طيور جاوا

الســــــــلام عليكــــــــم ورحمة الله وبركاته

كيفكم يا حلوين

انشالله كويسيين

دوووم ياربي دوووم

** طيور جاوا << شي بس مو أي شي **

من البداية أحب أوضح أن الموضوع لفئة معينة من المجتمع

وهي فئة الهاوين تربية الحيوانات

وخصوصاً الطيور

طبعاً أنا منهم بس أنا أحب تربية كللل أنواع الحيوانات حتى الزواحف
المهم
في مرة من المرات رحت لمحل الطيور وكنت ناوية أجيب ببغاء أو طيور الحب أو كناري << هذي الأنواع اللي دايما أربيها حالي حال غيري

بس

شفت

نوع من البلابل أول مرة ألاحظه

حجمها صغير وألوانها بسيطة

سئلت عن إسمها وقالي راعي المحل إنها طيور أندنوسية

طيور جاوا
حركاتها حلوة وهادئة
سعر البلبل الواحد 35 ريال
والزوج بــ70 ريال

فعجبتني وأخذت لي زوج

وبعدها وجدت نفسي مذهووولة

من هذا النوع من الطيور الغير مشهوور ولكنه غير غير عن باقي الطيور ..

شوفوا حبيباتي :

أنا كتبت تقرير كامل عنهم ..وأتمنى إنه يعجبكم

نبدأ في الموضوع

طيور جاوا : هي طيور صغيرة الحجم.. قصيرة الذيل نسبياً .. ذات منقار صغير غير معقوف لونه أحمر فاتح جداً للإناث و فاقع للذكور ..

يمتاز الذكر باللون الأبيض الناصع النقي << طبعا كلل الذكور بهذا اللون أما الإناث فألوانهم تختلف بإختلاف بسييط جدا
تكون الإنثى كثيفة الريش وقوامها أقل حجما بالنسبة للذكر فالإختلاف بينهما في الحجم يكون وااضح فالذكر يكون طويل الساقين و أقل في كثافة الريش ومنقاره أكبر ونحيفا بالنسبة للأنثى بينما تكون هي قصيرة الساقين و كثيفة الريش جدا و أكثر هدوءاً..ومنقارها صغير بالنسبة للذكر

أول ماجبتهم للبيت كانوا هادئييين جدا جدا لدرجة إني لم أسمع لهم أي صوت فقلت راح أرجعهم للمحل << معقولة في بلابل ما يغردوا
وبعد يومين كنا جالسين نتفرج على التلفزيون وفجأة سمعنا صوت تغريد أو بالأحرى غنااء إش أقولكم رووووعة خيااااال لدرجة أن البيت كله تجمع عند القفص يبغوا يسمعوا الصوت مرة ثانية ..
كان الذكر يغرد بصوت عالي ويغير في درجات صوته ويترنم ويهتز طرباً ليجذب نظر الأنثى اللي كانت مشغووولة بالأكل ..
وكل يوم على هذا الحال الذكر يغرد والأنثى مطنشة بس من جد حماااس وانتي قاعدة تراقبيهم كأنك تتفرجي على مسلسل على الهوا ..
بعد إسبوع قررت إني أعلمهم الطيران ..
ففتحت باب القفص ... بس .. ماطلعوا << مرة متكسليين
فدخلت يدي وخرجت الذكر بعد مقاومة عنيفة منه
وبعد ماخرج طار في الغرفة و جلس فوق طاولة الكمبيوتر
والأنثى حالتها حالة..
تصارخ وتناقز مفجوعة ومبحلقة عيونها تدور عليه << بانت على حقيقتها
المهم

خرجتها من القفص وصاروا ملصقين ببعض فوق التلفزيون .. وماكانوا يعرفوا يطيروا مزبوط ..

بعد إسبوع :

أتقنوا الطيران ..
ومر شهر وأنا مستانسة بالحييييييييييل تعودوا علي وصاروا ياكلوا من يدي و طوول الوقت جالسين عند صينية الشاهي بجنب أمي ياكلون بسكويت وأول مايشوفوني يركضون على رجولهم خايفين أدخلهم القفص والله شكلهم تــــُحفـــــة ..
البيت صار حيوي وأمي قالت لي أول مرة أحس إن تربية الحيوانات لها فايدة .. أصوات تغريد الذكر جناااان .. وشكل الزوج مع بعض حلو سبحان الله تبارك الخالق تناسق في الألوان عجيب يكملوا بعض كأنهم لوحة متكاملة ماتنقسم نصين ..
من المضحك ..

