من بالليل محدش دخل منكم عالعموم كل سنة وانتم طيبين
انا بعت ايميل للدكتور عادل امبارح اسأله اعمل ايه فى التنشيط وبعتله اخر تحاليلى رد عليا بايميل انهارده قال استمر عالجلوكوفاج شهرين كمان وانزل وزنى اكتر من كده وبعد شهرين ان شاء الله انشط
انا وزنى 67 وطولى 161 ساعدونى انزل وزنى اكتر من كده ازاى وياريت ماتقولوش ريجيم لانى تقريبا مش باكل وكمان الجيم معنديش وقت ليه انتو عارفين بشتغل فترتين وحيلى مهدود لوحده بس وكمان فى المدرسة بلف الملعب مشى مرة فى الصباحى ومرة فى المسائى
انا بفكر اخد حبوب زى شيتوكال والحاجات دى بس مترددة انتو رأيكم ايه
اشتقت ساعدينى انتى ونيفو لانكم ليكم صولات وجولات مع الموضوع ده
من بالليل محدش دخل منكم عالعموم كل سنة وانتم طيبين
انا بعت ايميل للدكتور عادل امبارح اسأله اعمل...
أولا كل سنة و أنتى طيبة يا حبيبتى...و يا رب السنة دي تكون سنة خير عليكى و متخلصش إلا و ابنك فى حضنك يا قلبى....
بصى جميل أوي إنك محددة هتعملى إيه ...و الحمد لله إن رد الدكتور جه مؤيد للخطة ديه....أنتى كده قدامك 6 شهور على المنظار (يا رب ما تحتاجيله أبدا أبدا)......يبقى نقسمهم كالآتى....أول شهرين نوصل للوزن المثالى.....و الأربع شهور التالية تنشيط جيد.....و إن شاء الله قبل ما يخلصوا الست شهور يكون ربنا أكرمك من واسع فضله.....
أما بالنسبة لنظامك.....فاحنا مقدرين إنك بتتعبى وشغل فترتين ده شئ صعب أوي......لكن يا قلبى قلة الأكل عمرها ما كانت هى السبيل لفقد الوزن بشكل سليم.....بل إنها ساعات بتكون سبب فى زيادة الوزن...ده بالإضافة لضعف الجسم......
يبقى يا حبيبتى إحنا محتاجين نمشى على نظام مرتب...و ننفذه بحذافيره...و ممكن ده يساعدك تنزلى ال6 كيلو دول فى أقل من شهر.....و الدايت الكويس هو اللى يخليكى تاكلى أكتر من وجبة فى اليوم علشان جسمك يحرق بشكل كويس....و كمان يا ريت تكتري من السوائل لأنها بتساعد الجسم على الحرق أكتر...و كمان يا ريت دايما تخلى فى شنطتك ثمرة أو اتنين فاكهة من الأصناف المسموحة فى الريجيم علشان لما تجوعى تاكليها......و طبعا ده بجانب الاستمرار على المشى لانه هيحسن صحتك و هيساعد جسمك على النزول بشكل سريع و الاستفادة من الريجيم....
و لو تحبى...انا هارشحلك أول ريجيم مشيت عليه.....كان جميل و مريح و لما انتظمت عليه أسبوعين مع المشى نزلت 5 كيلو.....عقبالك يا رب كده لما تنزليهم بسرعة و تبدأي بقى تنشيط و نفرح بيكى قريب..
الأفطار اليومى....واحد من اختيارين...
1- 3 ملاعق فول بدون زيت + رغيف سن أو ربع رغيف بلدي + سلطة خضراء بدون طماطم
2- جبنة قريش + رغيف سن أو ربع رغيف بلدي + سلطة خضراء بدون طماطم
الغذاء اليومى...
- سلطة خضراء بدون فلفل رومى أو بصل أو جزر...أو خضار مسلوق فى ماء...أو خضار مطبوخ نى فى نى بدون شوربة و لا سمن (الأصناف المسموحة فاصوليا- بامية-كوسة)
- صنف واحد لحوم من الاختيارات الآتية:
لحم ...فراخ...سمكة مشوية...2بيضة مسلوقة...علبة تونة مصفاة من الزيت و مشطوفة بالخل...(ممنوع الكبدة و الجمبريعلى فكرة انا لما كنت بازهق من الاصناف ديه منت باكل كبدة او جمبري بس مسلوقين او مشويين)
العشاء اليومى..
صنف واحد فاكهة..و الكمية لا تزيد عن ربع كيلو...(ممنوع المانجو ز التين و العنب و البلح و الموز و المشمش و الكاكا)
نيجى للحاجات اللى ممكن ناخدها بحرية فى أي وقت فى اليوم لو حسينا بجوع...
1- خس أو خيار بأي كمية و فى اي وقت
2- أي مشروب من المشروبات التالية بشرط استخدام نوع من السكريات البديلة المناسبة للريجيم (على فكرة أفضلهم طعما بالنسبة لى هو الكندريل).....و هذه المشروبات قد تساعد فى الريجيم لان مطلوب اننا ناخد كمية سوائل كبيرة (شاي - قهوة- نسكافيه - كركدية - قرفة - تليو- ينسون - عصير ليمون - سفن أب دايت)
ملحوظة...يمكن التبديل فى المواعيد بين وجبتى العشاء و الغداء