شاطئ الامل عيب هالكلام

شفتي هالمسلسل الحلقه اللي توفت فيه وحده من المعلمات
عندنا بمحافظتنا توفوا بنفس اليوم الحلقه ذي اربع معلمات مع السائق
من عنيزه رايحين يدرسون بالخرمه
ووحده منهم من الجنوب توفت جايه تدرس من الجنوب بالوسطى وتوفت
طريق يخوف كثير يموتون فيه عجزين يصلحونه
وحده ان طفلين
ووحده حديثة الزواج
ووحده من الجنوب
توفوا بحادث شنيع بعنيز بطريق الخرمه

لا هو تاثر ولا تعسر
هذا الواقع
واذا تاثرت الاخت ترانا ياهل عنيزه لحد الحين متاثرين وسيرة هالمعلمات اللي توفوا ماراحت عن بالنا
كنت جايه قريب اذان المغرب واشوف زحمةةة سيارات بالسوق وكنت اخذ من محل غرض الا تمر سيارة زي الاسعاف بس شكلها تقل باص صغير غريب مكتوب عليه امرام الميت انا خفت وفز قلبي وتقشعر جلدي
ماكنت ادري وش السالفه ليش زحمة سيارات يالله دخلنا بسيارتنا وشرطه
ويوم ركب اخوي قال لنا نسيت اقولكم شفتوا الزحمه اليوم الظه صاير حادث لمعلمات عنيزه على طريق الخرمه جايات الظهر وسار حادث فانهم مع سياره ثانيه
وجهه بوجهه توفوا اربع معلمات وسواقهم
واثر السياره اللي مكتوب عليها احرام الميت جايبين المتوفيات يصلون عليهن المغرب لاحول ولاقوة الا بالله

ويوم جيت للبيت اهلي الا حاطين المسلسل حق المعلمات وصار حادث لمعلمه منهم وتوفت

مادري كيف تبينه ياختي يخل لراسك هالموضوع
اذا هي متضايقه الاخت صاحبة الموضوع حنا زيها وانا عاطله بالبيت قاعده متضايقه من هالسالفه
والله اعرف معلمات من اقاربي هي تصرف على بيتها وعيالها وتعطي ابوها وامها
ومطلقات وارامل من المعلمات وتضحي براحتها بهالطريق وتموت عشان عيالها واهلها


الله يرحمهم ويغفر لهم ويجعل قبورهم روضه من رياض الجنه ويصبر اهليهم على فراقهم من معلمات وسائق يارب

للاسف كم يوم و راح ينحذف الموضوع
لانه يلامس الواقع و كلام حقيقي بحجة انه غير مناسب للقسم
الله يعينكم و يساعدكم
راح يجوك بنات الله يصلحهم يخربو الموضوع بكلمة حقد و مكيدة ع البلد
و بالتالي الادارة راح تحذفه

لقيت 4 معلمات وسائقهن مصرعهم، فيما أُصيبت 4 أخريات، جراء حادث تصادم، ظهر الاربعاء 4 / 7 / 1437هـ، بين سيارة من نوع «فان»، تقل عدداً من المعلمات، و»دينا»، على تقاطع طريقي الخرما ? عنيزة.
وأظهرت صورة متداولة على موقع «تويتر»، مركبة المعلمات مدمرة بعد وقوع الحادث الذي أدى إلى وفاة 4 معلمات، فضلاً عن تناثر متعلقاتهن في محيط الحادث.
ودشَّن نشطاء وسماً بعنوان «#حادث_معلمات_طريق_عنيزة_الخرماء»، ليتصدر قائمة الوسوم في «تويتر»، يستنكرون فيه ما حدث، مشيرين إلى أن طريق الخرما ? عنيزة، كان قد شهد حوادث مماثلة من قبل، راح ضحيتها عددٌ من المعلمات والطالبات.
وأدى حادث تصادم مروري مروع بين سيارة من نوع فان تقل عددًا من المعلمات وسيارة دينا يقودها مقيم إلى وفاة 4 معلمات وسائقهن وإصابة 3 حالات على طريق خرما ? القصيم.
وأسماء المعلمات المتوفيات وسائقهن وفقا لموقع?:
1 ? وسام زايد العتيبي
2 ? منال عبدالله الرثيع
3 ? هند قبيل المطيري
4 ? كوثر محمد الزهراني
5 ? منير نخيلان المطيري ? قائد سيارة المعلمات.
الله يغفرلكم ويرحمكم ويجعل مثواكم الفردوس الاعلى من غير حساب ولا عقاب ويصبر اهاليكم على فراقكم

المسلسل يتكلم عن واقع واللي حابة تتاكد تروح لتاق حركةالنقل الخارجي وتشوف العدد المهول لطالبي النقل الخارجي


حياة المغتربات فيها معاناه وانا ما اتكلم من فراغ اتكلم من واقع اعيشة

المغتربات فأت فئة : تضطر تنقل لمنطقة بعيدة تبعد الاف الكيلو مترات

و الفئة هذي تنزل زيارة لعائلتها في الاجازات السنوية فقط

فئة تسافر بشكل اسبوعي وتبعد مدرستها بحدود 400الى600 و هذي زيارتها بالويكند فقط

فئة تكون المسافة من 100 إلى 300 ك اللي تقطعها لمدرستها بشكل يومي

و تعتبر الافضل من ناحية الاستقرار لكن الاكثر تعرض للخطر

طبعاً انا بحكم اني من الفئة الاخيرة اسافر بشكل يومي ما اقولك عن المعاناة و تعنت مديرات المدرسة

