طليقي ماراح افتك منه دام بيننا هالبنت شوووووروا علي

يابنات زمان قبل اتطلق من عمر بنتي شهرين وكان طليقي يهددني كل شوي في بنتي موبس يوم عمرها شهرين من كان عمرها أياااام قبل تكمل اسبوع اذكر ارسل لي رسالة كنا متهاوشين يقول اذا تحبين فلانه ( بنتنا) عطينيها وانسيها للأبد وبعده بدأ مشوار التهديد في بنتي 
اذكر وعمرها اربع شهور مرة كنت نايمه في الليل وبنتي في لفتها نايمه ماصحاني الا صوته شايل البنت بقوة ويصارخ علي باخذ بنتي بوديها اهلي وانتي احذفك عند باب اهلك واتزوج واجيب وحده غيرك في شقتنا وبنتنا معنا 
يعني نسب بنتي له وللحرمه اللي بياخذها 
هو يستخدم كبتاجون ومأثر عليه 
وايام تهديده تعبت نفسيتي خاصة من الموقف اللي كنت فيه نايمه صرت ماانام الا حاطه يدي على بنتي واقول يمكن ياخذها وانا نايمه وماعاد اشوفها وبعده صرت اضرل بنتي وابكي وكل ماتبكي بنتي اصارخ عليها واهزها بقوة مدري ليش كنت اموت فيها واكرهها لأنها تكسر ظهري وتكسرني كلي
وبعده ماعاد تحملت وطلبت طلاقي وانجن يبيني اصلا كل مرة اتركه يبكي يبيني وارجع يطير فيني وكلها فتره ويسوي مصيبه جنني احس اني اتعامل مع مريض نفسي
مرات يزعل من شي تافه ويسفهني وفجأه بالليل ألقى عيونه حمر وبس يبتسم ويرضى عني ويجيب لي عشى من المطعم اشكال وألوان ومن بكره يرجع لزعله اذا فك الحبه مفعولها
المهم اخر مره قررت طلاقي وبكى وسوى المستحيل وقال بعطيك رضاوة عشرين ألف ورفضت ارجع وتراه كان يضربني وبعدين يندم يعني مايتحكم بنفسه وينهار من ادنى كلمه وحتى يوم يهددني في بنتي اذا رفضت ياخذها يقوم يضربني انا من تزوجته ضربني كذا مره ضرب مبرح وبعدها صرت اذا ضربني اضربه وادافع عن نفسي
وهو بدون هالمواقف يصرف علي يسافر فيني يوديني فنادق دايم يقول احبك وماينام الا حاضني هومرات كذا ومرات كذا يعني موب طبيعي المهم اخر مرة تمسكت بقرار الطلاق لأني خفت على نفسي ولأني لاحظت نفسيتي تدمرت واضرب بنتي وحتى بنتي اذا شافتنا تهاوشنا تاكل اظافيرها وهي ماكملت سنه ونص وتطلقت الحمدلله وبعد طلاقي بفتره زانت نفسيتي وماعاد صرت اضرب بنتي وصار بالي وسيع عليها وتخرجت وفرحت وبديت ارجع فلانه الأوليه وهو تزوج بعد طلاقنا بشهر ومن ليلة زواجه يرسل لي لأن الحرمه ماعجبته وجلس فتره كل شوي يرسل لي يترجاني ارجع وقالها صريح قال مافيه مثلك بالفراش انتي حلوه وانتي وانتي وماحب الا انتي ومابي الا انتي ورفضت ارجع ماني صاحيه لورجعت وبعدين تيسرت الظروف وغيرت رقمي وصار اذا فيه شب ضروري أبلغه برساله من جوال امي لان ابوي واخواني مايكلمونه ابد وابوي ماعاد يرد على اتصالاته ابد بس يرسل لأخوي الصغير اذا بغى ياخذ البنت زيارة وقبل شهر هددني في بنتي برساله بطريقه استفزازيه وكنت طالعه مع خالاتي لإستراحه وتنرفزت وبنتي ازعجتني تبكي وقمت ضربتها بقوة جلدتها على ظهرها وضربتها بقوة على راسها واخذتها لغرفه وحذفتها عني وقفلت علينا الباب وجلست بزاويه وهي تبكي بقوة وتشاهق وتنتفض وتقول مامه يعني وش فيك هي لسى ماكملت سنتين وطولنا وهي تبكي لين ضميتها وسكتت ونامت وجلست اسبوع كل ليله ابكي ولااكل عشاني ضربتها مدري ليه سويت كذا حسيت اني رجعت نفس يوم كنت عنده وتبت امد يدي اصلا انا احقدددد على الام اللي تضرب اطفالها وبعده حاولت احن عليها وزانت امورنا وقبل يومين اخذها زياره ورجعها معها بجامه جديده في كيس نعومي وقبلها بجامه في كيس مكياج والبارح ارسل يقول حلوه هدايا فلانه
انا كنت متضايقه من حركة الاكياس هويقول انها من زوجته
قلت الله يكثر خيرها بس ماله داعي حركة كيس نعومي والمكياج يعنني تبي تجلطني ترى مادريت عنكم بس عيب اخواني ياخذون الكيس منك
وشكله عصب لأنه كذا مايتحمل اي  كلمه ارسل رساله متى تزوجين والله اخذ البنت اعطيها زوجتي
وطنشته بس كالعاده تعبت نفسيتي ولانمت طول الليل واليوم الصباح ضربت بنتي وطولت تبكي لأنها تفاجأت لأني ماعاد ضربتها الا قبل شهر في الاستراحه احس نفسيتي فيها خلل اذا هددني في بنتي يجيني شعور ماعرف اوصفه لكم حتى مااحب اضمها اذا بكت وادعي عليها تموت وارتاح من ابوها ومن اللحظه اللي ممكن ياخذها مني
يابنات لاحد يقول اشتكيه عشانه يستخدم كبتاجون لأنه ذكي حتى يوم خطب وبيتزوج قالي اذا التحليل ماهو كويس يبي لي اصبر شهر واحلل مره ثانيه ..اما بتحليل زواجي منه اذكر بعد الملكه يعلمني ان ولد عمه حلل عنه
مشكلتي الحين كيف اضبط نفسيتي وش رايكم اروح طبيبه نفسيه ماعاد ابي تهديده يأثر في نفسيتي جالسه ابكي ودي اعطيه البنت ولاعاد يربطنا فيه شي بس كيف اتحمل امووووت لوياخذها 
اعذروني افضفض لكم وابكي نغسيتي تعبانه جدا