الذكر كان يقدر يروح لغرفة ثانية وكل شوية يروح طيران لها والأنثى تصارخ صريخ يقطع القلب وهو فرحاااان ويرجع لها ويقعد يعلمها الطريق مشي من جد منظرهم يضحك ..

بعد كم يوم لاحظت شي كانوا يجمعون كل أوراق البيت ( المناديل .. أوراق الدفاتر .. الأكياس .. ) بإهتمام وحرص شديدين لدرجة إنهم جلسوا يسحبوا الجريدة من يد أخوي ..كلل هذا يجمعونه في فتحة صغييرة بين الدولاب والجدار وأمي عصبت بس أنا حاولت معاها أبغى أعرف نهاية هذا كله إيه ؟
بعد فترة بسيطة بنوا عش صغير ودافيء وكانوا يدخلوا فيه أغلب الوقت و صاروا مايطيقوا حاجة إسمها القفص بس يدخلوا ياكلوا ويخرجوا بسرعة ..
و عاد أنا خفت قلت مو معقولة يسوون لي عش هنا!..فرحت المحل وشريت لهم عش رخيييص مرة ممكن 10أو15 ريال,,وشريت لهم قفص كبير دورين بستين ريال شكله تحفة بس ثقيل شوية..أول ما حطيتهم فيه حاسوا اللي طاح في علبة المويه واللي انحبس في منصة كذا حاطينها حركات يعنني بيت من جد..و بعدين اليوم اللي بعده كانوا عاديين هاديين مرة وزعلانيين عشان تعبوا ما يعرفوا كيف ينزلوا من الدور الثاني على الأرضي خخ حشى مو طيور..و أنا بالغصيبة أدخل يدي و آخذ الذكر<<صاحبي الأنثى شرسة شوية و خوافة و هذا شي معروف في الطيور
المهم..آخذه و أحطه جوا العش الجديد هو طبعاً يطلع بسرعة مرة خايف من المكان الغريب الضيق و المظلم الجديد عليه..وهكذا ثلاث مرات أحطه بوسطه..في نفس اليوم بالليل الأخ الذكر طلع الدور الثاني يستكشف..و يدخل راسه بوسط العش و يبحلق فيه اتشجع شوية و وقف على حافته بعدين دخل جوته..هههه بشك جوه عجبوا المكان و بعدين صارت الأنثى تدخل كمان بس مو كثير عشان أظافيرها طويله وتنشب في فراغات أغصنة العش و بالقوة تطلع و صار الذكر يطلع برا و يجيب ورق ويحطوه على أرضية العش خايف على المدام لا يصير فيها شي..و بعد ما صار العش جاهز..جلسوا أسبوعين وبيضوا لي ثلاث بيضات صح أنا نسيت ما قلتلكم إن الأنثى أول سقطت أول قبل ما جيب لهم هذا العش لقيت البيضة مكسورة تحت في القفص و حزنت مرة عليهم هي بيضت لما كنت نايمة و كنت حاطتهم في القفص و أنا عند النوم أو لما ما أكون في البيت أحطهم في القفص و هما يحتاسوا ما يحبونه أبد عشان ما فيه عش..بس ذحين خلاااص صاروا ساكنين في فيلا عمرهم ما حلموا فيها..نرجع لسالفتنا الأنثى بيضت ثلاث بيضات صغيرة و صارت أربعة وعشرين نايمة عليهم اللهم تنزل تاكلها لقمة وبعدين ترجع لهم..و طبعاً الحال هذا ما عجب الذكر مرة..فإش سوا الله يهديه وقدام عيوني و أنا أذاكر ليلة إمتحان الكيميا تخيلوا جلس فوق البيض و ضغط بكل قوته على البيض,,و,,,إهيء إهيء,,وانكسر البيض..الأنثى المسكينة كانت تحت تاكل ومادريت بالفاجعة إلا لما طلعت فوق وشافت الفتات..شفتوا الغيرة إش تسوي إذا كانوا هذولي حيوانات إش قال البشر!!فانتبهوا من الغيرة تراها خطيرة..و نرجع نكمل..الأنثى تحملت و صبرت شفتوا كيف فقدت ثلاث صغار كانوا راح يملوا عليها البيت و خصوصاً إنه كبير بس زوجها النكدي الغيرة خذت عقله..بعد شهر بيضت الأنثى مرة ثانية ثلاث بيضات ورحت أنا أول ماشفت البيض على طوول أخذت الذكر و حطيته بالقفص القديم أحسن خليه يعيش عزابي و يتعذب و لا إنه يذبح عياله..