طلقني بس ما ارتحت تعبت من التفكير

السلام عليكم ورحمة الله وبركاته

كيفكم ان شالله طيبين
اكتب لكم قصتي بعد ما تشتت فكري ولا عندي
خبرات بالأمور هذي باعتبار اني البنت الوحيدة
لاهلي وانا الكبيرة ولا عندي صديقات ولا احب أتكلم بأموري الشخصية عند احد يعرفني
ابي تساعدوني وتنصحوني كاني أختكم
وربي اكتبلكم قصتي وقلبي أحسه يتقطع من الألم
يارب الحمدلله على قضاءه وقدره
قصتي اني قبل سنتين تزوجت (زوجي مقتدر
ماديا)(اذا احتجت فلوس يعطيني بالشي المعقول
غير اذا بغيت شي ثاني ضروري)

نطلع يوم بالأسبوع فقط غيره مستحيل وساعتين وراجعين أيام الوكيند مستحيل يطلعني مكان على طول عند اهلي يوديني
اذاقلت له نطلع بيوم ثاني يقول ليه اطلعك أو
من انتي كلمات جارحه ماله داعي ودي يقول تعبان
أو مالي خلق اهون غير كذا لما نطلع ما في احد ما
يتهاوش معه أو المكان يسبه ويطلع فيه١٠٠عيب أحيانا بس الاحظ أغلب الاوقات يتنرفز من أي شي
كلما نتناقش على موضع يقول هذا انا ما راح
اتغير ترضين فيني أهلا و سهلا ماتبين روحي بيت
اهلك دايم يقول اهم شي الرجال ما يقصر
بالبيت الباقي كيفه الحياه مواكل وشرب فيه أشياء ثانيه ابيها
عند اهلي اكل واشرب لو الزواج كذا ما كان تزوجت
بالسنتين هذي ما حسيت باي رومنسيه أو اَي تمييز
لي مثلي مثل اَي احد بحياته حسيت انه ما عنده مسوؤليه تجاهي
كل فتره يطلع لي بقصه وانا أحاول افهم ليه كذا
كل الناس عايشين كذا يقول مالي دخل بأحد
اول شي صدمني بشهرالعسل مايبيني احمل
ويستخدم أشياءتمنع الحمل
بعدها يقول ما ابي عيال الحين وكل مره أقوله متى
يقول مدري يمكن سنه يمكن سنتين
بعد كذا يحب يوديني عند اهلي كثير ومن بدري
يتحجج انه بيروح لاهله أو عنده استلام بس
استغرب انه يوديني بدري احس اَي اثنين توهم
متزوجين يحبون يجلسون مع بعض وقت اطول
خصوصا بالشهور الأولى و أهلي لا حضوا جياتي لهم الكثيرة
اكتشفت انه يسوي العاده السرية
بدا يتعذر ويقول أكون نايم واحتلم
بعده اطحت عليه يشوف أفلام ايباحيه
حاولت قد ما اقدر انصحه وأقوله خلاص انت متزوج

يقولي حيتنا من تزوجنا مشاكل وانتي بس تزعلين
أقول عادي اَي اثنين في بدايه حياته مشاكل
يقول لا حنا غير

غيركذا خواته يصورن بالسناب صديقاتهم
وقرايبهم وهوعادي يشوف بكل وقاحه
أقول حرام مايجوز تشوف يقول هم راضين
أقوله وانا طيب مافي اَي احترام لي يقول كلمي
خواتي مايصورون قلت وشدخل انت اللي عندي وتشوف
زعلت ورحت لاهلي قعدت عندهم كلمني قال متى
تبين أخذك قلت له بجلس عند اهلي ما ابي ارجع
قال طيب ولله سحب علي قعدت بعدها أكلمه ما
يرد كلمته امي كلمها بدون احترام أمي قالت لا ترجعين له اذا يبيك هو يجي
خفت قلت خل اعدل
الوضع مايستاهل رحت لما دخلت قال ما ابي
اشوفك ارجعي بيت اهلك مالي كلام معك قلت حرام
كل شي ينتهي عشان سالفه ما تسوى سمعني كلام
اسمتحملت وتأسفت له وخليت كرامتي تنهان عشان أبقى معه
وحط لي شروط من ضمنها ما اجيب طاري الحمل
٦شهور وأننا راح ننقل عن المنطقة طبعا هو
بإلملكه كان جايه نقل لمنطقتنا وقال لاهلي خلاص مالي
رجعه بس من تزوجت بس يهددني انه راح نرجع

