طفشت من زوجي ومليت منه ومن اسلوبه

السلام عليكم
اول مشاركه لي في المنتدى واتمنى تساعدوني وتخففون عني تعبت من حياتي الناس فرحانه برمضان وانا اول يوم ابكي لين صدعت ميييلت من حياتي ليتني ماتزوجت وجلست مع امي
عمري 35 سنه وتزوجت من اربع شهور اخو زوجه اخوي وافقت عليه غصب عني اخوي مستحيل يرفضه عشان زوجته لا تزعل واخواني وقفو معاه بعد ماملكت اكتشفت انه مايسوق وخجووووول جدا بعد الزواج حسيت انه مب طبيعي يستحي مني اذا رجال يستحي انا البنت وش اسوي له
تم الزواج وكان مع اخوه في نفس الليله وطبعا بحكم انا زوجي خجول وماله شخصيه عند اخوانه كل شي حجزته زوجه اخوه من كوشه وضيافه وبطاقات الزواج وحتى تحديد لليله الزواج تمت بختيارها حدد مع اخوه ليله ومارضت وغيرتها بكيفها و ياليلتها وقفت على كذا حتى ليله الزواج المفروض انا زوجه الكبير انزف قبل مارضت سوت فوضى في الزواج وقالت انا انزف قبل
انا الصغيره ويحق لي انزف وانبسط قبل مع انا شغلو زفتي وبطلع انزف اخترب كل شي ووصل للرجال كلمني اخوي قالي خليك انتي اكبر واعقل منها وخليها تنزف قبلك انزفت وخلصت وشبعت رقص وبنزف انا قالو بيدخلون اخوانها وعيال اخوانها يصورون دخلو ورقص واستهبال وانا جالسه على نار مليت والله حدي ببكي خواتي يصبروني لايخترب المكياج والله العظيم مانزفيت الا الصاله فاضيه كل اهلي مشو طفشو
وزوجي المصون ماتكلم ولاشي بعد مارحنا الشقه مالي خلق له قلت له تعبانه ومصدعه قالي زعلتي قلت له وش رايك يعني بالي صار قالي صبري ووووبس
زوجي عمره 39 سنه واخوانه اصغر منه ومتزوجين وعندهم عيال
اكتشفت بعد انه انطوائي لا اصحاب ولا شي من العمل للبيت ومن البيت للمسجد والبقاله ووووبس مايروح مكان كلامه قليل معاي اربعه شهور محبوسه معاه اهله من النوع الي مايحبون زوجات اخوانهم يجمعون معاهم الا بعزومه يدقون علي ويعزموني انزل لهم ساكنه معاهم في نفس البيت
اهلي ساكنين في منطقه ثانيه ويجون دايم للمنطقه الي انا ساكنه فيها مع زوجي يجي اخوي ياخذني ويرجعني اخر الليل
عندي اختين واخو ساكن في نفس المنطقه اذا قلت لهم تعالو لي قالو نستحى زوجك كلا جالس مايطلع اقول لهم ينزل عند اهله واخوي كلا يكلمني اذا ابي اروح مكان يوديني واستحي اطلب منه مره طلبت منه اروح مجمع ووداني مع زوجي والله العظيم يمشي مرتبك ومنزل راسه طلبت منه يجيب عشى واقف له ساعه الي يجي ويتقدم عليه والي يوخره اشوي وهو حضرته ساكت انقهرت كلمت اخوي قلت له تعال وكذبت على زوجي قلت له خلاص مابي اخوي بيجي
ورجعت البيت نمت وانا ابكي على حظى
آآآآآآه حتى علاقتنا الخاصه يستشيرني اذا ابي او لا واذا كنت تعبانه او لا .. مره كذبت عليه قلت له تعبانه فيني التهاب وصدق ومن ساعتها مب عارف وش يسوي يقولي اكلم اخوي يوديك المستشفى كل اشوي يعيديها قلت له اختي قالت لي على علاج وان شاء الله بخف
رحت مع اخوي يومين لاهلي كل اشوي متى بجين متى بجين ويكلم اخوي الا يرجعني يخاف ما ارجع له
احسه مب واثق من نفسه كلا يسالني تحبني مرتاحه معاي او لا
مقاضى رمضان من اخوه هو الي شرا لنا كلا اكلنا من اخوه الا حاجات بسيطه من بقاله يشتريها والله انقهر على نفسي اذا شفت خواتي يرسلون طالعاتهم وين يرحون ويتمشون وانا محبوسه مع انهم مايقصرون ويقولون لي اروح معاهم بس احس فشيله اروح معاهم
قلت له ابي اصوم اسبوع عند اهلي قالي لا قلت له ليش قالي وانا انقهرت منه قلت له وش فيك قالي تعودت عليك واضيع من دونك قلت له انت رجال وكل سنه تصوم مع اهلك الحين تعودت علي بعصيبه وهاوشته من قهري والله ماتكلم وما فتح فمه بكلمه وناااام
اذا طلب مني شي مايطلبه بصيغه امر لا كانه يترجاني او يقول وش رايك
نام من غير سحور شكله زعلان لاني ابي اروح لاهلي
آآآه يازين حياتي مع امي مرتاحه ورمضان عندنا غير كل يوم اخواني وعيالهم يجون ونطبخ سوا وسوالف مع بعض والسنه لحالي مع زوج اشبه بالرجل الالي ماله كلمه ولا شخصيه ويخاف علي
اذا كنا مع بعض احس انا الرجال وهو الحرمه
شسوي مليت افكر اروح لاهلي ومارجع له بس اخاف اخوي مايرضى وتصير مشاكل مع زوجته يكفي الي سواه فيني وماعلمني عنه شي والله مرات اتحسب على اخوي ليش يسوي كذا
عذروني اذا كلامي ملخبط اكتب وانا مقهوره والي كتبته شي قليل عنه