الأنثى انبسطت على الآخر وجابت ورقة كبيرة وغطت العش بيها و مرتاحة نايمة أربعة وعشرين ساعة فوق البيض ولما إتجوع تنزل و تاكل زي أول بس في فرق ذحين الذكر مو موجود ولا يرجها بإلحاحه إنها تلعب معاه ويطلعوا مع بعض برا..والذكر يا عيني عليه يصارخ و مكتئب من الحبسة مرة و من كثر ضربه للقفص تكسر و صار الباب ما ينقفل و صارت مشكلة كبيرة الذكر يروح للبيت الكبير اللي فيه الأنثى ويدور حوله و يصارخ وينادي عليها و هي الغبية تنادي عليه كمان..بعدين أنا قلت لازم يكون فيه حل مستحيل أخليه فلتان كذا و المشكلة ما عندي قفص ثاني و إذا دخلته القفص الكبير راح يكسر البيض فما في حل غير إني أحطه بوسط..تعرفوا سلات الخرجات حقت الطلعات الكبيرة المخرمة..حطيته فيها و معاه موية وأكل بس هو زاد إكتئاب و صريخ و رجة و حزن و بكى آخرالليل..وصاروا أهلي يصارخون علي (حرام عليك..ياويلك من ربي..يا خي هوا ما يبغى عيال خليه على راحته)وضغط إعلامي كبير..وفي الأخير استسلمت و قررت أطلق سراحه..و فعلاً أول ما دخل القفص صارت الأنثى تنقره بمنقارها وتدافع عن العش والله منظر يقطططع القلب..بس هي لا زم تاكل فأول ما سابت العش راحله..وسوى المصيبة حقته لثاني مرة..بعد شهر الأنثى بيضت بيضة وحدة بس ما عاشت كسرها الذكر على طول أول ما بيضتها..وبعد إسبوع جاءت المصيبة..كنت قاعدة على الكمبيوتر فجأة تصرخ عليا أختي(.....)إلحقي عصفورك دعس عليه (.....)أنا جريت بسرعة جنونية على مصدر الصوت(خخ حلوة مصدر الصوت)و أول ما وقعت عيني عليه هو منظر عصفورتي الحبيبة جالسة تحتضر في نهاية الغرفة بجانب الجدار طبعاً وشي أكيد إني عدت إلى أدراجي وأخذت معي الذكر في يدي و قفلت علي غرفة و نوبة صياح عنيفة تنتابني ماني قادرة أصدق إنها ماتت و الذكر حيجلس لحاله و الله لو تسمعون صريخه تحزنون عليه حتى أبوي اللي إهوا أبوي اللي ما يحب هالخرابيط حزن عليه و قال (الوحدة صعبة)..الذكر جلس إسبوع يلفلف بالبيت يدور على الأنثى ويناقز هنا وهناك ولكن ما من مجيب..بعدها صار هادي و حبوب و متلصق فيني بشكل غريب..أكيد إنتوا تسألوا ليش ما جبت له أنثى لكن للأسف العائلة الكريمة أصدرت بند جديد في دستور البيت إنه خلاص هذوا البلابل آخر حيوان أربيه بالبيت يقولون طفشوا من الحيوانات وبيتنا صار مهزلة و أنا لازم أكبر و أعقل..بس ماعرفوني كل شي ممكن أكبر عليه إلا تربية الحيوانات ما أقدر أسيبها ليا خبرة إثناعشر سنة في التربية و من كل شعبة حيوانية أخذت لي واحد(ثدييات/طيور/أسماك/زواحف/دائريات الفم لسه ما تطورت )المهم أرجع للموضوع مشكلة هذا الإستطراد..الذكر صار صديقي..تعرفوا إش معنى صديقي؟؟..ممكن ماراح تصدقوني بس أقولكم..الطيور الأصيلة زي طيور الحب والكناري وغيرها لما تبغا حاجة نشيطة ومرحة خذ لك زوجين و أما تبغى صداقة وألفة خذ لك ذكر..صار أربعة وعشرين ساعة معايه بس لما أروح الحمام الله يعزكم و يكرمكم أحطه على مقبض الباب..و صار أول ما أدخل الغرفة اللي أهوا فيها يطير عليِّ زي و يحط على كتفي المغامرات ههههه..و إلى الآن هو معاي الله يحفظوا كل هذي الأحداث صار لها ثلاث سنين و عصفوري الحبيب لا يزال يرافقني الله يحفظوا ويطول بعمره <<متعلقة فيه الأخت..لما أقرا قرآن أو أنشد يغرد معاي حتى لما أتكلم في التيليفون يجلس على كتفي و طول الوقت يغرد و صحباتي مو مصدقين..