ام مرمش وفرفش ... اخبارك ايه دلوقت ... ربنا يقومك بالسلامة

هدهود حبيبتي انا مش فاهمه ده غلطتك ولا غلطت الدكتور معقوله الدكتور اداكي تنشيط وما طلبش تتابعي دكتور ايه ده نفسي افهم بصي انا اشرحلك ايه الي مفروض يحصل وانتي فهميني ايه الي حاصل بالضبط
المفروض تاخدي حقن او حبوب الكلوميد حسب الحاله لمده من 3 الى 5 ايام الاولى من غير متابعه بعد كده لازم نتابع يوم اه ويوم لا ليه لان في بنات 7 ايام تنشيط وبيكونوا خلاص جاهزين الدكتور بيتابع البويضات اول ما احجامها تبقى من 17 الى 20 يديكي الحقنه التفجيريه في حالة التلقيح الصناعي لازم الدقه الشديده في تحديد موعيد الحقن ليه لان الحيونات المنويه في حاله التلقيح الصناعي بتقعد بس 6 الى 12 ساعه ليه لانها تقريبا تجاوزت ثلاث ارباع المسافه الي مفروض تعديها من المهبل لحد القنوات بتاعت فالوب مرورا بالرحم في حاله التلقيح بيحطوا الحيونات المنويه في الرحم وبالتالي بتقطع مسافه اقل وبتاخذ وقت اقل
طيب في دكاتره شيفين انهم يعملوا التلقيح الصناعي بعد 36 ساعه من اخذ الحقنه التفجيريه وده اغلب الداكاتره
بالنسبه لبطانه الرحم بيقولوا من 8 الى 13 وفي حمل بيحصل في 6 بس يعني انت الحمد لله ممتازه والحاجات الي بتخلى بطانه الرحم تزيد المواد التي تحتوي استروجين
انا دلوقتي شايفه انك تكنسلي التلقيح الصناعي المره ده ليه لانك اساسا مش عارفه امته حصل خروج للبويضات وما اخديش حقنه تفجيريه مفيش داعي نضيع فلوس على الفاضي بصراحه
اما بالنسبه للحقن حطيها في باب الثلاجه عشان حتحتجيها قدام وبنصحك بمركزين
مركز جنين بس زحمه قوي قوي قوي
في دكتور ماشاء الله شاطر قوي بيجي في قناة الناس عندوا مركز اسمه مركز الرجل والمراءه شكلوا كده مركز رايق وجديد بيجي يوم الجمعه اضربيلوا وشوفي ردوا عليكي ايه
ان شاء الله اكون جوبتك على كل الاسئله ولو في اي حاجه تانيه قوليلي

سارة .. انا بروح الشغل فى اتوبيس يعنى مقدرش اروح بدرى عن ميعادى ولا امشى متأخر ... ربنا كريم .. ححاول اتجرك بشويش واقول الدعاء ( بسم الله الذى لايضر مع اسمه شيئا فى الارض ولا فى السماء وهو السميع العليم ) قبل ما اعمل اى حاجة اظن فيها ضرر
الدعاء ده انا مجرباه مافيش مرة اقوله غير وربنا يحمينى من الضرر ...
واحكيلك حكاية زمان من حوالى 15 سنة تقريبا اختى كانت بتشتغل مدرسة فى حضانه ولقطت عدوى غدة نكافية من طفل هناك ... وانا بنام جنبها فى السرير وكنت بقول الدعاء ده كل يوم ... المدهش فى الموضوع ان اخواتى الولدين لقطوا منها العدوى وانا ربنا حفظنى الحمد لله

صباح الفل يا قمرات

يا رب تكونو كلكم بخير



رمال الف سلامة على مامتك
بصى انا ليا خبرة حلوة فى مضوع القساطر و الدعامات و المراكز الكويسة اللى فى مصر و احسن الدكاترة
عشان دا كان شغلى ففاهمة فيه كويس و عارفة خباياه كمان
المهم بصى فى حاجة جديدة فى الفاسكان اشعة بالصبغة بتعمل نفس عمل القسطرة بالظبط اسألى عليها
و اذا عاوزة اى سؤال لاى حاجة انا تحت امرك


سارة ربنا يكرمك يا حبيبتى
انا بجد حاسة باللى انتى حساه ربنا يكون فى عونك
الواحد مش بيرتاح الا فى بيته و يكون على راحته
اذا انا مكنتش مرتاحة و اسمى كنت عند ماما
مش عاشن حاجة غير انك مش على راحتك
ربنا يهون اللى فاضل يا رب



بنات انا عندى حاجة و مش عارفة دا ايه
بصو
انا لما كريم تم 3 شهور جاتلى اول بريود بعد الودلاة و بعدها جاتلى واحدة تانية و كان فى نفس الميعاد اللى كانت بتجيلى فيه قبل الولادة كل 26 يوم و كانت مظبوطة
دلوقتى بقالى شهرين دا تانى شهر
وقت التبويض بحس بوجع جامد قوى فى المبايض و بعدين متنزلش فى ميعادها
الشهر اللى فات اتأخرت 4 ايام و الشهر دا لحد دلوقتى يومين
تفتكرو دا ايه؟
جالى تكيس مثلا؟
انا شاكة فى هرمون البرولاكتين بس انا اصلا لما كنت برضع كريم كان بالعافية و مكانش فى حاجة بتنزل تفتكرو فى حاجة؟
طب ممنم يكون من الون جالى تكيس؟
انا وزنى دلوقتى 72 و طولى 164 تفتكرو دا وزن زايد قوى لدرجة التكيس؟
مش عارفة انا قلقانة و بفكر اروح للدكتور اشوف ايه اللى بيحصل جوا
بس قلت اخد رايكم الاول


دبرنى يا وزير؟

معاك حق والله يا اوكسي
انا الدعاء دة بردده على طول وخصوصا بعد العملية لوجيت اقوم من السرير او اتقلب على جنبي بقوله بصوره الية والحمدلله