طلبتني استشيركم وبتستخير بعد رأيكم ((حاله عاجله على حافة الطلاق))

السلام عليكم ورحمة الله وبركاته
انا جايتكم بطلب من اعز واغلى صديقاتي
كل من لها تجربه اوعندها خبره تساعدها جزاكم الله خير
اخواتي وحبيباتي
صديقتي متزوجه من شهور قليله
تزوجت رجل متزوج وعنده عيال ..وله مركزه وهيبته
ياقلبي تقول كان ايام الملكه عسل ووعدها وحلف لها ما يظلمها ابد ويعيشها برومانسيه
البنيه تقول ايام الملكه كانت تحصل بينها وبينه مشاكل
وكانت تطلب منه انه يستخير وهي تستخير لأنهم ما يدرون وين الخير لهم
مع انها ما وافقت عليه الا بعد استخاره
تقول كان مستعجل الزواج وكنت اطلبه واترجاه انه يؤجل الزواج لكنه كان يرفض
المهم البنيه جهزت نفسها خلال شهرين وتم الزواج
تقول اليوم الثاني الله لا يوريك صار شخص آخر
تقول حسيت من نظراته انه يكرهني تقول وكأنه يدور عليه زله حتى يخانقني
البنيه ياقلبي بكاها في اليوم الثاني تقول توقعت انه اذا شاف دموعي بينكسر ويراضيني
بس الصدمه انه قعد يعنفها بشده وتمسخر عليها لما بكت
المهم تقول مسحت دموعي وسكت وجا وقال آسف بس انتي خليتيني اعصب
لأني ما اتحمل اشوف دموعك؟؟؟؟!!! <<يارقيق القلب ما كأنك انت اللي مبكيها من شوي!!))
المهم ايام الملكه خبرها انه اثث الشقه وجهزها ومو ناقص الا حضورها
وانها كلفته الشي الفلاني
تقول البنت بعد انقضاء شهر العسل
سافروا للمدينه اللي بتستقر فيها ... تقول وتفاجئت انه لا شقه مفروش ولا اثاث ولا شي
غير سكنها بشقه اجار عاديه حتى الفرش مو فيها
المهم البنيه سألته قالت انت خبرتني بالملكه انك مجهز الشقه وامثثها !!!؟؟؟
قام يسرد عليها قائمه بالأعذار وانه حصل كذا وحصل كذا
تقول البنيه وسكت ما بغيت المشاكل مع اني حاسه انه يكذب علي
تقول وبقيت اسبوع احس بضيق وخنقه لأنه يتركني ساعات طويله لوحدي
ولما يجي ما يعطيني عاطفه وصار مصدر لخوفي ورعبي
مع انها تقول وتحلف انها ما قصرت معاه وانها تعامله زي البيبي حتى هو كان طاير من السعاده
بمعاملتها له تقول كأنه بعمره ما تزوج !!!؟؟مع انها ثالث وحده بحياته
تقول عاد كان لي اغراض مهمه عند اهلي وودي اجيبهم وبعض الحاجات ما كملتها وكذا تقول جيته بأسلوب وذرابه وقلت له انا لي اغراض عند اهلي لازم اجيبهم
((عاد هي بديره واهلها بديره)) تقول بالبدايه عارض وزعل
وقال ما ابيك تروحين ومحتاجك ...تقول بس بطريقتي عرفت اقنعه
المهم وداها لأهلها ...قضت الاسبوع الاول والثاني وكانت تتصل فيه وتدز له من هالمسجات العاطفيه
تقول ما ابيه يفتقدني
المهم بعد اسبوعين ...اتصلت عليه وقالت تعال اخذني ....قال مسرعك!!! قالت انا خلصت
وش اللي يجلسني بعد!!! قال اقعدي هالأسبوع بعد واستانسي مع اهلك
تقول استغربت من كلامه بس من شوقي لأهلي فرحت انه بيخلني هالأسبوع
المهم ويعدي الاسبوع الأول والثاني الى ان قضت البنت شهر وكم يوم وهي عند اهلها
وهي تتصل عليه وتطلبه وكل شوي يقول لا تستعجلين مو هالحين اصبري
وبدا هرج الناس ..مطلقه ...منحاشه.. ...تقول تعبت نفسياً وانهرت حسيت كأنه ما صدق اني رحت
لأهلي ...البنيه عاد لا اب ولا ام يتيمه ولا احد من قرابتها مهتم فيها
تقول خليت اختي الكبيره تكلمه ومع هذا تحجج ... وقال يصير خير
المهم بعد اسبوع اتصل عليها...قالت له اسمع يافلان انا بديت اشك وابيك تكون صريح
انت ناوي على شي!!!؟؟؟ انت تبيني ولا ما تبيني!!! قال عطيني فرصه افكر واستخير وارد لك خبر
بعد اسبوعين؟؟؟!!!! تقول انهرت كأني طايحه من السما على راسي...قلت وشووو!!!! تفكر وتستخير
بعد ايش؟؟؟ بعد ما صرت ثيب!!!! هالحين جاي تستخير وتفكر ...ويوم انك مو واثق من نفسك
ليش استعجلت الزواج !!! ولا زواجك مني كان بدافع المتعه
((البنيه ماشاء الله عليها جمااااال صارخ واخلاق وثقافه وطيبه))
المهم سدت الخط على هالكلام
الحين هي حالتها النفسيه سيئه جداً
وطلبتني اشاوركم لأنها بتبدا بصلاة الإستخاره لطلب الطلاق
وابيكم تتفاعلون مع موضوعها جزاكم الله خير لأن فيه حالات كثيره مشابه لها
حتى يكون في هذا الموضوع فائده للجميع
ابي كل الاراء والتجارب تصب هنا ..قبل يوم الخميس