طفح الكيل يا بنات حواء تعالوا نتعاون لمحو هذي الظاهرة المخجلة

السلام عليكم ورحمة الله وبركاته

بسم الله والصلاة والسلام على رسول الله

أخواتي الغاليات بدون مقدمات اليوم أبي أطرح موضوع من زمان يقرقع في خاطري وصراحة غاثني بشكل

ماتتصورونه ومسبب لي معاناة مع عائلتي إذا سافرنا داخل بلدنا الغالي لأنا عائلة كثيرة السفر عن طريق البر بحكم بعد

أهلنا عنا على الأقل نسافر مرتين في السنة والمنطقة بعيدة شوي يعني لازم نوقف مرة أو مرتين للصلاة وقضاء الحاجة

أكرمكم الله وهنا المعضلة ومربط الفرس في موضوعي اليوم لاشك أخواتي أنكم خمنتم عن أيش بتكلم ....... اليوم

سلمكم الله بتكلم عن الأستراحات وما أدراك ما الأستراحات أستراحات الطرق السريعة أو بمعنى أصح معاناة الطرق

السريعة و أكيد أن معضمكم قد سافر عن طريق البر ومر على هذي الأستراحات والمحطات وشاف مستوى النظافة

الهائل اللي تتمتع فيه وهذا حالي :icon33: أذا دخلتها و الله يا خواتي شي فضيع وأكثر الأحيان نتركها ونروح البر

نتوضى واغسل لعيالي رغم أني أخاف من الوقوف في البر بس على الأقل أرض الله نظيفة خواتي والله يخطر على

بالي سؤال إذا شفت هالمناظر أقول معقول هالحريم عايشات بينا يعني فيه حرمة ترضى ترمي حفاضة بزرها أو فوطتها

القذرة أكرمكم الله قدام الناس والمسلمين ليش ؟؟؟؟ يعني هي في بيتها ترضى تسوي هذا الفعل المشين !!!! طبعاً مو

معقول لأن الناس أقل شي بيقولونه عليها أنها أنسانة قذرة طيب ليه تسوينه برا بيتك ؟؟؟!!!! عشان ما حد يعرفك ما حد

يدري أن هذا فعل فلانة عيب عيب عيب والله عيب عيب تكونين نظيفة داخل بيتك وقذرة برا ليش هالتناقض العجيب يعني

ما معك كيس في السيارة تحطين فيه مخلفاتك وترمينه في برميل الزبالة وتغسلين وسخ عيالك أذا قضوا حاجتهم أكرمكم

الله خواتي أنا ما أقصدكم أنتم يا بنات حواء بهذي الأفعال فأنا أفترض فيكم الخير الكثير أحسبكم والله حسيبكم وأربو بكم

عن هذا الفعل المشين لكن طرحت هذا الموضوع حتى نتعاون في النصح والتوعية عن هذي الظاهرة المخجلة يعني لو

أنا أنصح وأنتي تنصحين وأختك تنصح وأختي تنصح أن شاء الله يرتفع مستوى الوعي عندنا صحيح ان هالأماكن

ينقصها العديد من الخدمات الأساسية من النظافة العامة والأكل الجيد لكن حنا نبدأ بأنفسنا ونسوي اللي علينا وما نترك

مخلفاتنا ورانا وانا سمعت ان هناك مشاريع وخطط لتحسين خدمات الطرق البرية والله يا خواتي أنه شي مخجل نكون

بلد الحرمين الشريفين ويأتينا كل عام المئات بل الآلاف من زوار الحرمين الشريفين ويمرون بهالأماكن ويشوفون مثل

هذي المناظر وش بيقولون علينا أكيد بيقولون الشعب السعودي شعب وسخ خواتي أدري طولت عليكم وقرقت كثير بس

والله من حر ما فيني عاد ياليت تتفاعلون مع الموضوع وتثرونه بآرائكم ...... والسلام عليكم