يوم صارلنا حول السنه رحنا نكشف نشوف
ليه ما صارحمل اكتشفنا انه عنده مشكله في
الإنجاب صعب احمل طبيعي منه أو مستحيل بعد
الله سبحانه وهو كان مسوي عمليه
دوالي ولا قالي مآثره عليه غيرالعيب الخلقي
انا زعلت ليه ما قالي عن العمليه العيب الخلقي هو
ماله دخل فيه بس العمليه المفروض كان يقول
انا ضايق صدري مره وهو عادي يقول ربي ما كتب
لنا انا راضي رده بارد مره
بعدها بسته شهور حاولنا نسوي أطفال انابيب
نجحت وكان المفروض ما يقرب مني مده٦شهور
وتعلمت اضرب نفسي ابرسيوله بالبيت عشان
مطلوب اني ما أتحرك كثير وكل هذا سويته ولا احد
من اهلي يدري عشانه
بس ما الله كتب انه يتم الحمل ونزل
ضاق صدري وبكيت بس قلت ان شالله انها خيره
بعدها قلت بسويها مره ثانيه قال انا قاعدعلى بنك
روحي لأي مستشفى حكومي قلت الله يعين رحت
قعدت حول٣شهورعشان تحليل بس مليت
توظفت بمركز اهلي عشان اجمع فلوس العمليه
قلت انا بدفعها قال خلاص انتي ادفعي الكشفية
والأشعات والابرو الأدوية وانا العمليه قلت عادي
اهم شي نسويها مع انه عنده فلوس زايده هو اللي
يساعد أهله اذا احتاجوا اَي شي يعطيهم بدون تردد
من فلوس من فواتيرمن رواتب شغالات كل شي
وقال اذا سويتيها بوديك عند اهلك قلت لا بقعد
بالبيت ما ابي اهلي يدرون قال وعادي تطولين ما
تشوفين اهلك قلت وش اسوي ما ابي أضيق صدر
امي قال خلاص نربط رجلك كانك مكسورة
بعدها ب٣شهور واحد من أصدقاءه ارسله وينك
من تزوجت خربت وين ايّام السفر قال زوجي يبيلنا نرجع لها شدتني الرساله
وقمت ارجع للرسائل القديمة
شي مستحيل كان يخطر على بالي أبداً أبداً
كان عمله مو بنفس ديره أهله وعنده شقه ساكن
فيها وكان يستقبل فيها بنات الله يسترعلينا
مع أصدقاءه اللي متزوجين واللي ما تزوجوا
وشرب خمر الله لا يبلانا
اخوه عنده نفس العلاقات وعارف عنه ومخلين
الوضع عادي عندهم
مره اخوه ارسله كلام بالواتس عن خويته انجنيت
من الكلام وهو متزوج وعنده عيال
شفت رسايل قبل كان زوجي يرسل لأخوه بنات
ويخليه يجي لشقته هو وخويته
عنده جوال ثاني ما يستخدمه أبداً قديم مخليه
بالدرج فيه ارقام بناااات وكلام ورسائل
طبعا كل هذا قبل الزواج انا ما شفت عليه شي
بس بالسنتين هذي يروح كل فتره للبحرين عند
أصدقاءه يقول بيغير جو ولا يأخذني معه يقعد من
أسبوع لعشر ايّام راح تقريبا٥مرات هذا اللي خلاني انبش وراه
قبلها يسكتني بأربع ايّام بدبي ولا البحرين
المهم انا من عرفت وانا نومي ملخبط بس افكر مو
مرتاحة محتقره زوجي لأبعد درجه
كان مظهر لي العكس وأنه يستحي ويحرم ويحلل وما يصلح ولايجوز
والحقيقه غيييير
بسنتين انا اسوي اَي شي عشان نكون مبسوطين
لدرجه البيت انا صرت أغير فيه أغيرالحمامات تكرمون أغير
بالمطبخ أغير بالصاله بغرفه النوم سويت له ركن
كفي ادري انه يحبه من كثرما يقولي انتي فاضيه
ماعندك شي تسوينه صرت اشغل نفسي باي شي
بكل مكان شموع بكل مكان ريحه حلوه ادري ما
طلب انا سويته بنيه طيبه انا ما اطلع الا بريحه
حلوه ملابس جديده مهتمه فيه أضمه احسسه
بالحنان أقوله كلام حلو محترمته استأذن منه اذا بغيت اطلع او اتاخر عند اهلي.
أي احد يشوفني يقول ياحظ زوجك فيك جميله ومودبة ومحترمه حتى اهله يقولون له نفس الشي
بالأعياد والمناسبات أتذكره بهديه اذا سافرت مع
اهلي استحي اجيه أيدي فاضيه مع اني مو ملزومه
ما عندي راتب حتى لو عطاني حتى اذا اهلي
أعطوني لي. بس انا افكر فيه السفره مرتبه الأكل
جاهز أحاول اسوي اَي شي مشتهيه حتى لو ماعرفت احاول
وهو اذا سافرما يجيبلي ولاشي صدق يسال بس
ودي من نفسه يجيب سافر البحرين فوق٤مرات
ومصر والمغرب والشرقية كان سفره عمل بس ما
يبي يأخذني حتى لو كانت سفره مو لعمل ما ياخذني
انا اللي اسوي له كل شي حتى أظافره انا اقصها انا معها ذا تعب انا
اللي اقرا عليه اسمي عليه أخاف عليه اذا انجرح
أخاف على صحته انا احضر وارتب الأكل والقهوة
بشكل حلو استقبله اذا جاء من السفر احمل أفلام
عشان اغير جوعن القعدة بالبيت صرت اسوي لنا جو

