طفلتي والتنمر اللي حاصل لها بسبب شكلها

سلام عليكم انا عندي بنت بكري الان عمرها 5 سنوات و9 شهور طولها 104. وزنها 14.1ضعيفه جدا قصتي معها من يوم جبتها لاحظت عليها من عمر 7 شهور البنت تغيرت ماعاد قامت تاكل وتصد عن الاكل المهم بحكم انها بكر اول اطفالي انا مو عارفه ايش فيها وكنت بغربه وديتها مستشفى قالوا لي طبيعيه يمكن غازات المهم كبرت وبس تبي ترضع ماتبي الاكل المهم جا عمرها سنتين كامله فطمتها قلت يمكن تتغير وتاكل لان مو اي شي يعجبها وترفض وفوق كذا يوم بنتي بدت تتكلم بديت افهمها بدت تاكل شوي وتنوع بالاكل بعض المرات وتقول لي بطني يوجعني ماما.. علما من جبتها وهي ماتدخل الحمام يوميا تجلس اربع ايام خمسه ماتدخل وللان.المهم وديتها سويت لها تحليل براز بعمر 3 سنوات قالوا لي معها جرثومة المعدةوعندها عسر بالهضم يعني الاكل يطول ع ماينهضم عندها وهي اساسا ماتفرغ يوميا بالحمام فيسبب لها تراكمات وشبع وصد شهيه عطاني مكملات غذائية لهاوحليب لعسر الهضم ومنها فيه سعرات عاليه عشان تسمن شوي اسمه فونت اكتيف شراب المهم شريتهوبديت اشربها ترفض وبعد محاولات البنت بدتت تتقبل لما ادمنت عليه.. هنا انا فهمت ان ممكن تنقبل الاكل الباقي اللي مايعجبها بس بالتدريج ماتركها ع كيفها.. تحسنت صحه البنت شوي طبعا لان هو قالي 3 مرات باليوم بس انا اعطيها مره لانه غالي العلبه ب11 ريال سعودي يبيلها ميزانيه.. قمت شريت معه سيريلاك وقلت لازم اعلمها عليه والحمد لله حبته لكنمشكلتي ماتسمن ماتسمن وفجأه لكلت وجتها الحاله تستفرغ ومرات تكون طبيعيه..كبرت ومازالت نفس المشكله امساك عسر هضم قيلون يتهيج لكلت اي شيماتدخل الحمام الا بفترات طويله ضعيفه جداوفوق كذا ماتطول بسرعهرحت سويت لها فحص شامل اتطمن عليها يوم كبرت قالي الطول تمام يمكن وراثه اما بطنها معها متلازمه القيلون الهضمي ولكبرت يروح لحاله 5 بالميه يجي الاطفال ولازم اكل معين ومن ذا الكلاموانا معها معها للان تحسن اكلها وزادت وجباتها افضل من يومها صغيره بس وزنها مايزيد الا نقطه بالسنه مدري هو جسمها يحرق مدري وش اسوي وربي انواع الحليب شريته والفيتامينات وكل شي ابكي ع حالها قسم بالله وفوق اللي زاد همي زود لشافوها الناس يقولنها بوجهها وش فيها ماتكبر ليه وجهها اصفر شاحب ليه مافيها خدود ليه ضعيفه ليه سمرا قسم بالله ماهموني وانا امها وادرا في بنتي.. بس هي كبرت الان وتسمع وتفهم وتتاثر احاول ارقع الموضوع واكلمها وامدحها واضمها وكل شيبس للان البنت تكره نفسها تقارن نفسها باختها اللي اصغر منها تقولي مايوجعها بطنها زيي وفيها خدود وسمينه طويله وربي مستغربه بنجن طفله تقول كذا ليه الناس مايحسون كل من ادخل بيت توني حتى عباتي مافصختها شهقوا كانهم شايفين مخلوق فضائي يوه ماسمنت ماكبرت مانصدق عمرها كذا كانها اصغو ويجلسون يحللونها من فوق لتحت واجلس اجادلهم ووقفهم عن حدهم لكن وش الفايده يوم بنتي سمعت كلامهم وحطته في خاطرهاوربي اكتب وافضفض لكم تعبانه من جوا من ناحيتين الناحيه الأولى تعب باطنيتها واحاتيها واذا ماكلت كاني انا مااكلت وابكي بيني بين نفسي اذا شفتها تستفرغ فجاه او ماتاكل كان التعب اللي فيها فيني... اتمنى تطيب بس الحمد لله على كل حالوالشي الثاني انها تقول عن نفسها انها ماهي حلوه تعبت وانا احفزها وامدحها واطلع فيها الجوانب الزينه والحين هي روضه وذكيه جدا وشاطرهبس الناس حسبي الله ونعم الوكيل عقدوا بنتي اخاف تكبر ياثر عليها تعبت نفسيتي مدري دلوني وش اسوي اذا فيه احد جرب مثل قصتي وش سوت عشان اعالج الامرين.