موضوع حلو ...
بالنسبة للاجهزة اللي عندي ومريحتني غسالة ال جي اتوماتيكاكبر حجم اغسل فيها البطانيات وحتى الستايربس مااكثر فيها اخاف تخرب يعني البطانيات احط وحدة بس
وعندي كواية براون بخار حلوة .
وعندي قطاعة مولينكس استخدمها للبصل وللطماطم ولخلط الشوربة وطحن البسكويت والخبز وكذلك خلاط المولينكس العادي للعصاير وللكيك وغيره
وافكر كثير بالمكرويف بس خايفة من اضراره وغير كذا مطبخي صغير مايساعد

وناوية باذن الله اشتري براون اللي تكلمتوا عنها بس اسال هل الكاس تبعها زجاج او بلاستيك ؟

رفع الله قدرك دنيا واخره



عقبال مطبخ الفيلا الدورين الخارجي والداخلي



كم مقاس غسالتك انا 10 كيلو من ما جيك شيف واحط فيها البطانيه النفرين والكفر البوليستر النفرين
بس ما انصحك تغسلين الستاير فيها خلي الستاير واشياء المنزل بعيده عن غسالتكم

تفاديا لترسب الاوساخ بها


ياليت تفيدينا ايش تكوين فيها وبكم شريتيها



اذا عندك هذي مالها داعي البراون

الميكرويف مضر ((( على حسب ما سمعنا )) وعندي فرن فيلبس يجنن
يحمي ويطبخ



الكاس بلاستيك

بس اذا عندك المولينكس ليش البراون

يسلمو على المرور

السلام عليكم
انا مازلت اجمع في الاجهزه الضروريه التي تساعد على اختصار الوقت والجهد
عندي غسالة اتوماتيك من توشيبا 9كيلو ولكن احس اني ندمت على شرائها لاني ما قريت عن الغسالات ولا عرفت المميزات الممتازه الابعد ما شريتها والعيب اللي احس انه قاهرني فيها انه ممنوع اعبيها مويه ساخنه او انها تسخن لايمكن ولا توجد هذه الميزه فيها وعلشان كذا مقهوره مع انها تغسل البطاطين والستائر ومفارش السرير بس لا تتحمل الاحجام الكبيره جدا والثقيله مثل البطانيات النفرين والمعطبات
القلايه مالها داعي استخدمتها فتره من الزمن احسها تاخذزيت بكميه كبيره ولا تقلي زين الناس مع انها مولينكس وتنظيفها صعب ومتعب احس اني داخله حرب
فرامة ملوخيه رهيبه تفرم الملوخيه وتعمل السلطه المعصوره وتبشر الجزر والملفوف لسلطة
الملفوف وتفرم الخبز لعمل العريكه والمعصوب كما انها تحتوي على قطعه لخفق الكريمه واعمل بها الكابتشينو زي ما ذكرو الاخوات سكر ونسكافيه وماء وتطلع زي الكريمه
عندي الشوايه حجم صغير اعمل فيها الساندويتش وتحمصه يطلع حلو وايضا اضع فيها البرجر بعد ما احشيه واغلفه بالقصدير يطلع ملموم وتتجانس المكونات وتطلع لذيذه
عندي ميكرويف بس ما احس اني استفدت منه كثير اسخن فيه بعض الماكولات واشوي البطاطا واضع فيه الكرنب كامله لتطري الورق وازيله بسهوله واغسله واحشيه
اسخن فيه بعض الاحيان السوائل مثل الحليب والماء ولكن اكون حذره لانه من الممكن ان يتطاير على الوجه بعد اخراجه اذيب فيه اللحم والدجاج اذا كنت مستعجله او يوجد ضيوف مفاجئين
عندي براده مرة مريحتني بس اعاني اذا جوني ضيوف من الاطفال لانها واقفه فأضطر اخبيها عنهم
عندي بعد خلاط الكيك عباره عن يد فقط بدون صحن ومافي مشكله منه
عندي مكنسه اوكارينا صناعه ياباني تكنس وتشفط الماء وفيها منفاخ
عندي مكوات كبس مريحه جدا ملابسي وملابس اولادي وزوجي وكأنها مكويه عند الكواي
عندي الات يدويه ولكن لم استفد منها مثل الة الدونات مالها داعي والةلقمة القاضي والة لف ورق العنب
عندي فريزر قديم اعطتني اياه امي الله يخليهالي مره مساعدني ومريحني في التخزين
الثلاجه عندي قديمه وصغيره وناويه اغيرها بس ما اعرف افضل نوعيه ايش تكون
مازلت اطمح لشراء غلايه وماكينة خياطه وصانعة طعام وغسالة مواعين بس اخاف اتوهق فيها وماتكون عمليه
وثلاجه كما ذكرت سابقا ارجوا ان اعرف افضل الانواع لو تكرمتوا
ايضا ياليت تذكرون طرق اخرى للاستفاده من الميكرويف اسفه على الاطاله

موضوع رائع
بالنسبه لاله تحميص القهوه استغرب على البنات اللي ماعندهم اياها
ويحمصون بالفرن؟؟
فرق السماء عن الارض
بس يابنات انتبهوا تراها نوعين
نوع ياباني ونوع امريكي
الياباني هو الكويس
لانه يدور ويرجع فماتحترق حبات القهوه
لكن الامريكي يدور باتجاه واحد اتمنى انكم فهمتوا
وصراحه هالاله حمصها غريب عجيب
تطلع القهوه على كيف كيفك
راحه مابعدها رااااحه

مشكورة اختي ام امجاد واثير على ردك ..
ابغى اشتري البروان لان اللي عندي كاسها صغير وتاخذ وقت لما اقطع الخبز فيها اذا بغيت اصلح مثلا الحنيني .وودي بشيء كاسته تكون كبيرة
اما بخصوص الغسالة حجمها 15 كيلووالحمد لله مريحة
والكواية براون اعتقد بـ200 ريال اواكثر شوي ناسية بس عيبها لازم كل شوي اعبيها موية لكن احسن بكثير من الكواية العادية
وهل تعتقدين ان الفرن الكهربائي يقوم مقام المكرويف لان اختي عندها الفرن الكهربائي وتستخدمه احيانا للتحمية بس تقول ييبس الخبز والفطاير مومثل المكرويف ؟