طمنينا

لا حول ولا قوة الا بالله
اسال الله العظيم ان يشفيه ويشفي جميع مرضى المسلمين
انا اتوقع ان الشيب من الخوف
طول الوقت حصنيه
وابدا لاتشغلي اغاني
وخلي القران شغال حتى وانتو نايمين
وكل الدبب والالعاب اتخلصي منها
وجيبو شيخ ثقة يقرا في بيتكم،ويرقيكم
وانا اشوف احسن،تنقلو من البيت اذا الولد يشوف اشياء

هدي كلها بتاثر عليه
الله يحميه يارب ويبعد عنكم كل سوء

الله يجزاكم خير ويوفقكم
والله ماني عارفة شلون ارد جميلكم ووقفتكم معي اخواتي الا في دعوات لكم بالتوفيق والسعادة اسال الله ان يتقبلها
هذي الشقة تونا ساكنينها قبل حوالي كم شهر اسال الله ان يعطينا خيرها ويكفينا شرها غيرنا الشقة اللي طلع فيها النمل الله يبعده عنا ويكفينا شره
الاغاني والله ياخواتي الحمدلله مااسمعهم من سنوات كثيرة ولله الحمد والمنة ولا اتابع مسلسلات ولا تلفزيون
يومي كله اقضيه الحقه احاول اشربه بالابرة ماي او خضار مسلوقة والا الله يكرمكم امسح في تطريشه والا اغسل ملابس وفرش وامسح ارضيات اسأل الله الذي جلت قدرته وتعالت عظمتة ووسعت رحمته ومغفرته كل شي ان يرفع عنه مايجد ومايعاني وان يشفيه شفاءا عاجلا لايغادر سقما وان يرحم ضعفنا وقلة حيلتنا ياحي ياقيوم

قمت اشغل القرآن دايما في البيت ولاحظت ان كان عندنا حشرات صغيرة جدا تطير بالعافية تنشاف بعد ماسكنا الشقة يمكن بشهر
بدينا نشوفها بعد ماشغلت القرآن يوميا الحمدلله والشكر بدت تختفي ماباقي الا كم وحدة الحمدلله
طفى جهاز القرآن امس بطاريته وانشغلت ماشغلته وسبحان الله رجعت اشوفها اليوم لا إله الا الله الله يكفينا شرها
اللي مجنني انه اذا كنت ماسكة المسكين وهو يطرش يجون يطيرون حوالينه ويدورون على راسه يرفعون ضغطي كل مرة مدري اضربهم في يدي والا امسك صدره وبطنه وهو يطرش الله يشفيه
مدري متى يطلعون ومدري وين يختفون ووين يكونون
كان له موعد الاسبوع اللي فات عند خبيرة التغذية عشان وزنه تحت المعدل نحيف
وكنت متفاءلة خير واحسب متى بس يجي الموعد عشان تفيدني وتعلمني شنو اعطيه ينفعه ويزيد وزنه ومناعته الضعيف واقول لها شوفي شعره شيب
وانصدمت صراحة يوم قابلناها انا وابوه يوم شافته وقرت ملفه وانه ماياكل اكل ولايشرب ماء ولا سوائل ويطرش يوميا ووزنه نحيف وشافت الشيب سكتت شوي تقلب في الاوراق وانا متحمسة
وسألتني ياكل جبن قلت لا قالت لحم او سمك قلت لا قالت بيض ..لا بسكويت لا فول او حمص لا
نشويات خبز لا معكرونه لا فواكه لا عصيرات لا قلت لها ليت الله يعافيه ويشرب ماء مثل باقي الخلق لاحقين على العصيرات
قالت صراحة انا ماعرف اتعامل معاه مادري ليش الجهاز الهضمي محولينكم علي ؟؟؟
الطفل وزنه نحيف وطبيعة اكله وشربه غريبة وصراحة مااقدر اقولك الا الله ياجرك على صبرك واحتسبي الاجر والله يشفيه ويعافيه
قلت الله يجزاك خير طيب قولي لي اي شي عطيني لو وصفة وحدة قالت مادري شنو اعطيك اعطيك برنامج تغذية حق ابو 5 و6 شهور وولدك كمل السنة ؟ والا اعطيك حق 10 شهور والا حق السنة والسنتين مادري والله انا مااقدر افيدك بشي الا انك حاولي ماينقص عنه الكالسيوم كثري له الزبادي وعطتني اوراق فيها تغذية واكل لكن مايقدر عليها طفلي كلها جبن وبيض ولحوم وارز وخضار وفواكه وخبز وتوست ومدري شنو ؟
قلت الله يعطيك العافية ومشيت واحباط الدنيا كله فيني لك الحمد والشكر يارب على ماقضيت والله يعوض وليدي ويعوضني على صبرنا خير وعافية
باقي الاسبوع الجاي موعده حق الجهاز الهضمي اللي عطونا مهلة شهر قبل العملية وبيشوفون وضعه يمكن يحولونه على منظار والله يعين قليبه يارب يالله تشفيه لي وتعافيه وتخليه لعيوني ياكريم