و لما ما أكون موجودة يهدا ويجلس طول الوقت بالقفص هادي وساكن و حتى لو فتحولوا الباب ما يطلع غير لما أجي أنا و أدخل يدي و يوقف عليها و يخرج ماشاالله يعرف يميزني و مايسوي هالحركات مع أخواني العيال بس أختي اللي تشبهلي أحياناً ينط على صدرها <<ملخبط الأخ و طبعاً صراخ و مشاكل و طول الوقت أخواتي يدعوا عليه خايفين من حركاته الغريبة..أختي تخاف يكون فيه جني تقول حركاته مو زي العصافير الثانية كأنه بسة يتمسح ويتلصق فيني و ينام تحت ياقة بلوزتي و يدخل وسط شعري و ياكل في حضني وآخر التطورات لما صار تخيلوا..ينام معايه..في مره طحت على الفراش دايخة نعسانة وكان بيدي و نسيته و هو عجبته الهرجة ونام كمان ولا طار مع إني كنت أتقلب و أتحرك و ظلام مو شايف حاجة بس واثق فيني..أمي تقول إذا ماانتبهت راح يموت موتة بشعة أتقلب عليه و أفغصة لحسن هو صغير مرة أصغر من طيور الحب يعني في حجم طيور الكناري..والله تعبت من الكتابة..بس بحكيكم شوية عن موتة الأنثى..بعد ثلاث سنين تشجعت و سئلت أختي عن كيفية الموتة..هي قالت لي إن العصفورين كانوا جالسين عند الباب و أخوي جاي داخل (على فكرة هوا اللي اشترا لي العصافير ذول)و ماانتبه لهم و دعس على العصفورة..المشكلة الدعسة ما كانت خفيفة لا اهوا طول مرة و جلس واقف عليها و اهوا مو منتبه و جلس يسأل أختي عن حاجة بعدين قال لها(يا خي أنا حاس بشي تحت رجلي)ويرفع رجله و يشوف الجثة تبغوني أوصف لكم شكلها وااي مرة بشع بس أنا ما شفته بس أختي حكتني بعد ثلاث سنين من الحادثة و لما حكتني بكيت تخيلوا!...المهم صحبتي قولتلها على موتة عصفورتي إهيا ما اقتنعت قالت :أخوك و معليش ماانتبه طيب العصفور مستحيل ما يشوفه ومايطير ) قولت لها: ( حبيبتي عصافيري مو زي أي عصافير كانوا ما يخافوا منا مرة لدرجة انهم لما نعدي جنبهم ما يطيروا واثقين ماشاء الله و شوفي النتيجة كيف ماتت العصفورة بسبب ثقتها الزايدة و على فكرة هما ماخذين مقلب في أنفسهم محسبين إنو نحنا شايفينهم طول الوقت و ناسيين إنهم صغار مرة و خصوصاً لما يكونوا على الموكيت ما ينشافوا وسط الألوان و خصوصاً الأنثى لأن لونها غامق مرة..طيب طولت هذرة و ظهري ورقبتي انكسروا فعشان كذا راح أنهي الموضوع و مااقدر أكتب أعطوني راحة يومين بعد كل اللي كتبته...شوفوا ملخص كل اللي قلته هوا عبارة وحدة
"طيور جاوا مو زي أي طيور"وهذي تجربة شخصية لي أنا ربيت كل أنواع الطيور تقريباً(زبرا و فنش لما كنت رابع إبتدائي وبعد السلاحف ربيت ببغاء و بعد السمك ربيت طيور الحب و هذا غير الكناري بس ما حصلي شرف أربي حجازي وذحين أمنيتي أرجع أربي بسة أي نوع و ممكن أخذلي سلحفاة صح بإذن الله أحكيلكم عن سلحفاتي..تربيتي للحيوانات غريبة أخليهم يتصرفوا تصرفات مو من طبيعتهم..وصرت ما أقول لصحباتي عشان ما أحب أحد يقول إني متأثرة بالمغامرات خخخ فبنت خالتي كانت تحسبني أمزح لما أحكيها عن عصفوري وما صدقت إلا لما شافت بعيونها..آها ظهري تسمر بوقف أخاف فقرات الظهريصير فيها شي..
وهذي صور الذكر توي مصورته..والإنثى عندي لها صور قديمة قبل ما تموت بس ما في إسكنر أول ما أجيبه أنزل لكم صورها ألوانها روعة..وصورهم مع بعض أروع أدعوا بس يجي الإسكنر قريب...

اتفضلوا..
وشكراً على تحملكم لمتابعة القراءة...