طلاق جديد

السلام عليكم ورحمة الله وبركاته
"صبر جميل" يا رب ألهمني الصبر والقدرة ع الاستيعاب لأن اللي مريت فيه كثير والله والحمدلله على كل حال
بنات أنا ما توفقت بموضوع الزواج أبد
انخطبت وفسخت خطوبتي مرتين بعد الملكة ثم تزوجت واحد كان يحبني لكن للأسف مدري وش جاني عليه ما قدرت أعيش معه وتطلقت على طول بعدها بفترة تقدم لي واحد من جماعتي وذوقني المر وطلقني عشان زوجته الأولى ومعي طفل طلاق بالثلاثة ظلم وبدون سبب
طلبت الله العوض وصبرت وتقدم لي واحد ثاني مطلق وعياله مع أمهم وقبل إن طفلي يكون معي وعشت معه ثلاث شهور زي العسل واعتقدت إنه خلاص هذا العوض الجميل
قلت رجال مطوع يخاف الله ملتزم وما رح يظلمني
حنا سوينا زواج رجال بس عشان كورونا وأهله ما جو يوم الزواج واستغربت وسألته قال أمي كبيرة وبعدين اوديك تزورينها إنت
سكت على مضض لكن ما شكيت في شي وسافرنا وانبسطنا وكان زي العسل معي وحتى لما رجعنا لبيتنا دايم كلامه معي حلو ويداريني ويتلطف معي لكن كان يصرف ما يبيني اروح اتعرف على أمه وخواته
وكان أكثر شي مضايقني إنه ما يبتسم لولدي ولا يلاطفه ولا يناظره حتى
مع ان ولدي لطيف مرة ويلاحقه ومرة سمعته يقول له بابا
لكن ابد ما يتجاوب مع ولدي وكأنه صنم
هالشي حز في خاطري لأن ما توقعت فيه أحد قاسي كذا ع الاطفال وممكن يعاملهم بجفا
سكت وقلت باعالج الموضوع شوي شوي وإن شاء الله ربي يطرح محبة ولدي في قلبه
ومشت الايام هادية وما بيتي وبينه الا الزين ورحت لأهلي الويكند وقبل ارجع ارسل اجلسي عند اهلك
استغربت احسبه مسافر او البيت فيه مشكلة او شي
ما جا في بالي شك انه ناوي فراقي خاصة انه خلاني اروح دكتورة نساء عشان آخذ منشط احمل وفجأة كلمني قال ما نصلح نكمل مع بعض
انت ما تصلحين لي سألته ليه قام يلف ويدور
تخيلوا يا بنات يقول ما شفت بالشوفة زين
وولدك ماااا تقبلته فلو تبين نكمل تخلينه عند أمك ما أشوفه وتكتبين هالكلام عند محامي وتوقعين عليه ولا تطلبين نفقة
علما اني شارطة عليه بالعقد ولدي معي ووافق
قلت المؤمنون على شروطهم وإنت عطيتني كلمة ووافقت على شرطي
قال غيرت رأيي
قلت وش الحياة الزوجية اللي فيها مكاتبة بين زوجين!
وليش الغدر! قال اخليك تروحين عنده خمس ايام وتجيني يوم راضي
قلت بس انا مابي مسيار ولا أقبل إنك تتشرط علي أو تفرق بيني وبين ولدي ولا أبيع ولدي عشان رجال
قام ثاني يوم راح وطلق
كذا بعد ثلاث شهور بس
طلق بكل استهتار وبرود
المشكلة يا بنات مطوع ويصلي الخمس بالمسجد ويصوم ويقرا قرآن لكن ما خاف الله فيني
كسرني وحسبي الله ونعم الوكيل