قبل شوي حطيت العشا يوم شافنا بناكل جا يحبي وقعد عند الصحن ويلمس باصابعه الارز وبعدين يرفع يده ويهز راسه ويضرب في يده الصحن ووجهه يلون ويرتعش استغفر الله مثل حركاته اذا جاء يطرش ويرجع ورى يعني لاتأكلوني مايبيه كل مرة يسوي كذا بعدين يبعد عنا شوي ويقعد يتفرج علينا واحنا ناكل ويفتح فمه بالهواء ويسوي ياكل مثلنا من بعيد بالله تخيلوا المنظر يقطع القلب وشوي يطالع لابوه وشوي يطالع لي والله العظيم انها تنسد نفسي وماآكل وتجيني غصة بقلبي مافي أم بالدنيا تنزل لها لقمة وطفلها جوعان يتفرج عليها لاحول ولاقوة الا بالله كل مرة اغصبه ياكل ويهرب عنا مايبي
هالمرة قلت اسوي نفسي مااطالع له وناكل طبيعي عشان احسسه ان الوضع طبيعي واحنا ناكل ولانطرش ويرجع يشوفنا ويقرب
عطيته بطاطس مسلوقه هرستها له اخذ منها لقمتين صغار كبر حبة الفاصوليا بعدين قعد يلون وجهه وطلع اللقمة ورماها بالارض ونطير انا وابوه ننفض يدينا من العشا ونغير القناة بالتلفزيون وانا اركض احط عند رجلينه العاب نبي نشغله عن فكرة التطريش ومافي امل طرش حتى رضعته اللي قبل 4 ساعات مانهضم الحليب سبحان الله وقام ابوه يهاوش تاكلينه ليييش انتي على بالك هذا طبيعي مثل باقي الاطفال ؟
مستانسة اكل لقمة ليش تعطينه الثانية وانا تنسد نفسي عن العشا وجتني غصة بحلقي
ودي افضفض لكم ياخواتي ماعندي احد افضفض له بعد الله غيركم
انا أم ودي ولدي ياكل مثل باقي الاطفال ويصح ويتعافى وتقوى مناعته نفسي يقعد معانا ياكل جبن وبيض وفول وتوست وفواكه وبسكويت وبطاطس وشيبس ويشرب ماء مثل باقي الاطفال والله العظيم اني اجيب العصيرات والزبادي بالفواكه ودانينو ودانيت وكريم كراميل وكاسترد وحليبات بالفواكه وبسكويت اطفال خاص واملا الثلاجة واقول بكرة بيصحى ولدي طبيعي مثل باقي الاطفال ومايطرش ان شاء الله وبعطيه شي منهم ويمر بكرة ويطرش وتقلب معدته ومايرضى ياخذ منهم شي واذا عطيته شيبسيط لو ملعقة وتحايلت عليه نص ساعة ورجعه علي مع رضعته وتندمت اني حاولت آآكله استغفر الله ياربي
وربي اني كل مرة اشتري وينتهي تاريخهم وارميهم الين قبل امس طلعت كل اللي في الثلاجة منتهىي تاريخهم ماباقي الا شي بسيط بعد اسبوع بينتهي تاريخهم وارميهم الله المستعان

