طلقني!!

السلام عليكم
مو عارفة من فين ابدأ وكيف اشرح الموضوع القصة طويلة وبحاول اقول الموهيم والاخير فيها
متزوجة من حوالي 10 سنين كان فيها مشاكل كتيرة من اهل زوجي الام بالذات ووحدة من بناتها من تجريح واهانات وحتى سوء استقبال في بيتهم ومع كدا كنت مطنشة كتير ومكبرة راسي كان اهم شي عندي زوجي انو علاقتي فيه كويسة ومايهمو
زوجي كزوج واب انسان جدا رائع خلوق وكريم ويحبني جدا
في اخر سنتين تغير كثير ماادري ليش بس صار يسمع لاهلو كتير
اي كلمة يقولوها عليا يجي البيت قالب الدنيا عليا ويهدد ويتوعد بالضرب والطلاق وبعد مايروق ويهدأ يحس بالغلط ويعتذر وقعدنا على دا الحال سنتين اسمع والله العظيم امو لما اروح بيتهم صوتها طالع في الغرفة جنبي مرتك قليلة ادب مرتك ماتحب احد واهلها شايفين نفسهم مايبغونا وانتا بس تدلع اولادك ومرتك وتحبهم واحنا لا ومن دا الكلام وترجع تجي الغرفة عندي تسلم وتضحك عادي ولا كانها قالت شي وقيسو عليها من دا الكلام
اشياء تاهفة جدا تتكلم عنها وهوا مرررة يحب امو ويخاف يزعلها لو احد حتى من اخوانو زعل امو ولو بالغلط يقلب زي الوحش يسب ويلعن ويضرب يصير شي مو طبيعي
المشكلة الرئيسية صارت لما سافرنا سوا انا واولادي وزوجي وامو
امو بحكم عمرها الكبير تعبت من المشي في الايام الاخيرة وقالت خلاص انا برتاح في الفندق واحنا كنا رايحين الملاهي عشان الاولاد
رجعنا من الملاهي ونفتح الباب على صراخها تقول لزوجي انتا ماتستحي تارك امك ورايح تتمشى وانتا لو عندك حرمة زي الناس والاوادم ما سويت كد واصلن مرتك ماتحبني ولا تبغاني وكلام كتير انا سحبت حالي ودخلت الحمام قفلت على نفسي وطلعت بعدها وهيا تبكي وتلم اغراضها تبغا تحجز تسافر ونزلت تحت الفندق وزوجي ارسل اولادي وراها وجا عندي وقالي شوفي يابنت الناس من نهايتها انا امي ماتبغاكي لما نرجع من السفر حوديكي بيت اهلك وطلع وتركني وانا سكتت
اصلن انا مصدومة من كلامها وجا هوا وكمل عليا قلت لما يرجع يروق ونتفاهم
رجع بعدها عادي يتكلم معايا ولا كأنو صار شئ
رجعنا بعدها لمدينتنا قعد يومين معايا تمام نتكلم ونضحك وناكل عادي وفي يوم راح الصباح زيارة لبيت امو ورجع ماعاد يكلمني ولما يبغا مني شي يكلم اولادو يقولولي
وعلى اساس بروح بيت اهلي ازورهم بعد السفر قالي في السيارة نزلي اولادي عند اهلك واطلعي
وقالي بعطيكي فترة تفكري فيها تروحي لامي تعتذري وترجعي زي زمان تتكلمي مع امي عادي وتضحكي والا ترجعي لاهلك وحياتنا تعتمد على دا الشي
(انا زمان كنت مع امو واخواتو نضحك ونطلع ونروح مع بعض رغم المشاكل كنت ساكتة لين جا فترة امو كلمت زوجي انو انا قليلة ادب ومااحترمها وطبعا كالعادة صارت مشكلة كبيرة ووصلت لاهلي لانو تمادى في ردة فعلو وبعدها قررت انو علاقتي فيهم تكون رسمية سلام وبس وازا سألوني كلمة ورد غطاها )
