طليقي كلمني

السلام عليكم

جاني ابني امس قريب العصر وعلى اساس يرجع ياخذه بالليل
بس الحمدلله ابوه انشغل ورسل ل ابنه وقاله خلك عند امك وبكرى اجي اشيلك
طبعا هنا استغليت فرصتي وقلتله الولد مارح يطلع من عندي
على طول اتصل وبدا صراخ مارضى يسمع
تهديد وعناد ووعيد وصل لدرجة انه بياخذ الولد معاه على مزرعته لي بعيدة عنا ٥٠ كيلو عشان مايجيني
ويتهمني اني احرض الولد على ابوه واهله
وان ولدي قليل ادب ويبغاله تربية من اول وجديد وغير الكلام لي يسمعني ياه عشان امي واخواني
وسكر
انا رسلتله رسالة وحدة على الواتس اب
قلتله شوف يافلان انا نازلة بكرى عالمحكمة بقدم شكوى تعنيف نفسي
شان ابني وحقوق الانسان بعد وبروح ارامكو مكان عملك وبشتكيك هناك جنب زملائك بقلهم هذا فلان يعنف ابنه ويحرمه من امه وقلتله والله العظيم ل اوصلها ل امير المنطقة
ماخليت له قلتله بفضح السيرة بكل مكان
قرا الرسائل وبعد ساعة اتصل على طول
وكان هادي وهاجد وقعد يبرر تصرفات حرمته بحق الولد
ويقولي اننها حتى مع عيالها كذا
ويقولي تنكسر يدي اذا مديت يدي عليه انا ما اضربه الا اذا كان مسوي شي
وانا ماينادوني الا يا ابو فلان على اسمه لانه ابني الكبير
ويقولي لا تزعلين بس الولد قليل ادب وتربية ويرادد معاي على طول
بس مايرادد مع هالحقيرة لانه يخاف منها
حقه الطبييعي لانه شايف الويل منكم وانا لي محرضته يصير قوي معاهم
كلمني حوالي ساعة
ورفض مرة ثانية انه يسكن عندي على طول
يقولي بيتي وش كبره وبالاخر ولدي يسكن عند زوج امه
ويقولي الولد بيتحسس كذا من زوج امه وعندي ياخذ حريته
وطبعا اغلب كلامه متركز انه خايف ارفع قضايا عليه ويوعدني عشان الولد انه بتتغير كل اموره
وقالي خليه هذا الاسبوع كله عندك على بين ما ازبط اموره كلها ومايكون الا راضي
ويتم يحرص وينبه اني ما اقرب ابدا للمحكمة حسيته خايف كثير وخصوصا موضوع اني اروح ارامكو اشتكي عليه هناك
والولد يقولي مارح يرجع لو مهما حصل معاه ويكذبه بكل كلامه
اخر مرة مجننته رغم تعبها هالقردة ورغم انها حامل بالشهر الرابع ماتترك الولد من شرها تقوم تطارده بالليل تقومه من سريره تقوله خل اختك ام ٣ سنين تنام هنا وانت تعال المجلس افرش لك وتنام بالارض
وجات تصحيه للمدرسة تشوفه تعبان وجهه اصفر يبغى يرجع بس وانتم بكرامة وجسمه متكسر بسبب هالنومة هذي
ورغم انها عطته ادوية وبنادول يروح يسمعها وهي قاعدة بالمجلس تتصل على ابوه تقوله ولدك ترا يمثل ويقول انه مريض عشان مايروح المدرسة وذاك يتصل يسفل بالولد
وتدخل عليه بعدها قاعد يلف ساندويتش بالمطبخ وتقوم تسويله مشكلة وليه صاحي وانت تعبان ومدري ايش
لحد ماقال ل ابوه خلاص خلني ارجع بيت امي وذاك مارضا
يعني كل النسوان بالحمل يكونو تعبانين وحالتهم حالة الا هي الله ينتقم منها ماتفكه من شرها
الولد خلاص قالي ما ابغاهم ولا ابغى اشوف ابوي ولا اهله ثاني حتى لو ماتو