وبعد ماطرش على العشا كل اللي ف بطنه داخ مسكين وغسلت وجهه ونام عالارض ورب البيت تقطعععع قلبي عليه الى متى وهذا حاله كل مانحط اكلنا يجي يحبي مسرع ويقعدعالسفرة ويمد يده ويرجعها مخترع ويرجع ورى ويقعد يتفرج علينا من بعيد واحنا ناكل على هالحال والله لو يشوفني اغسل رضاعاته يجي جنبي ويطلع لسانه ويسوي نفسه بيطرش ويكحكح لين اخذه وابعده عني لايشوفهم والا اشغله باي شي واغسلهم بعدين استغفر الله ورب البيت مامر علي بحياتي طفل مثله
واللي عندي مو حاسين فيني وفي معاناتي كل ماصادفت احد قالوا لي خلاص لاتأكلينه اتركيه !! اتركه الى متى
الحين اعطيه سيريلاك ويطرشه بعد وخضار مسلوقة اكل ابو 4 و5 شهور الحمدلله والشكر على كل شي
والماء لازم نتجمع عليه كل يومين بالابرة نشفط له 3 مل وصراخ وصياح ويشرق وحاله واحيانا يطرش
والفيتامينات كلها طعمها سكر حالي وهو متحسس من كثر التطريش من اعطيه بالابرة فيتامين رجعه بحضني هو والرضاعة الثلاث او اربع ارقام اللي رضعها قبل 4 او 5 ساعات لله المشتكى ولاحول ولاقوة الا بالله
كان املي كبير استغفر الله انه اذا كمل سنة بيوقف تطريش وبياكل طبيعي مثل باقي الاطفال كنت احسب الشهور وكل ماطرش اقول هانت مابقى شي ويكمل سنة وكمل سنة والوضع على ماهو عليه
ياااارب يالله يامن بيده كل شي امنن علينا بكرمك وعطفك ورحمتك وانزل من عندك شفاء علينا يارحمن الدنيا والآخرة يارحيم يااللــه يا اللــــه ياااللــه

لا تقولين عساه بصحتي ولا فيه
ما يجوز تدعين على نفسك ولا يجوز انك تعترضين على قضاء ربي وقدره
لان هو اللي مقدر له كذا و انتي تدعين على نفسك ,,
اختي الكبيره لما كان بعمر 7 او 8 سنين جاها شيب مو بكل شعرها لا
بس خصل و بكذا مكان من قداام و اسفل الراس عند الرقبه
جاها الشيب من خرعه وطلع شيب براسها
شوفي حبيبتي كلمي لك شيخ دقي عليه و قولي له
قولي انه تجيه زي الرعشه وتنفضه وبعدين عادي يصير
و قولي يبكي بالليل مرعوب وطلع له شيب
و بيقولك اكيد وش فيه و يشخص حالته
بعض العيون تسبب مس , انا مابي اخوفك وربي بس الاحتياط واجب
شغلي سورة البقره اذا كان قاعد او وهو يلعب تكون على طول حول مسمعه
وحصنيه كل فجر ومغرب حتى لو هو نايم روحي و حصنيه بالاذكار و ارجعي
شربيه موية زمزم و انوي شفاءه فيها و خليك متيقنه انه راح يشفيه
ولا تنبهينه ان لحظه بجيب لك مويه ثانيه اللي هي زمزم
لا خليها جاهزه وشربيه لا تحسسينه انها غير ,,
اذا فيه بغرفته حاطه استكرات رسوم وشخصيات شيليهم
و اذا عنده العاب بغرفته دبب و دمى وهالسوالف طلعيهم عنه
يمكن يتخيل فيهم شي ويخاف منهم ,,
دوري مشايخ بتويتر وضيفهم بالواتس لو ما حبيتبي تكلمينهم مكالمه
و اشرحي حالة ولدك كـ استشاره عنده وشوفي شيقولون
و فيه مشايخ كثير ع الواتس ..
عسى الله يشفيه ويعافيه وبرد عليه صحته و عافيته
و يقر عينك انتي و ابوه بشفاءه
و ان شاءالله تبلغين فيه و هو معرس