هذا غير الادارات التعليمية يكونوا متشددين بشكل خاص على المغتربات

العيشة للمعلمة المغتربة تختلف من منطقة لثانية على حسب اهالي المنطقة اللي تستقر فيها المعلمة

فيه بعض المناطق اهالها يكون متشددين و يختلفون في بعض الامور عن اللي تسكن المدن

وبالتالي يكون فيه تدقيق على تصرفات المعلمة حتى وان كانت عادية

اهالي المنطقة غالباً ما يستغلون المعلمات من ناحية السكن و المواصلات

حتى الطلبات يدبلون السعر بمجرد ان صاحبت الطلب معلمة مغتربة

بعض المحافظات الصغيرة و القرى اغلب المعلمات المستقرات فيها يكون اقارب او من عائلة وحدة

فبتكون هناك محاباة لبنت العم وبنت الخالة و الاخت و صديقة العائلة و المعلمة المغتربة تروح فيها


طبعاً البعض يتسال ايش اللي يخلي المعلمة تجازف بنفسها عشان الراتب

اغلب المعلمات فاتحين بيوت اهاليهم و الاغلب يكون الاب متقاعد والبنت تكون مضطرة ترد ولو جزاء من الجميل للاب

كثير معلمات ماخذين قروض اما تساعد ابوها بالبناء او تساعد اخوها للزواج او تساعد زوجها لتاسيس حياة كريم لابنائهم

مافي انسان يتحمل مخاطر يومية الا اذا كان مضطر و معلق الامل بالله بانه راح يجي يوم و يستقر بقرب اهله

حوادث و وفيات بشكل مستمر و كم من عزيزه فقدناها في خلال سنوات متتالية

نعم كلنا نقول الموت قضاء وقدر و اجل مكتوب لكل البشر

لكن هناك اسباب ممكن تكون ساهمة في الحادث

زميلاتنا اللي فقدناهم كان السبب الاكبر من ادارة التعليم و من مديرة المدرسة

التوقيع تحت الخط ممنوع (لازم يكون حضورك مثل اللي ساكنة جنب بيتها)

الخروج قبل نهاية الدوام ممنوع (حتى وان كان ماعندك حصص)

السواق اذا يطلع قبل الفجر مضطر يصحى بدري 1او 1,30 (غالبا يكون ماخذ كفايته من النوم)

تعنت بعض المديرات بتسليم المغتربات انشطة و مناوبات حتى تضطرها للجلوس اخر الدوام

بعض المديرات مافيه قلبها ذرة رحمة (زميلة لنا ابنتها من ذوي الاحتيجات الخاصة و دخلت بنتها تنويم لاجراء عملية

تلكم مديرتها وتشرح وضعها و انها مضطرة للبقاء بقرب بنتها كان رد المديرة بكل برود عندها ابوها يجلس معاها في المستشفى....!!)

الادارات التعليمية بالاتفاق مع المديرات يسعون بندب المعلمات المغتربات لمناطق بعيده في الهجر والقرى الغير مرغوب فيها من بنات المنطقة

طبعا في المقابل فيه مديرات مدارس ما نهضم حقهم

تتجاوز عن المغتربات في التوقيع الصباحي تحت الخط

تعطي المعلمة المغتربة الاحقية في تنسيق جدول الحصص بحيث خروجها يكون ع الساعة 11 صباحا

تلغي المناوبة عن المعلمة المغتربة وغيره وغيرة

وهذا النوع لهم دعوات بظهر قلب ان الله يسخر لهم خلقه و يعطيهم الين يرضيهم

اما المتعنتات و المستبدات

في كل يوم نطلع للمدرسة او نرجع من المدرسة

حسبي الله و نعم الوكيل فيهم

في يدهم صلاحيات و امور كثيرة ممكن تتجاوز عنها مديرة المدرسة الا ان العنجهية تطغى على بعضهن

ممكن البعض يقول المعلمة تشتري راحتها و تقدم استقلاتها

لكن للاسف الحياة صارات صعبة و العيشة كل مرة تصعب و الغلا بارتفاع اذا عندك اطفال محتاجين افضل مدارس

محتاجين افضل البس محتاجين و محتاجين

كل التعب و الارق اللي نعانية ينمسح لما تشوف المعلمة المغتربة الفرحة على وجه طفلها

او السعادة في نظر امها او العزة في شخص والدها

كل شي له ضريبة و كل السعادة اللي حصلنا عليها لنا او لمن نحب ضريبتها

البـــــــــــــــــــعد و الاغترابــــــــــــــــــــــ ـــــا

لذلك اذا لم ينظر لهن بعين الرحمة من قبل كل مسؤول بيده صلاحية حتى وان كانت 1%







سيطــــــــــــــول مسلسل المعلـــمات المغتـــــربات