طفلي ابن ال 8 اشهر والبكااااء

السلام عليكم يا حوائيات،، اول موضوع لي اطرحه الان بين ايديكن ويؤسفني ان تكون مشكله ،،
اثق في رايكن ومشورتكن وارجو من الله ان يضع حل مشكلتي على ايديكن ،،
ابدأ بسرد المشكله وعذرا سأتخلى عن الفصحى واتكلم بلهجتي حتى اخرج مكنون قلبي :)

بعد سنه زواج رزقني ربي حمل سار بالصدفه ،، وم اخبي عليكم اني اكتئبت بدايه حملي لاني ماكنت ابغى الحمل يسير بالسرعه دي ولان وضعنا المادي كان صعب شوي ،، مر حملي بصعوبه ومريت بالآم كتيره و ولاده عسره ،، طبعا بعد محاولات لتوليدي طبيعي ضليت في المخاض قرابه يوم كامل وفي الاخير قررو انو يولدوني بعمليه قيصريه لانو كل محاولات التوليد الطبيعي فشلت وما اكزب عليكم لو قلت لكم اني شارفت ع الموت ،، سبحان الله الحوض عندي سليم وطفلي سليم وحجمو طبيعي وكل شي تمام لكن مشيئه ربي فوق كل شي

ولدت و رزقني ربي طفل سليم والحمدلله ،، لكن مشكلته مع البكاء مشكله ،، كتير منكم يمكن لو شافو الموضوع ح يقولو بكاء الاطفال دي مشكله كل الامهات لكن اقولكم بليز كملو قراءه موضوعي كامل بعدين احكمو

بنات طفلي بكاااااااء بكاء مو طبيعي ،، لمن كان نفاس يا بنات كانت تجيه حالات يبقى احيانا قريب ال 18 ساعه صاحي ويبكي بكاء مستمر ،، طفل عمرو ايام ما يستحمل ساعه صاحي الا ماينام بعدها لكن طفلي غير ،، اتزكر لمن كنا انا وابوه ناخدو نتمشى فيه بالسياره عشان ينام او نوقف فيه ونهشهشو ونغني لو لكن بدون فايده ،، اخواتي صاحبات التجربه كنت اعطيهم ولدي ساعات بس عشان انام شويا واسترد نشاطي كانو يرجعوه ليا وهوا على نفس الحال اللي راح فيها ،، اخواتي يا بنات كبيرات وكل وحده عندها ما لا يقل عن 7 الله يخليهم ليهم وقريب ح يزوجو بنات يعني لاتقولو ماعندهم خبره او ماعرفويتصرفو ،، واله يا بنات ماعاد احد يبغى يمسك لي ولدي حتى للمشاوير الخفيفه الكل يتعذر بأنو بكاي
والله يا بنات من اول نفاس ولدي وانا اجلسو عليا عشان يسكت اعرف دا مو شي صحيح ويضر الظهر بس الشكوى لله دا الولد طول عمرو جالس اني احطو ع الارض دا شي مستحيل ،، كانو اهلي يصبروني بكلمه يكبر ويعقل كل الاطفال بكايين وطبعا مالي الا الصبر والاحتساب على امل يكبر ويعقل ،، اللي يحصل العكس تماما كل ما يتقدم بالاشهر يزيد بكاء ومتطلبات في البدايه كان يسكتو الشيل بعدين يبغى يجلس عليا والان لمن سار يجلس من وحدو يبغاني اكون جنبه طول الوقت ،، وربي يابنات ما ابالغ بكلامي ملييييت الوضع ابغى اقوم اشتغل ابغى اهتم بنفسي زي اول ابغى اطبخ ابغى اجلس مع زوجي بدون صريخ وبكا ،، آه يا بيتي سرت اراكم الشغل الين يصعب عليا سرت اعتبرها غنيمه لمن اخش الحمام وهوا ساكت سرت اخش اتحمم واخرج الم شعري حتى التمشيط اوقات ما الحق لانو يبكي ويبغاني اشيلو والعبو

آه يا بنات ارجوكم لاتقولو عادي وطبيعي لانو والله مو عادي وطبيعي كل الناس تخلف ماعمرو احد مر عليه زي ولدي ام زوجي تحاول تنصحني وتوجهني وتقولي ولدك بكاي بزايده ماعمري شفت طفل زيه زهيا عندها درزن ماشالله ،، الكل يتأفف منو ومن بكاه ماحد يتحملو مايدرو اني اوقات ابغى ارميه من الشباك انا بكبري ،، يبغاني اكلمو طول الوقت والعبو لو التهي عنو بشي في يدي وانا جالسه جنبو يبدا صريخ وبكا ،، للعلم هوا يجلس من وحدو الان يعني المفروض يلتهي بنفسو والعابو ،، عرضتو على اطباء يقولو عادي بالعكس الطفل البكاي كويس :30: من فين كويس الله يمتحنكم انا طبعا لانو مو عارفين الوضع الحقيقي ولانو دي شكوى كل الامهات فما ياخدوها بشكل جدي

اهملتحالي وسرت مقربعه والبيت غالبا يكون مكركب والله والله يا بنات اني انسانه نظيفه ومرتبه بس والله ما الحق اشتغل والله وبدون مبالغه كل وقتي لولدي من نصحى الين ننام

اعرف طولت عليكم بالهرجه سامحوني ،، ارجوكم يا بنات اللي عندها طفل زيو مع اني اشك تقولي كيف الوضع ،، اللي عندها برنامج يخليه يتخلص من عاده البكا تقولي ،، اللي عمدها العاب معينه تشغلو عني تقولي ،، اه يا بنات انا واخوات زوجي واغلب اخواتي ولدنا في نفس الفتره وكل اولادهم اللي يحبي واللي امو تحطو ساعات والله جالس يلعب واللي كان بكاي بس ع الاقل عقل لمن سار عمرو 4 شهور ،، وانا ولدي بس فاتح جاعورتو ،، دلوني خبروني انصحوني انا ام لاول مره واتعقدت حتى زوجي يقول لاعاد تقولي نبغا بزوره


اترككم فؤ حفظ الله