطريقة الاولى اذا صار الصبح قبل تطلعين للدوام طلعي من الفريزر كيس من الكشنه(البصل والطماط) ونص الدجاجه
بالنسبة للدجاجه بعد ماتطلعينه من الفريزر حطيه بالثلاجه وقت الصيف اما بالشتاء خليه برا وحطي الكاتم (قدر الضغط) على الفرن او قريب منه (مو تشعلين النار :) بس خليه جاهز قدامك)
اذا جيتي حطي مويه بالغلاية وروحي للفرن حطي بالكاتم شوي مررررة زيت وحطي الكشنه حركيه شوي يتجانس حطي الدجاجة حركيه شوي معه تصير المويه جهزت شيلي المويه من الغلاية وحطيه عليه وسكري الكاتم زين
انقعي الرز بمويه دافية وروحي غيري او خذي شاور
ربع ساعة ويكون الدجاج خالص صفيه وحطي الدجاجه بالفرن واذا تحبين حطي عليها الخلطه اللي مسويتها بالثلاجه ودخليها الفرن
معلومه مهمه الفرن اذا كان حار تخلص بسرعه ترا
وشوفي اذا كان يحتاج زياده ملح وحطي الرز عليه واتركيه لين يستوي
(انا اطبخه بالقدر العادي ماقد جربت الكاتم للرز) بهالوقت تكوني تقطعي سلطه ولاتنسين تحطين البصل اللي بالثلاجه اللي مقطع طوال وشيلي معه شوي زيت <<< طبعا هالخطوة اذا قرب يخلص الرز واذا حبيتي اغرسي فلفل بارد على الرز
(بالنسبة للدجاجه اذا مستعجله صفي الدجاجه زين من المويه واقليه بالزيت اذا قرب الرز يخلص وحطيه على ورق نشاف)
والمواعين طبعا جاهزة من الليل قدمي الرز والسلطه والعصير تكونين مجهزته من الليل او لبن حسب رغبة العائلة وبس..
الطريقه الثانيه هذي اذا عندك وقت الصبح تكونين حاطه الدجاجه من الليل بالثلاجه ومطلعة كيس الكشنه برضه من الليل اذا قمتي الصبح افتحي الكاتم وسوي الطريقه اللي فوق اللي هي(( حطي مويه بالغلاية وروحي للفرن حطي بالكاتم شوي مررررة زيت وحطي الكشنه حركيه شوي يتجانس حطي الدجاجة حركيه شوي معه تصير المويه جهزت شيلي المويه من الغلاية وحطيه عليه وسكري الكاتم )) وروحي البسي وتجهزي يصير خلص سكري النار
ونفس الكلام اذا كان صيف حطيه بالثلاجه هو والقدر الشتاء عادي وتوكلي على الله للدوام
اذا جيتي طلعيه من الثلاجه وانقعي الرز بموية دافيه وطلعي الدجاجه وحطيها بالفرن وصفي المرق وخليه يحتمي شوي وروحي غيري وارجعي ذوقي الملح بعدين حطي الرز وسوي السلطه ولاتنسين خطوة البصل على الرز وبالعافية
هذي الطريقه راح تختصر لك وقت كثييييييييييييييير بس قومي الصبح قبل وقتك بربع ساعه والظهر راح تكونين مرتاحه
لاتقولين هالطريقه صعبة... بالبداية بس راح تكون كذا لكن مع الايام راح تتعودين عليها و خاصة لما تشوفين نتيجتها راح تكون سهلة جدا بعد
وزوجك راح يتفاجأ بسرعة التحضير بكل الطريقتين :32:
وحاولي تغسلين المواعين حقت الطبخ اول بأول بس يبقى مواعين الأكل
دعواتكم واللي تجربها انتظر تعليقاتها على الطريقه
تحياتي لكم
ياقلبي كأنك حاسه في معاناتي
الله يسعدك دنيا وأخره