طلقني وانا عروس والان ماذا فعل بي...ابغى شوركم ساعدوني

السلام عليكم
هذا اول موضوع لي للأسف وأكتبه وانا ابكي ..اقرأوا اللي صاير معاي وعطوني شوركم
لو كنتم مكاني وش كان ردة فعلكم..ابغى اللي عندها راي سديد ترد ..واللي انحطت في نفس الموقف ترد...واللي تطلقت ترد..واللي متزوجة ترد...بنات لاتبخلون علي تراني محيوسه
قصتي هي:
عمري الان فوق الثلاثين وتزوجت متأخر قبل كم شهر رجل اصغر مني بس انه عاقل وثقيل..انا وزوجي نحب بعض كثير من فترة الملكة بس بعد زواجي بيومين بدأت مشكلة عدم تكافئ النسب (موضوع قبيله ) وتدخل رجال كبيرمن طرفهم وطلب من زوجي يطلقني لانهم ارفع مني نسبا (في مخهم وتفكيرهم )) ...
طبعا ماعلمني وبعد شهرين زادت المشاكل عندهم وانا مدري واخرتها طلقني بعد شهرين زواج..امه وخواته مش راضين انه يطلقني..ولاحملت منه
انصدمت كثير ..ابكي الليل والنهار..ولا اعرف أنام من البكاء والقهر..وجاني شيء في يدي ورجلي من الصدمه ماعاد احركها الا بتعب ومشقه .. اصلي ابكي ..وانا اقرأ ابكي ..على الاكل مع اهلي ابكي من داخل..
عقلي مو معي وتفكيري مو معي..يكلموني ما استوعب..فيني نار تضوي بداخلي..شعري من قدام يابنات والله كله شيب ابيض تقولون وحده عمرها 60 سنه ..ماعاد طلعت ولا رحت ولا جيت ولا ارد على جوالي ..واللي يكلمني ياويله اتهاوش معاه..ومالي خاطر اتكلم مع احد ويرتفع ضغطي على اتفه شيءالان انا في فترة العدة
طبعا الان قربت عدتي تنتهي وتفاجأت قبل يومين اتصل طليقي بي
وعلمني انه خطب وتملك على وحده قبيليه وحلوة ووظيفتها ممتازة واصغر منه وانها متعلمة بدولة برى كل حياتها وغيره من المميزات ( يعني انها احسن مني )
بس طلب مني ارجع لذمته لانه يحبني (وعلى قوله اني حبيبه واني فاهمه الدنيا احسن واني اخلاق ) بشرط انه يظل بالسر ولا يدرون اهله الا بعد سنه ولا يضيفني في بطاقته الا بعد سنة عشان زواجة من الثانيه يتم ولايفتح لي سكن الا بعد سنة ..ويجلس يروح ويجي علي ..
بصراحه يابنات انا احبه موت بس طلبه هذا احس فيه مذله لي وخايفه من المستقبل وخايفه انه بعد سنه يتخلى عني وخايفه ارجع واتحسف وخايفه ما ارجع اتحسف وخايفه على اطفالي من الجاي اذا ربي اعطاني اطفال..وخايفه من كل شيء..وبداخلي ما احب المشاركة مع امرأة اخرى قهر وانا لسه حتى ماصرت ام...بنات شوروا علي لوكنتم مكاني وش كان يكون قراركم وانتم بعمر فوق الثلاثين..الوقت يضيق علي ولاعاد باقي في عدتي الا كم يوم واصير محرمه عليه
طبعا بأستخير لكن ابي العقل عندكم وش يقول وايش يكون جوابكم لو كنتم مكاني؟؟؟عمري يروح
تكفون يابنات ادعو لي من قلبكم ان ربي يختار لي الصالح وان ربي يفرج همي وكربي ويحل لي مشكلتي
ادعو لي يابنات بهالعشر الله يخليكم ويخلي لكم اهلكم وعيالكم والله محتاجه الدعاء وبدعي لكل وحده دعت لي من كل قلبي...بنات من كثر ما ابكي في صلاتي ما اقدر اكمل دعائي وتنفسي يروح
تكفون ابي ردكم الله يخليكم ساعدوني