بعد شهرين من تفكير وتعب قلت مستحيل أعيش
كذا بس تفكير وشك جيت وسألته قلت انت تعرف احد
قبل الزواج انه وحده اتصلت علي وقالت لي
سالته ابي اشوف اني غاليه عنده ولا لا كنت ابي
يقول ماضي وراح ابي يقول ما عندي غيرك

الله لا يوريكم انقلب شيطان وش هالكلام ومن قالك
ومنهي ولله لا اشكيها بالمحكمة وانتي خوذي
أغراضك وروحي بيت اهلك وراح اتفاهم مع ابوك
وصلني بيت اهلي انا أقوله خلاص ماله داعي اهلي
يدرون يقول الا علميهم وش تقولين قلت خل
نتفاهم قال وشتبين مني وشتبين في واحد ما
تثقين فيه ونزلت بعد هالكلام لبيت اهلي
جلست حول أربع أيام عند اهلي ما في اَي اتصال قلت لابوي كلمه عشان اخذ أغراضي
كلمة ابوي قال البنت تبي تأخذ أغراضه قال طيب ما
قال ليش انا مظلوم
قال خله تأخذ اغراضه ابوي تفاجأ برده البارد وبس كذا
ما احترم أبوي ابوي كان يعزمه كل أسبوع للغداء عشان انه صار واحد من عياله بس ماقدر هالشي
بعدها بأسبوع قاله ابوي وش صارقال اذا خلصت
أوراق الطلاق بعطيك خبر وبس بسهوله ذي
ارخصني وعطاني بلوك وأهلي كلهم عطاهم بلوك
اول يوم طلقني راح البحرين بعدها بأسبوعين راح مربيا
وهو كان يقول لي ما عندي فلوس نسافر كنت ابي اروح مكه (قالي اعتبري مكه سفرة ها لصيف)
بروح مكه عشان ادعي ان العمليه الثانيه تنجح ربي ما أراد
اتعب نفسي لواحد ما يستهل يفكر بس بتسعه شهور
اللي بصيرفيها منسدحه ما أتحرك عند اهلي
كلمه ما عندي فلوس بحد ذاته عيب يقوله انا اللي
ما عندي شي استحي أقولها يارب اننا اثنين اثنين
وما معه فلوس
دايم كان عندي خوف اذاكلمته اني ابي اهتمام ابي
استقرار ابي راحه بال كان يقول لو ما ارتحت معك
كان تعرفت على بنات أو كان تزوجت وحده ثانيه
طول السنتين كان يجيني إحساس بانه ماراح نكمل
بس استغفر ربي واضغط على نفسي وانا من النوع
اللي ما ترضى بالغلط ابدا ولوكان تافه
الحين خلصت عدتي هو عايش حياته ومبسوط وانا
عايشه على الذكريات اللي كنت أسويها لواحد ما
يستاهل ياحسافه كل تفاصيل الملكه اللي رتبتهاكل تفاصيل الزواج
الشقه كل جزءفيها تفاصيل حلوه خليته اقرب من نفسي لي
كل صورة كنت ابيها ذكرى لنا نشوفها لما نكبركل
لحظة مرت ياحسافه انزفيت لواحد ما يستاهلني
بس دخل حياتي خرب علي وراح
خرب فرحتي خرب فرحت اهلي اول فرحه لهم
تركني بسهوله بأبسط ما يمكن اهلي يقولون
على طول طلقك وأهله ولا حتى قالوا نسال ليه
تعبت من التفكير وتعبت اهلي معي
بس افكر اقول ليتي ما تكلمت وكملت حياتي معه
ليتني ما قلت له شي ولا ثرته أتذكر اللحظات
الحلوه لو كانت قليله بس صارت ما تغيب عن بالي
أتذكر طلعتنا ودخلتنا أتذكر سفرنا أقول ليتي صبرت
ولا استعجلت بس طاح الفاس بالرأس ما ينفع
الندم
وانا عنده افكر بأصدقائه افكر باخوه افكربسنابات خواته افكر بسفره أقول اذا الحياه صعبه من أولها بعدين ايش
الشيطان بس يوسوس فيني

الله يعافيكم ابي تنصحوني هل انا خربت حياتي؟؟
هل اللي سويته صح؟؟
المفروض اني صبرت دام ما شفت شي بعيني؟؟
هذا هو الزواج وانا مو عارفه؟؟
نفسيتي تعبانه بس الوم نفسي كثييييييير