الموهيم انا وقتها عصبت لانو دايمن انا اتنازل في كل مشكلة واروح اعتذر عشان ماابغا مشاكل وقولتلو ازا انتا معلق حياتنا الزوجية برضا امك فاانا ماني معتذرة واصلن كيف تبغاني احس معاك بالامان وانتا تهدد كل شوية بالطلاق عشان امك مو راضية عني
وقالي حياتنا ماراح تستمر الا اذا اعتذرتي ورجعتي زي زمان معاها قولتلو ازا انتا ناوي طلاق وماتبغاني طلق بدون مشاكل احنا بيننا اولاد واعتذار ماراح اعتذر لاني ماغلطت عليها وطلقني وقتها ونزلت لاهلي
انصدمت واهلي كلهم انصدمو مااحد توقع انو يصير دا الشي ولدا السبب
بعدها باسبوع ولدي الكبير (9سنين)يقولي ياماما ليش ماتعتذري وبابا حيرجعنا البيت بس روحي لجدة وقووليها اسفة وخلاص
انا انصدمت ماعرفت كيف وليش قال الكلام ولما بديت اجر لسانو قالي انو وقت السفر بعد ماصارت المشكلة نزل زوجي يراضي امو ويقولها والله لما نرجع من السفر لارميها بيت اهلها وماترجع الا لما تعتذر لك وقدام اولادي كل دا صار
انصدمت ماتوقعت انو توصل فيه كدا انو يراضيها بدي الطريقة وعلى حسابي
طيب هوا رجع بعدها عادي يكلمني يعني كان ساكت وناويها من داك اليوم
وكمان ولدي قالي انو جدتو لما نزلو تحت لما كانت تبكي قعدت تسبني واني مااحبها واني اكرهها وقالتلو لاتسمع كلام امك ولا تحبها وفي الاخير قالتلو لاتقول الكلام الي قولتلك هوا لماما
انا جنيت وقتها كيف تقول لولدي دا الكلام وتحرشو عليا ورسلت لابوه دا الشي وانكر وقتها
ولما ولدي كان يروح لابوه زيارات بعد الطلاق قعد يقول لولدي انو جدتك ماتقصد دا الكلام وانها بس كانت معصبة
طيب دحين يبغا يرجعني ولما ارسلي برسايل قالي انو انا ماشفت منك الا كل خير ولما سألتو طيب ليش دايما موقفك سلبي في كل مشكلة بيني ويبن اهلك رد عليا وقال انو بيحاول ماينحاز لاي طرف قولتو طيب انتا انحزت وطلقت كيف تعتبر نفسك محايد انتا خربت بيتنا وشتت اولادنا عشان رضا امك ورد وقال ايش اسوي انا مااتحمل دموع امي!!
صار لو فترة يكلم اخواني ويعتذر ويتأسف وانو غلطان ومايعرف كيف طلعت منو كلمة الطلاق وانو يبغى يرجعني
ومو عارفة كيف اتصرف انا مقفلة جوالي ومابرد عليه وقلبي محروق بس ابكي مو عارفة كيف اتصرف
مو متخيلة حالي ارجع ومو متخيلة حالي اعيش مع واحد باعني ببساطة كيف راح احس بالامان
وفي نفس الوقت خايفة على اولادي متعلقين مرة في ابوهم بس يتكلمو عنو وليش مانرجع بيتنا وبابا طفشان يبغاكي ترجعي
بابا حلف ماارجع ورافض النقاش
ماما مرات تقولي يابنتي اضغطي على نفسك وارجعي بس تشرطي اهلو ماتروحيلهم ولا لكي فيهم ومرات تحلف والله ماترجعي زوجك نذل ومايخاف الله
واختي تقولي ارجع وبما انو شكلو مررة ندمان اشرطي الي تبغيه وارجعي بس عشان اولادك
وانا مو عارفة ايش اسوي طيب حتى لو رجعت مااحس راح نرجع زي زمان احس حالي مكسوووورة ومجروحة منو
وفي نفس الوقت اذا شرطت اهلو مالي علاقة فيهم طيب هما ممكن يسوو مشاكل من بعيد ناس ماتخاف الله بالذات انو مشكلة زوجي يكون غير عقلاني في اي شي يتعلق في امو
ارجوكم ابغا بس حلول بدون تجريح وسب في اي احد