طلاقي يوم ميلادي الجديد

خواتي بنقل لكم قصتي للعظة والعبرة وعشان تعرفون فعلا ان ابغض الحلال عند الله الطلاق ولكنه في بعض الاحيان حل وراحة .
تزوجته عن قصة حب هو زميلي بالعمل وانا كنت اشوفه محترم ومهذب وابن ناس وما يطوف اي فرض صلاة ولا ينظر لاي زميلة . بس انا بطبعي خجولة وياما بنات من نفس الدوام كانوا حاطيين عينهم عليه ,, الا انا لاني ثقيلة وايد وأؤمن ان كل شي قسمة ونصيب ,, المهم صارحني انه معجب بي وباخلاقي وباحتشامي ومن هالكلام وانه يبي يخطبني ,, طبعا انا وافقت مع انه عارفه ان لا اهلي ولا اهله بيرضون لاختلاف مجتماعتنا عن بعض فانا حضرية وهو بدوي ,, وفعلا صارت مشاكل من صوب اهلي ومن صوب اهلة بس اهو كان مصر علي وانا بديت اتعلق فيه وصارت القسمة .
طبعا ايام الملجة معسول الكلام واتكيت ولما سافرنا شهر العسل اكتشتفت اول اكتشاف كدر خاطري انه يشرب خمر لانه من السوق الحره اشتري زجاجات خمر !! وقلت ما عليه عسي ربي يهديه وحاولت اني احتويه عشان يبطل هالمشروب . ساعات كان يشرب ولا يقوللي ويجي البيت وهو سكران ومن اعترض بدا يمد ايده ويطق ويتلفظ الفاظ نابية علي كما لو اني بنت شارع مو بنت اصل وفصل وحمولة !!
تكرر الطق والضرب والسب والاهانات
ومن اشتكيت مرة لاخوه الكبير !! كانت ليلة يا ويلي ما بغيت الا عمري اشلون اتجرأ واشتكي عليه عند اهله
المهم عشت معاه ايام سوده بمعني الكلمة ان شاف تلفون البيت مشغول جاني علي طول وطراقات واهانات .
وبعدين يجي يبجي مثل الاطفال وسامحيني وحلليني انا احبج وما ابيج تغلطين ومن هالخرابيط !!
اه يا قلبي !! صج تعلقت بكذبة . الريال مو قادر يترك المشروب ,, والمشكلة انه يصلي وهو سكران تخيلوا !!
عانيت بصمت اخاف اشتكي لاهلة تصير سالفه بينه وبين اخوه الكبير وتميت بالعة قهر .
حاشني نزيف بالرحم بسبب طقه وعنفه وهو مو حاس علي نفسه
واخر حركة سواها فيني !! تخيلوا ضحك علي وقاللي بنروح دبي عشان نغير جو وانا صدقته ,, ولكن شوفوا اللئيم اثاريه وداني دبي عشان يتولاني طق وتعذيب والله اني من اتذكر ذيك اليلة ايدي ترجف ,, وهددني انه ممكن يذبحني واروح بلاش بسبب عنادي لاني اخر فترة قمت اعانده واطلب الطلاق وانام بغرفة بروحي
اخيرا ما اطول عليكم رجعت شبه انهيار بس هم رجعتله مو عارفه لمنو اشتكي اخاف اقول لاهلي ويصير ذبح ومذابح
خصوصا وانه سكير وما يحشم احد وما اقدر اشتكي بعد لاهله
وبقيت يا بنات 9 شهور علي هالحالة بين مد وجزر يحاول يراضيني يدللني يبجي ما ادري شنو يسوي بس انا خلاص كرهته , كرهته كرهته
واخيرا لما يأس مني طلقني
وحسيت اليوم بس اني رجعت للحياة لاني كنت كل يوم اتوقع اني راح انذبح
والله اني وصيت اختي انه اذا مت تفتح وصيتي وكنت كااتبه فيها تفاصيل وايد عشان دمي ما يرو ح بلاش
الله يسخر لكم ازواج طيبين واولاد حلال ,, انا ربي ابتلاني بشخص منافق يصلي بالنهار ويسكر باليل
واخيرا حسبي الله ونعم الوكيل في من ظلمني .
بس فعلا انا اليوم حرة ومبسووووووووووووووووووووووطه !!!